InfoHub Logo

Búgin naýryz aıynyń jıyrma birinshi juldyzy.Al erteńgi kúnniń jarq etýi besten altyǵa endi aıaq basatyn kishkentaı,sábı júrekti Aıkerim úshin úlken qýanyshty kúnniń bastamasy ispettes.Óıtkeni, Aıkerimniń anasy oǵan:" jıyrma ekinshi naýryz -Qazaqtyń jańa jyly" -degen bolatyn. Sol jańa jyl sóziniń áseri me, kim bilsin,Aıkerimniń bala qıalynan ot shashýlar,túrli-tústi oıynshyqtar,merekelik shyrsha,ártúrli syılyqtar eles berdi.Osy qıaldyń jeteginde júrip,  "erteńgi kún qashan bolady!"- dep anasynyń artynan áli sharq uryp júr. Anasy bolsa qyzyna: "mine daıyndalyp jatyrmyz ǵoı,qyzym,asyqpa!"- dep basý aıtyp qoıdy.Degenmen, anasynan estigen jaýapqa Aıkerim qanaǵattana qoımady.Bul jaýap Aıkerimniń oıyndaǵy suraqtardy eseleı túspese kemite qoıǵan joq.Aıkerim úshin kózdi ashyp jumǵansha zymyraı ótetin bir kún bir jylǵa tatıtyndaı.Kúnniń tez ótpegenine shyn unjyrǵasy túse bastady.Endi, ol aınalyp júre berýden túk óndire almasyn túsinip, kúnniń tez ári qyzyqty ótýi úshin anasyna kómektesýdi uıǵardy. Anasy oǵan:" Árıne,seniń kómekteskeniń maǵan jaqsy, úırengeniń ózińe jaqsy, altynym"- dep, ekeýi birge naýryz kójeniń zattaryn jasaýǵa kiristi.Sonyń arqasynda, Aıkerim naýryz kójege qosylatyn jeti dámdi bilip aldy.Esine aldyńǵy jylǵy dál osyndaı ýaqytta naýryz kóje pisirilgeni,onyń tańdaıdan  ketpes jaǵymdy dámi túse bastady. Anasy osy ýaqytta Aıkerimge naýryz kójeniń tarıhyn aıta bastady."Qyzym sen bilýshi me ediń?Naýryz kóje týraly bir ańyz áńgime bar.

Ertede, bir óte dáýletti baı adam bolsa kerek. Onyń jeti perzenti bolypty-mys.Aýqattylyǵymen bala shaǵasymen baqytty da baıandy ǵumyr keship jatady. Biraq, qashanǵy birqalypty ǵumyr bolsyn. Aıaq-astynan kókte qara bult úıirilip, dúrbeleń zaman da bastalyp ketse kerek. Nebir aty jaman indetter paıda bolyp, emi tabylmaı aýyldyń jany jaısań adamdary shetinen qyryla bastapty. Osy indettiń qursaýyna baıdyń jeti balasy da túsken desedi.Keıin aýyldan da dáýlet qasha bastapty.Baı bundaı qaıǵy qasiretke  shydap otyra almaı, elge kómek berý nıetimen  ár nárseni bir shalyp,aqyry mynadaı toqtamǵa keledi.Aýyldaǵy bar dám-tuzdy jınaıdy. Óziniń biraz ýaqyt qoldanylmaı qalǵan úlken qazandyǵyna ot tutatyp,qolynda bar azyq-túlikti paıdalanyp jeti túrli dám salynyp bir taǵam jasap shyǵarypty.Ol taǵamnyń ıisi ashtyqtyń shyrmaýynda jatqan ár adamnyń tamaǵyn qytyqtap,alysqa jetken desedi.Osy taǵam búkil aýyldy qutqaryp,burynǵy shyraıly kúılerin qaıta syılaǵan eken.Bertin kele, bul taǵam kóp daıyndalyp "naýryz kóje" degen ataýǵa ıe bolady.Belgili bir meıramǵa arnalyp daıyndalady.Bilesiń be, Naýryz meıramynyń 3000 jyldyq tarıhy bar.Bizge ata-babamyzdan qalǵan asyl muralardyń biri.

Aıkerim anasynyń áńgimesin uıyp tyńdady,kóptegen qyzyqty málimetterge qanyq boldy.Endi qalǵan kókeıindegi saýaldy erteńniń enshisine qaldyrdy.

Mine, kópten kútken kún -jıyrma ekinshi naýryz da kelip jetti.Aıkerim kún uıasynan kóterile bere oıanyp alyp,úıdegilerdi oıatty.Anasymen birge mektep alańqaıynda bolatyn naýryz merekesiniń konserttik baǵdarlamasyna kózaıym bolyp,altybaqan teýip,kıiz úımen tanysty.Úıge kelgen soń qonaqtarmen birge anasynyń daıyndaǵan bal tatıtyn kójesin iship,meıiri qandy.Aıkerimniń baıqaýynsha qysta ótken jańa jyl merekesinen kóktemgi qazaqtyń jańa jyl meıramy erekshe.Biraq ,soǵan qaramastan Aıkerim jańa jyldyq syılyqtan úmitti.Eh,Aıkerim "bilgeniń bir toǵyz, bilmeıtiniń toqsan toǵyz" ǵoı ózińniń.Sirá, osyndaı balalyq shaq qyzyqtarynan keıin de, balalyq balǵyn kúnderimizdi ańsaıtyn shyǵarmyz.

Jumash Eńlik

---