InfoHub Logo

Kóz lınzasyn taǵatyndar ony taǵyp uıyqtaýǵa bolmaıtyny jaıly jıi estıdi. Alaıda keıde ony sheshpeı uıyqtaıtyn jaǵdaılar bolady. Nemese dosyńyzdyń úıinde túnep qalatyn jaǵdaı boldy delik, onda lınzaǵa arnalǵan konteıner men suıyqtyǵy bola bermeıdi, al keıde uıyqtap ketemiz. Bir qaraǵanda qaýip te joq sıaqty, alaıda qarasha aıynda Huffingtonpost basylymy lınzamen uıyqtap qalǵan er adamnyń soqyr bolyp qalǵany jaıly jańalyq taratty.

Kózdiń múıizgek qabyǵynyń ottegini aýadan ǵana alatyny belgili. Lınzany taqqanyńyzda ottegi kózińizge túspeıdi ári ottegi azaıyp ketedi. Los-Andjeleste turatyn medısına ǵylymdarynyń doktory, hırýrg-oftalmolog Kerrı Assıldiń (Assil Eye Institute ınstıtýtynan) aıtýynsha, lınzamen uıyqtaǵanyńyzda otteginiń jetispeýshiligi qaterli deńgeıge deıin jetýi múmkin.

Otteginiń jetispeýshiligi saldarynan kózdiń múıizgek qabyǵy isinedi, bul óz kezeginde erozıaǵa ushyratady. Al erozıa, amerıkalyq oftalmologıa akademıasynyń ǵalymy, medısına ǵylymdarynyń doktory Tomas Shtaınemannyń (Thomas Steinemann) aıtýynsha, bakterıalardyń enip ketý qaterin jeti esege ulǵaıtady. Kózdiń ózge aǵza múshelerindegideı ımýnıtetiniń joqtyǵynan ınfeksıa óte jyldam taraıdy.

Onyń ústine sizdiń lınzalaryńyz, Kolýmbıa ýnıversıtetiniń oftalmologıa profesory Djeım Orannyń (James Auran) aıtýynsha, Petrı tostaǵanynyń naq ózi. 

Al 15 mınýttaı lınzamen myzǵyp alý qaterli emes shyǵar?

Doktor Assıl 15 mınýt lınzamen myzǵyp alýdyń ózin orys rýletkasyna nemese mına qoıylǵan dalada serýen qurýǵa teńeıdi. Múıizgek qabyǵynyń isinýi kózińiz lınzamen jabylyp turǵan sátten bastalady eken. Qanshalyqty lınzamen kóp uıyqtasańyz, sonshalyqty qaterge bas tigesiz.  

Kóz lınzasymen uıyqtaý uzaq ýaqyt boıy zıanyn tıgizedi. Biz kózdi jylyna shamamen 3 000 000 ret ashyp-jumamyz, lınzamen kózimizdi ár ashyp-jumǵan saıyn kózdiń shyryshty qabyǵyn qajaımyz. Shyryshty qabyq qajetti maılanatyn suıyqtyqtyń azdyǵynan kústene bastaıdy. Endi buǵan lınzamen uıyqtaýdan alatyn zıanyńyzdy qosyńyz, osylaısha máseleni ýshyqtyra túsesiz. Al eger sizdiń kózińiz qurǵaqtanýdan alergıalyq reaksıalarǵa ushyraıtyn bolsa, lınzamen uıyqtaý tózbeýshilikke ákep soǵady, sóıtip siz kóz lınzalaryn eshqashan taǵa almaı qalasyz.

Qorytyndy

Uıyqtar aldynda lınzany sheshýge 30 sekýndyńyzdy qıyńyz nemese sılıkon-gıdrogel lınzalaryn satyp alyńyz, bul lınzany satyp alsańyz, onda ony kúndiz-túni taǵyp júre berýge bolatyny jazylǵanyn baıqaısyz. Al eger belgili bir jaǵdaılarmen lınzamen uıyqtap qalsańyz (ushaq ishinde, oıda joqta uıyqtap ketý) uıyqtar aldynda kózińizge dymqyldatqysh tamshylaryn tamyzyńyz, al uıqydan keıin kóp mólsherde taǵy da tamyzyńyz. Tamshyny tamyzýdan buryn lınzany sheship tastaýdan aýlaq bolyńyz, sebebi onsyz da búlingen kózińizdiń qabyǵyn zaqymdaýyńyz múmkin.

---