InfoHub Logo

— Jol bolsyn, qaınym! Aýyldan qashan shyqtyńyzdar? Jol ushy qaı jer? — dep baqalaý kelgen qara qatyn Kúlshara jeńgeı sóılep ólip barady. Sózsheń adam eken, qaıdaǵy-jaıdaǵyny aıtyp, qaratyp otyrǵyzbady. Biraq, sypaıy adamnyń kózinshe kóp sóılep ysylmaǵanǵa shyǵar deımin, sózi baılanyssyzdaý shyqty. Birese egin-shópti áńgime qylady, sharýashylyqtyń arasyna ákep "Daryldaq qaranyń úıimen arazdyǵyn qystyrady. Áıteýir, nege ekeni belgisiz, qonaq kelgende tymyraıyp otyryp qalatyn basqa áıelder sekildenbeı, bizdi rıza qylyp attandyraıyn degen qalpy eriksiz sezilip turdy...

Jóndileý kelgen sary bujyr áıel biz baryp túskennen úıge kirip-shyǵýmen boldy. Birese qulaǵynan súırep samaýryndy alyp shyǵady, birese etegine salyp kómir tasıdy. Júris-turysyna, aıaq basysyna qaraǵanda, Kúlshara jeńgeıge kyzmetimen jaqqysy kelgen adam tárizdenip tur. Biraq synǵa ilikken adam ońa ma, sary bujyr áıeldiń kirip-shyqqanyn, aıaq basysyn, nárseni kótergenin — bárin de Kúlshara jeńgeı shanshý sekildi kórip, sóz arasynda ala kózimen qarap qoıyp otyrdy...

Bul úı adam jaldaıtyn baı úı emes edi. Kelini shyǵar deýge Kúlshara jeńgeıdiń baıynan basqa bul úıde erkek kindikti joq sekildi edi. Sondyqtan sary bujyr áıeldiń jaıyn suradym. Kúlshara jeńgeı kúldi:

— Jeńgeı ǵoı,— dedi.

— Qaıdaǵy jeńgeı?

— Osy úıdegi aǵańnyń alǵan toqaly...

Nanǵym kelmedi. Kúlshara jeńgeıdiń baıy osy aýyldaǵy momynnyń biri. Jasy 40-tan asyp ketken. Kúlshara jeńgeı 30-ǵa kelse — jańa kelgen. Mynaý áıel 20-ǵa kelgen tárizdi. Aıýdaı aqyrǵan Kúlsharanyń ústine qandaı adam toqal almaqshy?!..

Kúlshara beıneleı sóıledi:

— Jaqyn kelinimiz edi. Baıy ólgen soń, arýaq attap ketpeımin dep, meniń baıymdy qalady. Baıym almaımyn dese de "men zorlap aldyrdym"... "Kóseý uzyn bolsa, qol kúımeıdi" degendi bilmeısiz be?!— dedi.

— Eki qatyn alǵan adamdy jazalandyratyn zańdy bilmeısizder me? — dep edim, Kúlshara jeńgeı jymıdy:

— Baqa qaınym onyńa malyn úıretti ǵoı. Áýelgi qatynyn aıyrǵan qylyp kórsetse, toqal alýǵa bola beretin kórinedi ǵoı. Qaǵaz júzinde myna qalqam ekeýimizdiń enshimiz basqa,— dep emshektegi balasyn aldyna alyp shopyldatyp súıdi.

Kórer kózge ústine toqal aldyrǵanyna, ana qatynnyń rıza bolyp tıgendigine tań boldym.

Aradan onshaqty kún ótpesten, basyndaǵy jaýlyǵy dal-dul, kóziniń aldy kógerip isip, Kúlshara jeńgeıdiń kúndesi aýylnaıdyń úıine kirip keldi.

— E, ne boldy?

— Oıbaı, qaınym, adýyn jeńgeń uryp ólesi qyldy. Tula boıym kók ala torǵaıdaı.

— Mundaı bolaryn basta bilmep pe ediń?

— Arýaq attap ketpe dep árqaısylary aıtqan soń, tıe salyp edim...

Surastyra kele anyqtaldy, bárin búldirip júrgen sol aýyldaǵy Jeksenbaı degen qý eken. Toqal alyp bergendigi úshin Kúlsharanyń úıinen bir sıyr soǵypty. "Ákimderdiń aýzyn alýǵa" dep 50 som taǵy alypty...

Taıaq jegen qatyn aýylnaıǵa "protokol" istettirip, sotqa aryzyn joldady bilem. Kúlshara jeńgeıdiń kóseýiniń uzarǵan-uzarmaǵany ázirshe belgisiz.

---