Kún jylyǵan, jer jibigen,
Qustar kelgen shaqtarda,
Tórdegi órgen tórt túlikke,
Tól jamyrap jatqanda,
Kózimdi almaı qaraıtynmyn egistikke telmirip,
Birde shalqyp,birde janǵan, birde óshken ottarǵa.
Estigende sazǵa qonǵan saryala qaz sańqylyn,
Kóktem kelip qalypty-aý dep,tabatyn-dy jan tynym.
Qara nóser tógip turǵan qara bult ishinen;
Ańǵarýshy em aıqúsh-uıqysh,almas qylysh jarqylyn.
Sodan jaz kep, en jaılaýǵa - Shalkódege kóshkende,
Aldymyzdan ańqýshy edi aıǵaı tastan esken jel.
Týǵan jerin ómirbaqı umytpasyn degen ǵoı,
Aınalaıyn analarym kindigimdi keskende.
Sodan ba eken, qalam tartsam, jyr týmaıdy jerimsiz,
Men sezemin, kútip jatyr,kútip jatyr, tek únsiz.
Týǵan jerdiń topyraǵyn súıe almasam máńgilik,
Onda meni qaldy deńder kómýsiz de kebinsiz...

---