InfoHub Logo

Kún sáskeden aýyp barady. Biz Grıshka, Qanataı úsheýmiz dıirmenniń jelke tusyndaǵy qoıtastyń ústinde otyrmyz. Qanataı — juqaltań, aq sur óńdi bala. Menen birer jasy kishileý. Grıshka — otyzdan endi asqan, dorba aýyzdaý sary jigit. Qazaqsha sýdaı. Dál aıaǵymyzdyń astynda kishkene ózen aǵyp jatyr. Tastan tasqa sekirip, týlap aǵady. Qanataı balaǵyn túrip alǵan, jalań aıaq. Aq kóbik bop kópirshigen sýǵa aıaǵynyń ushyn tıgizip, qyzyq kórip otyr. Grıshkanyń ústi-basy, bet-aýzy túgel ún. Terlep otyr. Endi birde ol jeńin sybanyp eńkeıip, qolymen sýdan ilip ap betin jýdy.

Grıshkanyń bilegi neshe túrli jazýlar men sýretterge toly eken. Qanataı qyzyǵyp ketti.

— Mine, keremet! Grısha aǵaı, munyń bárin qashan jazǵyzyp júrsiz?

— E, balalyq kezdegi ǵoı...

Qanataı Grıshkanyń bileginen ustap, tań-tamasha qylyp, sýretterdi qaraı bastady. «Umytpaımyn, týǵan anam» dep eki ret jazylypty. Ysqyryp turǵan ajdaha jylannyń basy, júrekke qadalǵan eki júzdi qanjar, teńiz kemesiniń qos ıakori taǵy basqa da osy sıaqty tolyp jatqan nárselerdi shımaı-shatpaq qyp sala bergen.

— Osynyń bárin ózińiz saldyńyz ba?

— Joǵa... Biraq munyń esh qıyndyǵy joq. Op-ońaı. Kerek etseń kel, bilegińe týǵan jylyńdy, aty-jónińdi qazir-aq jazyp bereıin,- dep qoıdy Grıshka, qaltasynan sıaly qaryndashyn alyp.

— Aýyrmaı ma?

— Óı, sen óziń dardaı jigit bolǵansha qorqaqpysyń. Qaı jylǵysyń?

— Qyryq jetinshi...

— On altydasyń. Pasport aldyń ba?

— Joq.

— Jaraıdy, másele onda emes. Káne, qolyńdy ákel, — dedi Grıshka.

Qanataı jeńin túrinip, bilegin sozdy.

Grıshka sıaly qaryndashyn sýlap ap, jazýǵa yńǵaılana berdi de:

— Eı, ákeń, ursyp júrmeı me? — dep surady.

— Meniń ákem joq.

— Á, onda durys. Káne, batyrym, seniń tózimińdi baıqap kóreıin bir.

Grıshka qap tigetin jýan ınesin Qanataıdyń bilegine pispekteı otyryp, týǵan jylyn jaza bastady. Qanataı tistengen kúıi teris qarap otyr. Janyna batsa da syr berer emes. Qabaǵy kirjıip, kózi jasaýraı túsedi de, maǵan qarap syr bergisi kelmeı jymıa kúledi. Anda-sanda Grıshka da:

— Jylaǵan joqsyń ba-eı! — dep qoıady. Qanataı jaýap ornyna qarqyldap kúledi. Álden ýaqytta Grıshka:

— Ákeń aty kim? — dedi.

— Jansultan.

— Durys. «J» árpin onan soń núkte qoıyp «Q» árpin jazam. Bola ma? Bitti. Kelistik onda.

Grıshka ınesin taǵy da pispekteı bastady. Tistengen Qanataı bir aýyq aýyrsynyp, kózin jumdy. Biraq qyń etip ún shyǵarǵan joq. Sózge aldandyrmaq boldy ma, álde shynymen-aq bilgisi keldi me, endi Trıshka:

— Ákeń qaıda? — dep surady Qanataıdan.

— Soǵysta ólgen.

— Mássaǵan,—dedi ań-tań bop daǵdaryp qalǵan Grıshka. — Áı, ol qaıdaǵy soǵysta ólip júr?

— Otan soǵysynda, — dedi Qanataı irkilmesten.

— Toqta, toqta. Sen jańa qaı jyly týdym dediń?

— Qyryq jetinshi...

— Al endi ne ottap otyrsyń, onda Otan soǵysy qaı jyldarda boldy?!

— Otan soǵysynda, — dedi Qanataı miz baqpaı. Kózi jasaýrap, endi bir aýyz sóz aıtsa Grıshkany tarpa bas salýǵa atylǵaly tur. Men áńgime betiniń ýshyǵyp bara jatqanyn sezip, Grıshkany búıirden túrttim. Óziniń aǵat ketkenin Grıshka da uǵa qoıdy.

— Jaraıdy, jigitim. Meniki qaljyń ǵoı. Qalaı jazyppyn, qolyńdy qarashy, — dep aldaýsyrata bastady.

Biraq Qanataı jadyraı qoımady. Shyp-shyp qan shyǵyp, isingen qolyna da qaraǵan joq. Óńi sup-sur bop, kishkene tanaýy qýsyrylap ketti. Dir-dir etip teris qarap otyrdy.

Kishkene ózen týlap aǵyp jatyr. Aq kóbiktenip týlaǵan boıda dıirmenniń astyna zypyldap enip jatyr. Saryldaǵan shýy qulaqty tundyrady. Dıirmen — bóreneden qıýlastyrǵan, shaǵyn bir bólmeli úı. Dıirmen tastyń birqalypty yrǵaǵyna qaraı, aqyryn teńselip turady.

Biz — Qanataı jáne Qanataıdyń sheshesi Bıbi úsheýmiz — tańerteń un tartqyza kelgenbiz. At-arbamyz dıirmenniń kóleńkesinde tur. Al Bıbi dıirmenniń ishinde tartylǵan undy shetinen qaptap otyr. Basqa isteıtin eshteńe joq bolǵan soń dıirmenshi Grıshka, Qanataı úsheýmiz syrtta, qoıtastyń ústinde otyrmyz. Jańaǵy qolaısyz jaıdan keıin sóz bastaý úsheýmizge de qıyn tıdi. Sondyqtan únsiz qalypta tóńirekke kóz tigemiz.

Dıirmen turǵan jer — tereń quzdyń tabany. Eki jaǵymyz da qulama tik betkeı. Syńsyp ósken ıtmuryn, yrǵaı, qaraǵan. Japyraqtary altyndaı sap-sary. Biraq áli túspegen. Dıirmenge jetkenshe týlap aqqan ózen, dıirmennen shyqqan soń saıdyń tabanyna jaıylyp aǵady. Tereńdigi tobyqqa da jetpeıdi. Malta tastar qylt-qylt etip, kórinip jatady. Jol — osy sýdyń ústimen, shoq-shoq taldardyń arasymen buralańdap, quldılaı júredi.

«Shaq-shuq» etip taǵaly attyń júrisi estildi. Eleń etip jolǵa qaradyq. Shoq taldardyń arasynan anda-sanda bir qylt etip kórinip, arbaly bireý kele jatyr. Atynyń tuıaǵy malta tasqa «shaq-shuq, shaq-shuq» etedi.

Sálden keıin arbaly dıirmenniń aldyna kep toqtady. Basynda myjyraıǵan shlápasy bar, orta jastaǵy adam qalǵyǵan kúıde, basy salbyrap biraz otyrdy. Onan soń bet-aýzyna qonǵan shybyndardy úrkitip, qozǵala bastady. Dıirmenge kelgenin endi ǵana bilip basyn kóterdi. Biraq bizdi kórgen joq.

— Kreshke! Aı, Kreshke, barmysyń! — dep daýystap qoıdy.

Grıshka kúlimsirep ornynan turdy.

— Bul meniń Shyntemir degen jekjatym, — dedi. Onan bul da daýystap: — Ýaı, Shyneke, kep qaldyńyz ba? — dep solaı qaraı júrdi.

— Kreshke, un daıyn ba? — dep surady Shyntemir.

— Daıyn, Shyneke.

Biz de Grıshkaǵa ere júrdik. Dıirmen ishinen Bıbi de shyǵa keldi. Arbasynyń ústinde áli de qalǵyp-múlgip otyrǵan Shyntemir Bıbini kórip ańyraıdy da qaldy.

— Janym-aý, senbisiń qaıdan júrsiń? — dedi. Sharasynan shyǵyp, qyzarǵan kózin Bıbiden aıyrar emes. Ústi-basy un-un bolǵan, aq sur óńdi Bıbi appaq, iri tisterin kórsetip ezý tartty. Shyntemirge jaýap bergen joq. Bizge bir qarap qoıdy da, qońyraýly ashyq daýsymen:

— Óziń qaıdan júrsiń? — dep qarsy suraq berdi.

— Aýyl arasy da.

Shyntemir arbasynan túsip, dıirmenge kirdi. Bir aıaǵy aǵash eken, syqyrlata basyp, aqsańdaı júrdi. Dál aldymnan ótkende men onyń bet álpetin bireýge uqsatqandaı boldym. Biraq esime túsire almadym. Bıbimen ekeýi qol alysyp kórisip, amandyq-saýlyq aıtylǵannan keıin.

— Jalǵyzbysyń? — dep surady.

— Joǵa. Qanataıym bar janymda, — dep Bıbi balasyn nusqady. Shyntemir kilt burylyp Qanataıǵa qarady.

— Azamat bolypty-aý, azamat bolypty-aý... — dep kúbirledi. Óńinde qýanysh pen kúıinishtiń belgisi bar edi. Kúlip turǵan Bıbi:

— Qanataı, aǵańa qol berip amandasshy, altynym, —dedi.

Shyntemir Qanataıdyń qolyn qysyp ustap, uzaq turdy, biraq eshteńe degen joq.

Dıirmen tasyn bir qarap qoıǵan Grıshka:

— Al, Shyneke jekjat, unyńyz mine, daıyn, — dedi ylǵı bir teńkıgen ala qaptardy kórsetip. — Tek, qazir úıge júrip, shaı iship ketińiz.

— Iá, shaı ishelik. Júr, Bıbi sen de.

— Un qaptap tur edim... — dep Bıbi kibirtiktep qaldy.

— Myna eki jigit baǵanadan bos júr ǵoı, endi osylar qaptaıdy, — dedi Grıshka kıip-jaryp.

Dıirmen ishinde Qanataı ekeýmiz qaldyq.

— Bul kim? — dep suradym men Qanataıdan Shyntemirdi.

— Bilmeımin. Kórgen adamym emes, — dedi ol.

Biz kezektesip ún qaptaýǵa kiristik. Birazdan keıin ekeýlep júrip, terlep-tepship, eń sońǵy qaptaǵy astyqty dıirmen tasqa quıdyq. Osy kezde Grıshka kelgen. Qyzara bórtip apty. Tipti kóńildi.

— Jigitter, qalaı, maıda tartylyp jatyr ma? — dep kep, undy alaqanyna salyp ýqalap kórdi.

— Baıqaısyńdar ma, sender úshin tasymdy da aıap jatqan joqpyn. Basqa elge ólip ketsem de maıda tartpaımyn. Tek Shyntemir jekjatqa ǵana osyndaı ǵyp tarttym. Áı, ózi bir myń jasar jaqsy adam ǵoı...

Grıshka jekjatyn jer-kókke syıǵyzbaı maqtaı ala jóneldi. Onan soń shyǵyp bara jatyp, maǵan beri kelshi degendeı kózin qysyp, ym qaqty. Men sońynan ilese shyqtym. Grıshka álgindegi qoıtasqa ertip ákeldi.

— Áı, sen ne sezdiń? — dedi yqylyqtap.— Qanataı bar ǵoı, jekjattyń balasy eken.

Bul jańalyqqa men tipten tań qaldym.

— Myna Shyntemirdiń balasy ma? — dep anyqtaı suradym.

— Ts-s-s... Aıqaılamasańshy... Iá, osy Shyntemirdiń balasy. Jańa Bıbimen ekeýiniń sóz álpetterinen baıqap qaldym. — Grıshka qýlana kúlip, kózin qysyp qoıdy. — Óziń Shyntemir men Qanataı qatar turǵanda baıqap kórshi, týra aýzynan túskendeı. Oı ıt-aı, bizdiń jekjat... Ha-ha-ha...

Grıshka sanyn shapaqtap, ishek-silesi qata kúldi. Sálden keıin bizdiń tý syrtymyzdaǵy Grıshkanyń úıinen Bıbi men Shyntemir shyqty. Bıbi uzyn boıly, bıik keýdesin tik ustaıdy. Aq bátes jaýlyǵyn shalqaıta tartqan. Myna túrine qarap qyryqtan asqan dep aıta almaısyń. Oǵan ilese aqsańdaı júrgen Shyntemirdiń boıy sál alasa. Kúbir-kúbir etip Bıbige sóılep keledi.

— Baıǵus, Shyntemir, — dedi kúlkisinen tyıylǵan Grıshka. Jekjatyna aıanysh bildirip, kúrsine sóıledi. — Birde iship otyrǵanymyzda óziniń bir aýyr ókinishi týraly jylap aıtyp edi maǵan. Soǵystan jaraly bop oralǵan soń, kolhozda predsedatel bolyp istegen kórinedi. Osy myna senderdiń kolhozdaryńda. Sen árıne keıinnen keldiń, bilmeısiń ǵoı. Mine, sol kezde Bıbi brıgadır bop isteıdi eken. (Onyń Bıbi ekenin jańa ǵana bilip otyrmyn ǵoı). Kúıeýi soǵysta habar-osharsyz ketken jesir kelinshek. Nesin aıtasyń qylshyldap turǵan kezi deıdi. Ózi sulý bopty. Sulý bolǵany qazir de kórinip tur ǵoı. Iá, sonymen qysqasyn aıtsam, Shyntemir men Bıbiniń arasynda hıkaıa bastalypty. Bul dúnıede joq, ǵajap hıkaıa!.. Shyntemirdiń túrin ózin kórip tursyń ǵoı. Dál osyǵan áıel qyzyǵar dep oılaısyń ba? Al Bıbi bolsa qyzyǵypty. Shyntemirge sózdi ózi aıtypty. Iá, ıá, bir ótirigi joq, munyń... Ekeýi — predsedatel men brıgadır eki atqa minip, pishen aralap kele jatpaı ma. Bir shóbi qalyń oıpańdaý jerge kelgende Bıbi: «Attan túselikshi» deıdi. Eshteńe oıynda joq Shyntemir maqul kórip, attan túsedi. «Otyraıyq ta» deıdi Bıbi. Jaraıdy dep Shyntemir otyrady. Sóıtip biraz otyrady, ekeýinde de ún joq. Ábden shydamy taýsylǵan Bıbi: «Áı, Shyntemir, sen óziń erkekpisiń, nemene?» — deıdi. Shyntemir kelinshek oıyn sonda baryp bir-aq uǵady. Odan arǵysy belgili ǵoı... Kóp uzamaı bul ekeýiniń ara qatynasyn Shyntemirdiń áıeli sezip qoıyp, shataq salady. Ol kezde Shyntemirdiń alty balasy bar, tyrp ete me. Aqyry aýdannan sógis alyp, basqa jaqqa jumysqa aýysady. Sóıtip, bul ekeýiniń hıkaıasy da támam bolady. Ekiqabat bop qalǵan Bıbi bosanyp, Qanataıdy tabady... Qalaı, aıanyshty ma! Shyntemir qazir kórshi kolhozda, sıyr baǵady. Óziniń týǵan aýlyna kóship kelmek bolǵan eken, áıeli kónbepti. Bıbiden áli de qyzǵanatyn kórinedi. Baıǵus Shyntemir, iship alsa boldy jylaıdy. «Kreshke, meniń ókinishim aýyr ǵoı» deıdi ylǵı.

Grıshka áńgimesin aıaqtaǵan kezde, unnyń tartylyp bolǵanyn aıtyp Qanataı da daýystady. Dıirmenniń kóleńkesinde áńgimelesip otyrǵan Bıbi men Shyntemir de oryndarynan turdy.

Biz óz unymyzdy tıep ap, onan Shyntemirdiń unyn tıestik. Sóıtip, dıirmennen eki arba bop, birge shyqtyq. Qanataı ekeýmiz ózimizdiń arbadamyz. Bıbi Shyntemirdiń arbasyna otyrdy. Qanataı sheshesiniń bul qylyǵyn jaqtyrmaı, burtıyp qaldy. Óshin jıren attan alǵandaı shyqpyrtyp qoıady. Jıren attyń tuıaǵy malta tastarǵa «kúrt-kúrt» etip, jelip keledi. Ázirge yldıǵa qaraı júktiń aýyrlyǵyn sezer emes. Shyntemirdiń kók bıesi de qalar emes. Qulaǵyn jymyryp ap entelep keledi. Taǵasy malta tasqa «shaq-shuq» etedi.

Saıdy keýlep kelgen jol, kúrt órge qaraı burylyp buralań bop ketti. Qanataı ekeýmiz arbadan sekirip túsip, qatarlasa jaıaý júrdik. Keıin burylyp qaraǵam: Shyntemir de arbadan tústi, qozǵala bergen Bıbini túsirgen joq. Arbanyń bir qanatynan ustap, qaptaldasa aqsańdaı júrip keledi. Bıbi ekeýiniń áńgimesi taýsylar emes. Ózi órge qaraı aqsańdaı basyp kele jatyp ta, damylsyz sóılep keledi. Birde ekeýi qosyla kúledi, birde qabaqtary túıilip, keskinderi júdep qalady. Bir kúlgenderinde, artyna burylǵan Qanataı.

— Bir myljyń ǵoı, myna aqsaq, — dep kúńk ete tústi. Qara ter bolǵan attar, buralań jolda jıi aıaldap, dem alyp júrip keledi. Yshqynǵan saıyn búıirleri solq-solq etedi. Júgi aýyr arbalar árbir burylysta syqyrlap, kúl-parshasy shyǵa jazdaıdy.

Bir burylysta biz edáýir ozyńqyrap kettik te, artqy arba tasada kórinbeı qaldy. Ústirtteý jerge shyǵyp toqtadyq. Kútip biraz turdyq. Biraq Shyntemirdiń arbasy shyǵar emes. Qanataıdyń mazasy ketti. Tyqyrshyp ári-beri turdy da «qazir keledi ǵoı» degenime qulaq aspastan keıin júrdi. Sálden keıin:

— A, ný! — dep buıyra aıqaılaǵan daýsy estildi.

Kóp uzamaı, qulaǵyn jymyra, qos búıirin soǵa entigip kók bıe kórindi, onan arba ústinde otyrǵan Shyntemir de, jaıaýlaǵan Bıbi kórindi. Qanataı kók bıeni shyqpyrta soǵyp keledi eken. Taıap kelgende kórdim. Shyntemir aqsaq aıaǵyn qushaqtap otyr. Shalbarynyń balaǵynan shyp-shyp shyqqan qan bilinip tur.

— Súrinip jyǵylǵanym, — dedi, qınalyp qabaǵyn shytty. Dál osy mezette men Qanataıdyń shynymen oǵan qatty uqsaıtynyn baıqadym. Aýyrsyna tistenedi. Dereý aǵash aıaǵyn sheship, sholaq aıaǵynyń qanaǵan jerin tańyp tastadyq.

— Meni esirkegenshe arbaǵa óziń otyrmaı, — dep Bıbi de keıip tur.

Munan ári jol bir sydyrǵy tegis edi. Endi bárimiz de arbaǵa otyrdyq. Nege ekenin bilmeımin, Qanataı Shyntemirdiń arbasyn alǵa ótkizdi. Endi ekeýmiz jıren attyń basyn bos jiberip qoıyp, qaptardyń ústine etpetimizden jaıǵasa jattyq. Shyntemir kók bıeni búlkil jeliske salyp qoıdy da, Bıbi ekeýi taǵy da taýsylmas áńgimelerine kiristi. Bulary Qanataıǵa taǵy da unamady.

— Túý, myljyńyn-aı, myna aqsaqtyń, —dep jol shetine túkirip jiberdi. — Apama ne bolǵanyn bilmeımin, qarashy, ana aqsaqtyń aýzyna kirip keterdeı bop otyr,- dedi yza bolyp.

Arbalar shıq-shıq etip keledi. Kúzgi qara jol shańy aspanǵa shyǵyp, burq-burq etip jatyr. Kún eńkeıgen. Tańerteńgisindeı qyzdyrmaıdy. Aspan da munartyp tur. Tóńirek bir túrli kóńilsiz jabyrqaý tartyp, uıqyny keltiredi. Kózim jumylyp, maýjyraı bastadym. Birazǵa deıin terisine syımaı tyrsyldap jatqan Qanataı, betin qapqa basy uıyqtap ketti.

Az júrdik pe, kóp júrdik pe, bilmeımin. Arbalar toqtady. Bıbi ózimizdiń arbaǵa kep otyrdy.

— Oıbuı, balalar uıyqtap qapty ǵoı, — dedi. Aqsaq aıaǵy syqyr-syqyr etip Shyntemir de keldi. Biraq arbaǵa otyrǵan joq.

— Al, sóıtip ne isteımin men? — dedi jalynyshty únmen.

— Ne isteısiń, — dedi Bıbi kúle sóılep, — qudaı qosqan Bátımań bar ǵoı. Tizeńdi soǵan ýqalatyp qoıyp, tıysh jat endi.

— Qudaı qosqan deısiń, á. Bir kezde tastaımyn degenimde sen emes pe ediń, balalaryń óskenshe shyda degen. Sodan beri shydap kelem ǵoı. Balalar tegis ósip, bet-betterimen úı bop ketti. Endi sol Bátımanyń maǵan taǵar kinási joq tipti.

Bıbi oıly ún qatty.

— Ol kezde men seniń alty birdeı shıetteı balalaryńdy aıadym. Kóz jasynan qoryqtym... Al qazir bolsa... Ibaı-aý, endi kártaıǵanymyzda Qozy men Baıanǵa uqsaǵanymyz el-jurttan uıat bop júrmeı me, — dedi.

Shyntemir tosylyp qaldy.

— Meniń basymdy áýrege salǵan óziń emes pe ediń, — dedi sálden keıin kiná artqandaı. — Áıtpese seni úsh uıyqtasam oıyma aldym ba.

Bıbi kúldi.

— Jesirlik ne istetpeıdi, — dedi aqyryn ǵana.

Ekeýi bir-birine únsiz, qadala qarap biraz turdy. Attar aýyzdyqtaryn kútir-kútir etkizip, pysqyryp qoıady. Qanataı tátti uıqyda qoryldap jatyr.

— Al taǵy da jolyǵysqansha, — dep Bıbi delbeni qaqty. Arba shıqyldap júrip ketti. Uzap baryp artyna buryldy da, attyń basyn tartty.

— Áı, Shyntemir! — dedi jaıymen daýystap. Endi birde shık-shık etip janymyzǵa Shyntemirdiń arbasy kep toqtady.

— Myna kúshigińdi bir ıiskep qalsańshy.

Taǵy da aǵash aıaǵy syqyr-syqyr etip, Shyntemir arbamyzǵa taqap keldi.

— Ózi jatbaýyr ma, qalaı, — dep qoıdy.

— Qanataı, áı Qanataı! — dep Bıbi balasyn oıata bastady. Káne, altynym, basyńdy kótershi, myna aǵańmen... Qa-a-nat!

— Oıbaı-aı, — dep Qanataı baj ete qaldy.

— Ne bop qaldy, altynym? Qolyń uıyp qap pa?

— Joq aýyrady.

— Nege?

— Jazý jazdyrǵam.

— Jazýy nesi?

Qanataı uıqysyn ashyp, jeńin túrdi.

— Altynym-aý, mynaýyń ne, kim istedi? — dep Bıbi qorqyp ketti. — Qap, beker istegen, ekensiń balam. Qap...

Biraz únsizdikten keıin Bıbi qatqyl únmen:

— Ulym esiń kirip qaldy... Seniń ákeń Jansultan emes, myna Shyntemir, — dedi.

Qanataı da teris qaraǵan kúıde qatqyl únmen:

— Meniń ákem soǵysta ólgen, — dedi.

Anasy birdeńe aıtýǵa oqtala berip edi, tyńdaǵysy kelmegen Qanataı meni julqyp-julqyp qaldy. Men basymdy kóterdim. Ulynyń qıastyǵyna shytynyp qalǵan Bıbi, al jolyń bolsyn degendeı Shyntemirge ym qaqty. Ol qınala basyp baryp, arbasyna otyrdy.

— Al, Bıbi, kóriskenshe...

— Jolyń bolsyn, Shyneke, — dedi Bıbi jumsaq únmen.

Eki arba eki jaqqa aıyrylyp júrip ketti. Shyntemirdiń arbasy dóń asyp ketkenshe Bıbi artyna eki-úsh burylyp qarady. Júzi muńaıyp, kóńilsiz qaldy. Qanataı bezergen kúıde býlyǵyp otyrdy da qoıdy. Dál aýylǵa kire beriste, qaptyń ústine betin basyp sulyq qulady da:

— Meniń ákem soǵysta ólgen, apa-a... — dep ókirip jylap jiberdi.

---