InfoHub Logo

Qazaq halqymyzdyń júregine erekshe de qymbat tulǵalardyń biri – Mirjaqyp Dýlatov. Bul kisiniń bar ǵumyry óz halqymen tyǵyz baılanysty. Endi osy arada bir ǵana jaıtqa toqtalar bolsaq, Mirjaqyp Dýlatovtyń «Jastarǵa» atty óleńi men «Bizdiń maqsatymyz» atty maqalasyna baılanysty, «Serke» gazeti qazaqtyń azattyq qozǵalysynyń alǵashqy sáýlesindeı jylt etip, jabylyp qalǵan edi. 

Jalpy alǵanda, «Bizdiń maqsatymyz» maqalasynyń tereń astaryn tolqyp qaraıtyn bolsaq, onyń saıası astary men máni birden kózge túsedi. Adamzat tarıhynda qıly-qıamet oqıǵalarmen, dúbirli damý úrdisimen erekshe oryn alǵan HH ǵasyrdyń basy qashannan eńbegi esh, tuzy sor qazaq halqy úshin de aýyr kezeń bolǵany belgili. Chınovnıkter kedeı qazaqtardy uryp-soǵyp, mal-múlkin, sýy men keń-shuraıly jerin tartyp, oıyna kelgenin istedi. Osyndaı talma tusta, sheshýshi sátte ult úshin qyzmet kórsetýdiń úzdik úlgisin kórsetken altyn aıdarly arystarymyzdyń qatarynda belgili aqyn-jýrnalıst Mirjaqyp Dýlatovtyń esimi bul kúnde zor iltıpatpen atalady. «Bizdiń maqsatymyz» maqalasynda qazaq jerin qalaı bolsa solaı tartyp alyp jatqan, qazaqtardy shoqyndyrýdy kózdegen patsha saıasatynyń jyrtqysh júzin, osyndaı qıyn jaǵdaılardyń ashyq sebepterin ashyp, saralap, otarlyq saıasatty áshkereleıdi. Árıne, bul sebep sol kezdegi «Serke» gazetiniń jabylýyna tikeleı basty sebep bolady. 

Endi maqalanyń demokratıalyq baǵytyna kóz júgirteıik. Men avtor óz maqalasy arqyly halqynyń kózin ashyp, sanasyn oıatqysy keldi degen oıdamyn. Maqalany oqı otyra, halyqtyń aýyr jaǵdaıyn bar júregińmen sezgendeı bolasyń. Sol kezdiń sýyq ádiletsizdigi janyńa muzdaı batady. «Qazaǵym meniń, elim meniń!», degen sózderimen shyndyqty ortaǵa salyp, jastardyń namysyn alǵa jyljytýǵa, ««Bizdiń» maqsatymyz» dep, birlesip kúsh qosýǵa bel býdy. Mirjaqyp Dýlatov sondaı-aq «Oıan, Qazaq!», «Jastarǵa» sekildi óleńderinde de osy baǵytyn ustanady. 

Mundaı jaǵdaı aqyrynda sol kezderi kózderi ashylyp, sana-sezimderi oıanyp, halqynyń qamyn oılaı bastaǵan qazaqtyń aldyńǵy qatarly azamattaryna qozǵaý saldy. Olar adamzattyń tarıhı kóshinen qaltarys qalǵan eldiń ústige shyǵar jolyn izdestire bastaıdy. Bastapqyda taza aǵartýshylyq sarynda týyndap, sonan soń saıası sıpat alǵan bul qozǵalys patshalyq bıliktiń saıası daǵdarysqa ushyraýy, eldiń túrli aımaqtarynda, túrki tildes halyqtar arasynda ult-azattyq, lıberaldyq-demokratıalyq turǵydaǵy sana-sezimniń oıana bastaýy jaǵdaıynda anyq áleýmettik qubylys dárejesinde boı kórsetti.

---