InfoHub Logo

«Ustazdyq joly,bala tárbıeleý - ardaqty is»-dep marqum ákem aıtyp edi.»Aıtýshy aqyldy bolsa,tyńdaýshy dana bolady» -dep halqymyz taýyp-aq aıtqandaı, mine búgingi tańda ákemniń sózin máńgi esime saqtap,muǵalim mamandyǵyn tańdap ter tókkenime de bıyl 4 jyl 3aı ótipti.

Ustaz bolý – júrektiń batyrlyǵy,

Ustaz bolý – sezimniń aqyldyǵy.

Ustaz bolý – minezdiń kún shýaǵy,

Ustaz bolý – adamnyń asyldyǵy,- degen Ǵafý Kaıyrbekovtyń óleń joldaryn oqyǵanda, men ózimdi baqytty sezinemin. Ustaz bolǵanymdy maqtan etemin. Sebebi ustaz bolý-jaı mamandyq emes. Qıyny men jeńili, qyzyǵy men qýanyshy mol bolǵan eńbek jolyndaǵy pedagogıkalyq ustanymym — únemi jańalyqqa umtylyp, aldyńǵy qatardan kóriný jáne ár oqýshynyń boıynan jaqsylyq taýyp,bulaqtyń kózin ashý arqyly bıik maqsattarǵa jeteleý.

Ómirdegi kóp mamandyqtardyń ishinde jan-jaqty bilimdilikti, ıkemdilikti, sheberlikti, erekshe shákirtjandylyqty, meıirimdilikti qajet etetin mamandyq ta – ustazdyq mamandyq. Olaı deıtinim, muǵalimniń beıimdiligi, daryndylyǵy kóbinese oqýshynyń taǵdyryn sheshedi. Muǵalim únemi shákirtterimen qarym-qatynasta bolyp,  úırensem, bilsem, tanyssam degen bala armany men onyń syrly taǵdyryna basshylyq etýdi moınyna alǵan maman. «Ustazsyz shákirt tul, shákirtsiz ustaz tul... » deıdi qazaq. Bul basqa emes, dál ustaz, muǵalim mamandyǵyna arnap aıtylǵan maqal.

Jaqsy ustaz — bul qaı kezde de eń aldymen kásibı deńgeıi joǵary, ıntellektýaldyq, shyǵarmashyl áleýeti mol tulǵa. Ol oqytýdyń jańa tehnologıalaryn ómirge endirýge daıyn, oqý-tárbıe isine shynaıy janashyrlyq tanytatyn qoǵamnyń eń ozyq bóliginiń biri dep esepteımin jáne solaı bolýy tıis.Men úshin bul mindetterdi oryndaý,oqýshynyń pánge degen qyzyǵýshylyǵyn arttyrý úshin oqytýdyń kóptegen ádis-tásilderin alyp,óz tájirıbemde qoldanýdamyn. Qaı zamannyń bolsyn muǵalimi  uly Abaıdyń «Ustazdyq etken jalyqpas, úıretýden balaǵa» degenindeı, ustaz degen kıeli mamandyqtyń syryn ashyp, óz eńbegimniń jemisin kórip, mektep degen úlken ózende júzip kele jatqanym — óz mamandyǵymdy sheksiz súıýden bolar. Birinshiden — óz mamandyǵymdy súıdim, sol óz mamandyǵymdy súıý arqyly óz shákirtterimniń júregine jol taýyp, olardy óz isterime súısindire bildim. Bul muǵalim úshin úlken qýanysh.

Búgingi shákirt erteńgi kúngi ár túrli salanyń maman ıesi. Árıne,tıimdi de oryndy paıdalanylǵan balalardyń  daralyq  qasıetteri óz ustazdaryn baqytqa jetkizedi. Baqyttyń úlkeni árbir bala ózin-ózi durys taný. Bizde bolashaqta oqýshylarymyzdyń qıaǵa qanat qaǵyp,eliniń sanaly azamaty bolǵanyn qalaımyz. Endeshe búgingi bilim men bilik básekeles zamanda ulandarymyzdyń bıikten kórinýine kúndelikti isimizdegi jańashyldyǵymyz arqyly, jan-jaqty bergen bilimimiz ben tárbıemiz arqyly qol jetkizemiz.

Adam ómirinde mamandyq tańdaýdan qatelespeý kerek degen sóz bar ǵoı, ol sóz shyn aıtylǵan eken. Jumysyńdy ańsap barý, qýanyp qaıtý,ózińniń búgingi kúni ne bitirgenińdi,endi erteńgi kúnge qandaı josparlaryń baryn bilý, bul mamandyǵyn súıgen adamnyń isi.

Aqtóbe oblysy Hromtaý aýdany
"Qarlaý bastaýysh mektebi" KMM-niń muǵalimi
Mýhambetkalıev Dýman

---