InfoHub Logo

Kóptegen adamdar ózderiniń kásibı maqsattary týraly oılanbaı turyp jumys izdeı bastaıdy. Alaıda jumys izdeýdi bastamas buryn, sizdiń mansabyńyzǵa qandaı talaptar qoıylatyndyǵyn anyqtap alǵanyńyz abzal. Bul sizdiń myqty jáne álsiz jaqtaryńyzǵa obektıvti túrde qaraýdy qajet etedi. Mysaly, siz ózińizge uıymdastyrýshylyq, adamdardy jumyldyrý sekildi jumys qajet dep oılaýyńyz múmkin, biraq muny sizdiń myqty tusyńyz dep qabyldaýǵa bolmaıdy. Ekinshiden, siz úırený jańa qadamdar jasaýǵa kómektesetinin umytpaýyńyz kerek. Sonymen qatar, taǵy bir eskeretin jaıt — sizdiń uzaq merzimdi maqsattaryńyzǵa jetý úshin, sizdiń qyzyǵýshylyǵyńyzdy qanaǵattandyrmaıtyn jumystardy oryndaýǵa qanshalyqty daıyn ekenińizdi tekserińiz. Ózińizdiń minez-qulqyńyzǵa baǵa bere otyryp, qoıylatyn kásibı talaptardyń naqty jıyntyǵyn jasap shyǵarýǵa tyrysyńyz. Atap aıtqanda, birneshe mańyzdy suraqtarǵa jaýap berińiz. Siz qandaı ómir súrgińiz keledi? Mysaly, aýylda nemese qalada ómir súrgińiz keledi me? Bos ýaqyt sizge qanshalyqty kerek? Siz úshin jalaqy mańyzdy ma? Siz turaqtylyqty unatasyz ba álde jańashyldyqqa jaqynsyz ba? Qandaı jumys jasaǵyńyz keledi? Mysaly, siz jalǵyz nemese ujymmen jumys jasaǵandy unatasyz ba? Túrli is-sharalarynyń uıymdastyrýshysy bolǵyńyz keledi me? Óz talaptaryńyzdy qanaǵattandyratyndaı, mamandyq tańdaýda tómende kórsetilgen basty tarmaqtardy negizge alýǵa tyrysyńyz: 

Jumys jasaý stılin baǵalańyz. Sizdiń boıyńyzda jeke jumys jasaýǵa qabilettilik, lıderlik qasıetter basymyraq pa nemese sizge belgili bir qurylymmen júıelengen jumys ortasy men qadaǵalaýshy qajet pe? Sizdiń jumys jasaý stılińiz sizge jalǵyz jumys isteı alatynyńyzdy nemese ujymnyń bir bóligi bola alatyndyǵyńyzdy túsinýge kómektesedi.

Óz talanttaryńyzdy bilińiz. Eger sizdiń qandaı da bir hobbıińiz nemese qabiletińiz bolsa, ony óz jumysyńyzben baılanystyrýǵa tyrysyńyz. Sonda sizge jumysyńyz nátıjeli jáne ári jaǵymdy bola alady.

Qarjylyq maqsattar qoıyńyz. Ózińizdiń qarjylyq qajettilikterińizdi naqty anyqtańyz jáne qarjylyq maqsattaryńyzdy qanaǵattandyra alatyn jumysty tańdańyz.

Siz tańdaǵan mamandyqty meńgerý, ıaǵnı oqý úshin qansha qarajat ketetinin anyqtańyz jáne siz úshin qoljetimdiligin zertteńiz. Shákirtaqy, baıqaýlar men olımpıadalar syndy múmkindikterdi qarastyryńyz.

Ózińizdiń qyzyǵýshylyqtaryńyzǵa sáıkes mamandyqtar tizimin jasańyz. Sonymen qatar daıyndaǵan tizimdi barynsha qysqartýǵa da tyrysyńyz. Siz muny sizge sáıkes keletin tarmaqtar boıynsha jasaýyńyz kerek. Durys sheshim qabyldaý úshin ata-analaryńyzben keńesip alǵanyńyz da jón.

Mansap jolyndaǵy maqsattaryńyz ben mindetterińizge sholý jasap shyǵyńyz jáne tek sol maqsattarmen shektelmeńiz — sizdiń jumys jasaý josparyńyz sizge jańa nárseni úırenýge, bilýge septigin tıgizýi qajet.

Shonaeva Dáýletbıke

---