InfoHub Logo

Mamandyq tańdaý adam ómirindegi eń mańyzdy sheshimderdiń biri bolyp tabylady. Bul belgili bir tulǵanyń minez-qulqynyń, umtylysynyń, tileginiń jáne ómir saltynyń aınasy. Ádette, bul mańyzdy sheshim jas kezde, mektepte oqyp júrgen shaqta qabyldanady.

Osyndaı mańyzdy sheshim qabyldaý ońaı emes. Keıbir jaǵdaılarda jasóspirimderge ata-ananyń jaǵynan qysym kórsetilýi de múmkin. Keıde shyn máninde ne qalaıtynyńdy túsiný óte qıyn. Sonymen mamandyqty qalaı tańdaý kerek?

1. Beıimdiligińizdi eskerińiz

Bastapqyda óz qyzyǵýshylyǵyńyzǵa nazar aýdaryńyz. Nemen aınalysqyńyz keledi? Qandaı pánder unaıdy? Bos ýaqytyńyzda nemen aınalysqandy jaqsy kóresiz? Adamdarmen, ásirese, bógde kisilermen ońaı til tabysa alasyz ba? Kóptegen nárse sizdiń beıimdiligińizge baılanysty.

2. Durys sheshim qabyldaýǵa tyrysyńyz

Bul tańdaýdy óz betińizshe jasaý kerektigin sanaly túrde uǵynyńyz. Ata-analardyń, dostaryńyzdyń yqpalynan shyǵa almaı qalmańyz. Olar ne aıtsa da, bul – tek sizdiń taǵdyryńyz.

3. Mamandyq tańdaýda ózińizdiń fızıkalyq erekshelikterińizdi, kemshilikterińizdi eskerińiz.

Densaýlyq jaǵdaılaryna baılanysty tyıym salynǵan mamandyqtar bolýy múmkin. Mundaı mamandyqtar kóp emes, olarǵa negizinde qandaı da bir fızıologıalyq júıege uzaq aýyrtpalyqty talap etetin mamandyqtar jatady. Kompúter mamandary kózderine, al ushqyshtar – júrekterine aýyrtpalyq túsiredi.

4.  Mamandyq tańdaǵanda onyń bolashaǵyn da eskergenińiz jón. Sebebi, tehnologıa tez damyp kele jatyr, sonyń saldarynan búgin kerek mamandyq erteń qajetsiz bolyp ta qalýy múmkin. Sol sebepti bolashaǵy bar salany tańdaýǵa keńes beremin.

5.  Mamandardyń kómegine júginińiz

Eger sizde kúmán týyndasa, mamandardyń kómegin paıdalanyńyz. Bul rette ne mektep psıhologymen, psıhologıalyq keńse mamanymen aqyldasýǵa bolady.

Álemde ózi qalamaıtyn mamandyq ıesi bolyp júrgen qanshama adam bar, óz jumysyn janymen súıip isteıtin adamdardyń da sany az emes. Mamandyq tańdaýdan jańylmaı, óz ómirińizdiń bir kirpishin durys qalaýyńyzǵa tilektespin.

Dıana Kospanova

---