InfoHub Logo

On bir jyldyq bilimderin arqalap, mektep túlekteri atanýǵa taıap qalǵan shaqta bolashaq talapkerlerdiń sharq uryp izdeıtini úlken ómirge jeteleıtin joǵarǵy oqý orny, al kúndiz-túni oılaıtyny sol bir úsh áriptiń basyn qurap turǵan “Ubt” atty sheshýshi emtıhan. Budan bólek kez-kelgen jetkinshektiń beımaza oılarynyń sebepshisine aınalǵan mańyzdy jaıttardyń biri mamandyq tańdaý máselesi emeı nemene? Ómirden óz ornymdy qalaı tabamyn? Qandaı mamandyq ıesi bolýǵa laıyqpyn? Keleshekte osy joldy tańdaǵanyma ókinip qalmaımyn ba? sekildi san saýal kimdi de bolsyn oılandyrary sózsiz. Búgingi kúni jas jetkinshektiń kóńilin kirbiń shalyp, boıyn úreı men ýaıym aralas oqys sezim bıleýde. Árkimniń ańsary elimizdiń aldyńǵy qatarly joǵarǵy oqý ornyna aýǵanymen, bul múmkindikke baǵy janyp, bilimi synnan súrinbeı ótken túlekterdiń ǵana qol jetkizetindigine daý joq. Al shektik baldyń irgesinnen attap óte almaǵan jasóspirimderdiń endigi jaıy ne bolmaq? Bas saýǵalap kolejder men kásiptik tehnıkýmdardyń bosaǵasyn jaǵalamaq pa?

Almaty oblysy Talǵar aýdanyndaǵy Sáken Seıfýllın atyndaǵy №2 orta mekteptiń on birinshi synyp oqýshysynyń ata-anasy Kýlıpbaeva Raıhan atalǵan oqý oshaǵyn bitirgeli jatqan jas túlekterdiń mamandyq tańdaýǵa kelgende “esh nárseni nazardan tys qaldyrmaýy kerek” dep jetkizedi.

-Eń bastysy júregi qalap, kóńili unatqan mamandyq ıesi bolý degen oıdamyn. Árbir “jetkinshektiń ómirindegi jaýapkershilikke toly mańyzdy kezeńderdiń biri “Men kimmin? ”Óz aldyma qandaı tulǵamyn? ”Qaı sala mamany bolý arqyly elimniń ekonomıkalyq turǵydan damýyna ózindik úlesimdi qosa alamyn? ”ispettes suraqtardyń týyndaýynnan bastalmaq. Árıne bul qorqynysh pen qobaljýdy emes, alda bolar ózgeristerge qatysty nyq senim men berik ustam qalyptastyrý kerek. Olaı bolmaǵan jaǵdaıda jasóspirimniń emosıonaldy kúızeliske ushyraýy ǵajap emes. Ata-ana retinde balama qandaı bastama bolmasyn barynsha qoldaý kórsetip, jańa belesterdi baǵyndyrý jolynda óz tarapymnan aqyl-keńes berip turamyn. Jetkinshekti qanattandyrý, onyń boıyn úmit sáýlesi men jarqyn bolashaqqa qatysty pozıtıvti oılarǵa toltyrý bizdiń qolymyzda. Eger jas túlektiń tańdaýy joǵarǵy oqý ornynda ár jyl saıyn bólinetin grantqa emes, ańsaǵan armanyna tikeleı baılanysty bolsa bul birden-bir durys sheshim bolmaq”, deıdi ata-ana.

Ulttyq biryńǵaı testileýdiń upaıy mektep bitirýshilerdiń JOO-ǵa túsýdegi kórsetkishterine áser eterine eshkimniń talasy joq. Jan qınalmaı jumys bitpes, talap qylmaı muratqa jetpes demekshi halqymyzdan qalǵan ósıet bar. Bilim synaǵyna bar biliktiligi men jyl boıy jumsaǵan kúsh-jigeriniń nátıjeli jemisin alyp shyqqan túlekterdiń arasynan eń joǵary upaıdy enshilegen jasóspirim de bar. Mysaly:”Ulttyq biryńǵaı testileýdiń alǵashqy kúni respýblıka boıynsha 39 talapker 130 baldan joǵary jınaǵan. Biraq olardyń ishinen oq boıy ozyq shyqqan bir aýyldyń balasy bar. Oǵan maksımaldy balǵa eki-aq upaı jetpeı qaldy. Túrkistan oblysyndaǵy Tespe aýylynyń mektep túlegi Abzal Ábdimanap UBT-dan 138 bal jınap shyqty”, dep habarlaıdy Sputnik Qazaqstan.

Ne degenmen eń aqyrǵy sheshim jas mektep bitirýshilerdiń júrektegi únimen, oı tarazysynan shamalaǵan tańdaýymen aıqyndalary anyq. Sonda da keleshegine erkin jospar jasaǵan árbir túlek áste bir nárseni esten shyǵarmaǵany jón. Ol Temirqazyqtaı juldyzdy túni oń baǵytqa jeteleıtin asqaq arman, ári ony júzege asyrýǵa múmkindik beretin batyl áreket.

Almaty oblysy, Talǵar aýdany, Sáken Seıfýllın atyndaǵy №2 orta mekteptiń 11 synyp oqýshysy Aǵybaeva Arýjan Orazqyzy

---