Birjola ólgen eski ómir tumaýratqan,
Birjola óshken eski jurt qylaý japqan.
«Áýlıe tas» atanǵan jerge kelip,
Basyn jańa qazaqtar qurap jatqan...
Asqar-asqar taýlardyń arasyna
Aýyl qonyp, úı turyp, jarasýda.
Jerden ósip shyqqandaı japa-jalǵyz,
Alyn tas tur degenge nanasyń ba?
Atamzaman...
Atanyp «arýaq qonǵan»...
Alyp jartas máńgilik salmaqtanǵan.
Judyryqtaı qart zerger tasty qashap,
Bir tal masaq músinin salmaq bolǵan.
Bir tal masaq músinin salmaq bolǵan,
Tas aǵashpen aınala sharbaqtalǵan.
Judyryqtaı qart zerger qulan uryp,
Qulyp múshege oralyp, sańlaqtanǵan.
-Múmkin emes!..
-Múmkin! Múmkin! - dedi.
Qaıyspady qart zerger irkilmedi.
Tirshiligin toqyǵan órmekshideı,
Alyp tastyń tósinde búlkildedi...
Ólsheýsiz óte berdi aı, antalar,
Alǵan isi bolmady aıaqtalar.
Qaljyraǵan qart zerger, qara bala,
Qara tasty qashady, oıatty olar.
Al jyldar óte berdi, óte berdi,
Alyptan masaq jasaý beker edi...
Ákesi men balasyn alaıda bir
Qudiret kúsh kún saıyn jeteledi.
Kún saıyn kún batyryp, tańdy atyrdy,
Kún saıyn jan aýyrtty, qan qatyrdy.
Masaq joq.
Alyp tasta bujyr-bujyr,
Ár jerinde ánsheıin tańba turdy.
Talaı jyldar jóneldi, joǵaltyldy,
Talaı qashaý taýsyldy, jańartyldy.
Tylsym tasty tynshytpaı, tyqyldatyp,
Adam turdy, berilmeı Adam turdy.
-Kesh kirdi ǵoı, qaıtaıyq, balam, endi,
Netken túnek, neǵylǵan jaman edi,-
Dedi de shal, shaǵyrmaq shańqaı túste
Kirpik qaqpaı tesilip qala berdi.
-Kesh kirdi ǵoı?! -
Balasy jalt qarady,
Qarady, jamandyqqa attamady.
O, sumdyq!
Qos janary.... qos janary...
Qaldyrypty zergerdi, qart babany.
Shańqaı tús.
Bala úreıli, tańdanady,
Soqyr deýge qımaıdy, arlanady,
Eki qoly erbeńdep, qaıran keýde
Attaı almaı adym jer qarmanady.
-Neǵyldy, Ata, kórmeısiń be?!
-Neǵýshy edi, balam-aý, kórmeısiń be?
Basym meniń barady, kelmeısiń be...
Masaq...
Máńgi masaq...
Alyp masaq...
Qor qylǵany-aı táńirimniń qalypqa cap.
Úh!
Janym-aı!..
Adamnyń qudiretin
Túleı tastyń aldynda anyqtasaq...
Tyńda, balam...
Orynda...
Ósıetim...
Ótinemin...
Bolmaǵyn bas ıetin!..
Tas ta bolsa tanysyp kónetin, bilsin,
Sezsin, kórsin Adamnyń qasıetin.
Urpaǵyńa aıt.
Ákeńnen bastalǵasyn,
Ári qaraı jalǵansyn. tastalmasyn.
«Áýlıe kep túnegen oryn» emes,
Alyp bir masaq bolsyn, tas bolmasyn!
Urpaǵyńa aıt aıaqsyz tastalmasyn..
Ótken jyldar óshken joq, sanada tur,
Talaı saýyt tozdyrdy dala batyr.
Jalǵyz qoldy qart adam tasqa qaraı,
Jalǵyz ulyn jetektep bara jatyr.
Ózi tirep turǵandaı aspan, Aıdy,
Baıaǵydaı tákappar tas qaraıdy.
Jalǵyz qoldy múgedek qart zerger júr
Amanatyn atanyń tastamaıdy.
Alyp bir masaq jasaý armany edi,
Úshinshi úrpaq ata isin jalǵady endi.
Ekinshi urpaq bir qolyn oq otady,
Bir qolyn tynyshtyqqa jalǵa berdi.
Taǵy, mine, kún shyǵyp, tań atýda,
Taǵy, mine, jańa ómir, jańa tulǵa.
Tylsym tasty tilgilep, masaq jasap,
Úshinshi urpaq saýsaǵyn qanatýda.
...Asqar-asqar taýlardyń arasynda,
Shaǵyn aýyl, shat turmys,barasyń ba?
Aspanmenen tildesken alyp tasty
Áli kúnge qashaýda...
Nanasyń ba?
Alyp dán bas alady,
Alyp tasqa jan bitip, jasarady.
Adam menen eńbektiń sımvolyndaı
Alyp masaq qalaıda jasalady.
Zergerdiń qudiretine senemin.
Urpaqtyń adaldyǵyna senemin...

---