Qalaqtaı ediń,
Qabirinde qalaq tur.
Týǵanyńdy, ólgenińdi sanap qur.
Seniń ańqaý qulaǵyńdaı qalqıyp,
Qyr basynan qala jaqqa qarap tur.
Qyzym meniń,
Gúlim meniń,
Aıaýlym!
Jatyr molań jotasyndaı qoıannys
Qulpytastyń quny maǵan bes tıyn,
Biraq taspen qalaı janshyp qoıarmyn?!
Qoıman, botam.
Keregi ne kók tastyń.
Qysta aq qar, jazda shalǵyn shóp bassyn.
Óziń kelgen maı aıynda aq nóser,
Aǵyl-tegil bizben birge joqtassyn.
Keregi joq kók tastyń
Buldanba, júrek, buldanba!
Jıylyp dosyń turǵanda,
Jıyryp seni jentekter,
Jymysqy qaıǵy-muń bar ma,
Buldanba, júrek, buldanba!
Qyzyǵy taıyp, qyzy ólgen,
Jalǵyz-aq sen be bul mańda?!
Qys qaıtyp, jasyl kóktemde.
Qyzǵaldaq óser qyrlarda.
Ókinish aıtyp ótkenge,
Buldanba, júrek, buldanba!
Sary altyn deıdi sabyr is,
Tepkileı berme, ókpemdi.
Qyz degen qurǵyr saǵynysh,
Saǵyntý úshin ketken-di.
Buldanba, júrek, buldanba!

---