InfoHub Logo

Ana tilimizde sóılegen reseılik jastardyń beınerolıgi ǵalamtordy sharlap, kópshiliktiń nazaryn ózine aýdarǵan edi. Sóıtsek bul stýdentter qazaq tilin ekinshi shet tili retinde tańdaǵan jáne qazir osy pán boıynsha sońǵy emtıhandaryn tapsyryp jatyr eken, dep habarlady www.24.kz.

«24 KZ» arnasynyń tilshisi Dana Nurjannyń aıtýynsha, bular Máskeý memlekettik lıngvısıkalyq ýnıversıtetiniń stýdentteri eken. Bıyl mundaǵy 10 birdeı túlek qolyna qazaq tiliniń mamany degen dıplom almaq. Al nege degen suraqqa atalǵan mamandarǵa suranys joǵary degen ýáj aıtyldy. Iaǵnı olar Qorǵanys nemese Syrtqy ister mınıstrligine, bolmasa iri bıznes kompanıalarǵa jumysqa tura alady.

«Buryn barlyǵy tek Eýropa memleketteriniń tilin meńgerýge qushtar boldy. Qazir TMD elderiniń tilderine degen suranys artyp keledi. Óıtkeni zamannyń aǵymy jáne naryqtyń talaby sondaı. Sondyqtan aptasyna 8 saǵatty taza qazaq tiline arnaımyz», - dedi TMD elderi tilderin úıretý ortalyǵy dırektorynyń orynbasary Vladımır Konev.

Bul stýdentterdiń barlyǵy derlik qazaq tilin asqaq armandaryna qol sozý úshin tańdaǵanyn aıtady. Buǵan qosa, olar taǵy 2 shet tilin meńgerip shyǵady.

Elızaveta Osıpova, ýnıversıtet túlegi:

 - Qazirgi ýaqytta Qazaqstan men Reseı baılanystary óte tyǵyz. Mysaly Eýrazıa ekonomıkalyk odaǵy óte tez damyp jatyr.

Ksenıa Bykova, ýnıversıtet túlegi:

- Memlekettik salalardan basqa eki el arasynda bıznes baılanysy da bar. Men oılaımyn, sol sebepten qurylymdardyń óte úlken bolashaǵy bar.

Sonymen qatar bul stýdentter tájirıbeni Qazaqstanda, naqtyraq aısaq, Astanadaǵy Eýrazıa ulttyq ýnıversıtetinde ótken eken.

Anastasıa Tkach, ýnıversıtet túlegi:

- Bizdiń tobymyzdan birinshi kúnnen osy tilge ǵashyq boldyq. Óıtkeni bul óte ádemi til.

Anastasıa Reshetnıkova, ýnıversıtet túlegi:

- Birinshiden, qazaq halqynyń ashyqtyǵy jáne meıirimdiligi bizge qatty áser etti. Árıne, Qazaqstan óte ásem el.

Bul stýdentter osy mejemen toqtap qalmaq emes. Aldaǵy jyldary magıstratýraǵa tapsyryp, qazaq tilindegi bilimin odan saıyn jetildirmek. 

 

---