InfoHub Logo

Qazaqstannyń standartızasıa ınstıtýty bas dırektorynyń birinshi orynbasary Erkejan Ámirxanovanyń aıtýynsha, búginde Qazaqstanda mektep formasy boıynsha naqty bir standarttar joq. Sol sebepti jańa standarttardy daıyndaý týraly sheshim qabyldandy.

«Endi, keńester kezinde standarttar boldy. Biraq sodan beri ózimizdiń jeke standarttarymyz jasalmady. Máselen, keńester ókimeti ýaqytynda sıntetıkadan tigilgen kıim atymen bolǵan joq. Qazir ondaı matanyń túr-túri satylady. Sondyqtan biz osy ispetti matanyń balalar densaýlyǵyna keri áserin tıgizetini jaıynda aıtyp, jańa standarttarda atalǵan máseleni kórsetýdi kózdep otyrmyz. Sebebi mektep oqýshysy formany tańerteńnen bastap keshke deıin kıip júredi. Al keıbir matalar teri aýrýlaryn týǵyzýy ábden múmkin. Sondyqtan jańa standarttarda osy máselege basymdyq beriledi. Biraq bir nárseni túsinip alý qajet, mektep formasynyń túr-turpaty, ıa bolmasa, túsi boıynsha shekteýler qoıylmaıdy. Matanyń sapasy boıynsha naqty bir talaptar bolady degen jospar bar. Negizgi maqsat - balanyń densaýlyǵyn saqtaý», - deıdi E.Ámirxanova.

Mamannyń aıtýynsha, búginde mektep formasyn tigip jatqan óndirister barshylyq. Atalǵan taýardy syrttan tasyp júrgender de az emes. Degenmen, formanyń qaýipsizdigi men sapasyn tekserip jatqan eshkim joq. Sol sebepti mektep formasy boıynsha naqty bir standarttardy engizý týraly sheshim qabyldandy. Qazirgi kezde daıyndyq jumystary júrgizilip jatyr. Kelesi jyldan bastap jańa standarttardy qoldanysqa engizý josparlanǵan. Oǵan deıin kásipkerler men texnologtardy jınap, matanyń quramy anyqtalady. Al jańa standarttar engizilgen kúnnen bastap, mektep formasymen aınalysatyn kásipkerler matanyń sapasyna basa nazar aýdarýy shart.

Derekkóz: inform.kz

---