Mektep jáne kolej pedagogteriniń, balabaqsha tárbıeshileriniń jalaqysy taǵy 25%-ǵa ósti
2022 jyldyń 1 qańtarynan bastap Prezıdent Qasym-Jomart Toqaevtyń tapsyrmasy boıynsha balabaqsha tárbıeshileriniń, mektepter men kolejderdiń, sondaı-aq qosymsha bilim berý júıesi pedagogteriniń jalaqysy taǵy 25 paıyzǵa ulǵaıdy.
Bul jaıynda QR Bilim jáne ǵylym mınıstrliginiń baspasóz qyzmeti málim etti.
Esterińizge sala ketsek, Memleket basshysynyń tikeleı tapsyrmasymen pedagogterdiń jalaqysy 2020 jyldyń qańtarynda 25 jáne 2021 jyldyń qańtarynda taǵy 25 paıyzǵa ósken bolatyn. Osylaısha, muǵalimderdiń jalaqysy eki ese ulǵaıady.
«Biz muǵalimderdiń jalaqysyn kóterýdiń sózsiz oń áserin kórip otyrmyz. Bizdiń kásibimizge –pedagog kásibine qazirgi tańda úzdikter keledi. Pedagogıkalyq mamandyqqa túsetinderdiń UBT ortasha baly aıtarlyqtaı ósti jáne «Altyn belgi» ıegerleriniń sany birneshe esege kóbeıdi. Muǵalimderdiń eńbekaqysyn arttyrý el bolashaǵyna úlken ınvestısıa bolyp tabylady. Bıylǵy jyldyń qańtar aıynan bastap Prezıdent Q.K. Toqaev tapsyrǵandaı, barlyq pedagogter joǵary jalaqy alatyn bolady. Sonymen qatar, jalaqymen birge muǵalimder alatyn qosymsha tólemder de artady. Bul – biliktilik sanaty úshin (laýazymdyq jalaqynyń 30%-nan 50%-na deıin), magıstr dárejesi úshin, aǵylshyn tilinde pánderdi júrgizgeni, dápterler teksergeni, synyp jetekshiligi jáne tálimgerlik úshin tólenetin ústemeaqylar», – dep atap ótti birinshi vıse-mınıstr Sholpan Karınova.
Aıta keteıik, pedagogterdiń jalaqysy oqý júktemesine, bilim deńgeıine, biliktiliginiń, jumys ótiliniń, magıstr dárejesiniń bolýyna jáne basqa da qosymsha aqylarǵa baılanysty esepteledi.
Esterińizge sala ketsek, 2021 jyly magıstrlik dáreje úshin ústemaqy alýshylar sheńberi keńeıtildi. Atap aıtqanda, ádistemelik kabınetterdiń ádiskerlerine magıstr dárejesi úshin qosymsha aqy belgilendi. Sondaı-aq, dene shynyqtyrý muǵalimderine sabaqtan tys ýaqytta qosymsha sport seksıalaryn ótkizgeni úshin tólemder qarastyrylǵan.
Sondaı-aq, osy jyldyń 1 qańtarynan bastap Memleket basshysynyń tapsyrmasyn oryndaý aıasynda kitaphanashylar, býhgalterler, zerthanashylar jáne bilim berý uıymdarynyń basqa da qyzmetkerleriniń jalaqysy ósti. 2022 jyldyń qańtar aıynda olardyń jalaqysy orta eseppen alǵanda 20 paıyzǵa artady jáne ary qaraı jyl saıyn Prezıdent joldaýy sheńberinde ósip otyratyn bolady.
You Might Also Like
-
Itmuryn — lımonǵa qaraǵanda 60 ese artyq S dárýmenine ıe ekendigin bilesiz be?
-
Túrik qaǵanatynyń joǵarǵy memlekettik soty «Jarǵy» dep atalady. Derekterge kóz júgirtsek, túrikterde zań shyǵarýshy organ bolǵandyǵyn baıqaýǵa bolady. Jarǵylardyń basty mindeti — tó...
