InfoHub Logo

Dárigerler oqýshylar arasynda semizdik dertiniń jaıylyp bara jatqanyna alańdaýly. Bul kórsetkish qazir 15 paıyzǵa jetip qalǵan.

Mundaı derekti S. Asfendıarov atyndaǵy QazUMÝ ambýlatorıalyq-polıklınıkalyq kafedrasynyń asıstenti Vıktor Shın keltirdi.

Maman búgin №11 emhana uıymdastyrǵan densaýlyq sabaǵy barysynda oqýshylarǵa kórneki qural men qaı sýsyn zıandy ekendigin, qaısysynda qant kóp ekendigin kórsetti.

«Durys tamaqtanbaýdyń saldarynan oqýshylardyń arasynda túrli aýrýlar beleń alyp barady. Atap aıtqanda, holesıstıt, pankreatıt, gastrıt, asqazan jarasy aýrýy eresek oqýshylardy aıtpaǵanda, bastaýysh synyp oqýshylary arasynda da kezdesedi. Balalardyń aǵzasynda durys tamaqtanbaýdan zat almasý prosesi buzylǵan. Sondyqtan, semizdik 1990 jyldary 5 paıyz bolsa, qazir 15 paıyzǵa artty», - dedi Vıktor Shın.

Onyń aıtýynsha, qazirgi tańda mektepterdegi tamaqtaný rasıonynda reglament joq. Mektep býfetterinde túrli konservantty sýsyndar, túrli shokoladtar men qýyrylǵan bálishter, chıpsy, kırıeshkı sıaqty paıdasy az taǵamdar kedergisiz satylady.

Dáriger oqýshynyń rasıony qandaı bolý kerektigin aıtty.

«Tańǵy asqa bala jeńil ári sińimdi tamaq, botqa, sút ishýi tıis. Túski asqa jeńil qorytylatyn kotlet, asylǵan et, teftel, pisken jumyrtqa, qanty az nan jeýi tıis. Taǵamdy shaımen ishpegen jón. Shaı tamaqtyń paıdasyn joıady. Túste jemis-jıdek, sút ónimderin ishýi tıis. Tańǵy asqa kúndik rasıonnyń 35 paıyzy, túski asqa 40 paıyzy, túste 10 paıyzy, keshki asqa 15 paıyzy ishilýi tıis», - dedi maman.

Aıta ketý kerek, búgin №11 emhana ujymy № 87 mektepte «Densaýlyq sabaǵyn» ótkizdi.

1-synyp oqýshylary mektep aldynda jol erejelerimen tanyssa, joǵarǵy synyptar durys tamaqtaný jolymen tanysty.

---