Mektepke dırektor taǵaıyndaýda Prezıdent kadr rezerviniń múshelerine basymdyq beriledi
Prezıdent kadr rezervi men «Bolashaq» baǵdarlamasynyń qatysýshylaryna bilim berý uıymynyń dırektoryn tańdaýda basymdyq berilmek. Bul týraly QR BǴM mektepke deıingi jáne orta bilim komıtetiniń pedagogıkalyq kadrlar men kórsetilgen memlekettik qyzmetti monıtorıńteý jumystary jónindegi basqarma basshysy Aıman Dúısembaeva málim etti.
«Qazirgi tańda «Pedagog mártebesi týraly» zań aıasynda birqatar normatıvti-quqyqtyq qujattardy qabyldap jatyrmyz. Sonyń biri – bilim berý uıymdarynyń basshylaryn taǵaıyndaý erejesi. Bul jerde mektepke deıingiden bastap tolyǵymen tehnıkalyq-kásiptik bilim berý júıesine deıingi bilim berý uıymdarynyń basshylaryn taǵaıyndaý erejesi jasalyp jatyr. Qazirgi tańda bul ereje memlekettik jáne jergilikti atqarýshy organdarmen kelisilýde. Jergilikti atqarýshy organnyń barlyǵynan kelisim aldyq», - dedi Aıman Dúısembaeva Bilim jáne ǵylym mınıstrliginiń elordada ótip jatqan jınalysynda.
Basqarma basshysynyń aıtýynsha, burynǵy tártip boıynsha tek talaptar qoıylyp, dırektorlar taǵaıyndalyp kelgen. Al qazir mektepke deıingi uıymdar úshin - bir bólek, arnaıy mamandandyrylǵan mektepter úshin - bir bólek, tehnıkalyq jáne kásiptik bilim uıymdarynda - bir bólek talaptar bekitilgeli otyr. Iaǵnı, ár uıymnyń ózindik talaptary bar.
«Biraq bárine qatysty bir talap bar - úmitker 72 saǵattyq menejment kýrsynan mindetti túrde ótýi tıis. Sonymen qatar onyń birinshi, joǵary nemese jańa deńgeıdegi sarapshy, zertteýshi jáne sheber sanattarynyń bolýy mindetti. Bul úrdis tórt kezeńmen ótkiziledi. «Bolashaq» baǵdarlamasy jáne Prezıdent kadr rezervinen kelgen úmitkerlerdi birden tórtinshi kezeńge jiberýdi qarastyryp otyrmyz. Odan bólek keıingi kezde qamqorshylyq keńesten ótpegen jaǵdaıda biz úmitkerdi oblystyq bilim basqarmasyna usynamyz», - dedi ol.
Basqarma basshysy bilim uıymdaryna basshylyq etý úshin dırektor ótýi tıis tórt kezeńdi atap berdi.
«Birinshisi – úmitkerdiń qujattaryn qaraý, ekinshi kezeń – qamqorshylyq keńesine jiberý, úshinshisi – oblystyq bilim basqarmasynan kelisim alý, tórtinshi kezeń – jergilikti jerdegi konkýrstyq komısıaǵa barý. Sonymen qatar pedagogıka jáne psıhologıa boıynsha test jalpy 120 suraqtan turady. Sonyń árbir baǵytynan mindetti túrde 50 paıyzdyq upaı jınaý kerek. Sonda ǵana konkýrsqa jiberiledi», - dedi ol.
You Might Also Like
-
Qazaqstan Respýblıkasynyń bas sanıtar dárigeri Jandarbek Bekshın koronavırýs ınfeksıasynan saqtaný úshin qashyqtan oqytý júıesin engizý máselesine qatysty pikir bildirdi.
-
Qazaqstan ustazdarynyń ulttyq biliktilik testileýi osy jyldyń sáýir aıynda bastalady. Bul týraly Bilim jáne ǵylym mınıstrliginiń aparattyq otyrysynda vıse-mınıstr Sholpan Karınova málim etti.
