InfoHub Logo

Mektepte smartfonǵa tyıym salý máselesin ata-analarmen birge talqylaý kerek. Bul týraly búgin Ortalyq komýnıkasıalar qyzmetindegi baspasóz qyzmetinde Bilim jáne ǵylym vıse-mınıstri Elmıra Sýhanberdıeva málim etti.

«Smartfon máselesinde ár mektep men uıym ózindik jeke sheshim qabyldaıdy. Osy baǵytta ata-analarmen birlesip talqylaý júrgizý kerek. Negizinde kóp ata-analar balalarynyń mektepke nemese úıge qalaı jetkenin baıqap otyrǵysy keledi. Sońǵy býyndy tehnologıalar boıynsha tıisti habarlama taratý da keıbir mektepterde jasaqtalmaǵan. Sondyqtan búginde smartfonǵa tyıym salamyz dep aıta almaımyz», - dedi ol.

Aıta keteıik, osyǵan deıin smartfondar balalardyń oqý úlgerimine teris áser etýi múmkin degen pikirler aıtylǵan bolatyn.

Budan buryn habarlanǵandaı, QR Bilim jáne ǵylym mınıstrliginiń Balalardyń quqyqtaryn qorǵaý komıteti tóraǵasynyń orynbasary Mánshúk Ábdikárim mektepterde smartfondarǵa tyıym salý taqyryby ata-analar jınalystarynda talqylanatynyn atap ótti.

 «Meniń oıymsha, Bas prokýratýranyń usynysy zertteletin bolady. Búginde biz úshin eń basty ról qoǵamdastyqtyń quzyrynda, sondyqtan atalǵan máseleler mektepterde ata-analar jınalystarynda talqylanyp, tıisti usynystar zerdelenedi. Biryńǵaı pikir nátıjesinde naqty sharalar qabyldanady», - dedi ol. 

M. Ábdikárimniń paıymynsha, sabaq barysynda smartfondardy paıdalaný durys emes. «Alaıda, búgin paıdalaný durys emes dep aıtqannan keıin, erteńnen bastap tyıym salynady degendi bildirmeıdi. Bul taqyryp mindetti túrde oqýshylar men ata-analardyń, mekteptiń pedagogıkalyq ujymy arasynda talqyǵa salynýy qajet», - dedi ol.

Esterińizge sala keteıik, mektepterde smartfondarǵa tyıym salý máselesin  óńirlerdegi birneshe prokýrorlar, sondaı-aq Shymkent qalasynyń ákimi kótergen bolatyn. Osy rette mektepterde smartfondar bilim berý úderisine keri áser etip otyrǵandyǵy, sonymen qatar smartfondar arqyly ınternet-keńistikke qadaǵalaýsyz qoljetimdik balalardyń rýhanı damýyna teris yqpal tıgizip jatqandyǵy aıtylýda.  

---