InfoHub Logo

Dıspýt joǵary synyptardyń arasynda ótkeli jatyr edi. Kenet aǵaılary synyptaǵy eki uldy osy ótkeli jatqan dıspýtqa daıyndaı bastady. Muny jáne synyptyń taǵy bir ulyn. Bularǵa qazaq tili men ádebıetinen sabaq beretin osy aǵaılary bulardyń 5"A" synybyna jyldyń basynda jetekshi bolyp taǵaıyndalǵan edi. Endi óziniń synybynyń eki ulyn joǵary synyptar arasynda ótkeli jatqan dıspýtqa qatystyryp kórmek.

Mádenıet Úıinde ótkeli jatqan dıspýttyń jalpy taqyryby "Dostyq degenimiz ne?" dep atalatyn. İs-sharany mekteptiń aǵa pıoner vojatyıy uıymdastyryp, ótkizgeli jatyr edi. Mekteptegi osy aǵa pıoner vojatyıǵa úlken baǵa beriletin.

Aǵa pıoner vojatyıdyń drýjına jıyndaryndaǵy orny da oqýshylar úshin eleýli edi. Mundaı drýjına jıyndary otrád soveti predsedatelderiniń raport tapsyrýymen bastalady. Raport drýjına sovetiniń predsedateline tapsyrylady. Al drýjına sovetiniń predsedateli - joǵary synyptyń oqýshy qyzy. Óz raportynyń mátini tómendegishe bolyp keletin:

Joldas drýjına sovetiniń predsedateli.
№3 Mánshúk Mámetova atyndaǵy otrád pıonerleri drýjına jıynyna galstýk, znachokterimen daıyn.
Raport berildi súıikti galstýkke.

Osy sát drýjına sovetiniń predsedateli "Raport qabyldandy" der edi.

Barlyq otrád soveti predsedatelderinen raport qabyldap alǵannan keıin, drýjına sovetiniń predsedateli jıynǵa ámirli ún qatady: "Drýjına, túzelińder!"

Sonan soń drýjına sovetiniń predsedateli aǵa pıoner vojatyıǵa óziniń raportyn tapsyrady:

Joldas aǵa pıoner vojatyı.
Iýrıı Alekseevıch Gagarın atyndaǵy drýjına pıonerleri drýjına jıynyna galstýk, znachokterimen daıyn.
Raport berildi súıikti galstýkke.

Alańdy jańǵyryqtyrǵan kerneıdiń úni, oǵan qosarlana ilesken barabannyń daýsy, sonymen birge alańǵa týdyń ákelinýi jıynnyń saltanatty ajaryn kirgize túser edi.

Dıspýtqa ózimen birge daıyndalyp júrgen ul bularǵa bastaýysh synypta kelip qosylǵan. Ózderi ózge jaqtan kóship kelgen edi. Keıin qaıta kóship ketti. Bularmen birge mektep bitirgen joq. Qaǵilez, pysyq, kózinde oty bar, sabaqqa da zeıinsiz emes. Osy bala byltyr bular 4-synyp oqyp júrgenderinde mekteptegi syıly ustaz, ózderiniń sol kezdegi synyp jetekshilerimen 1 sáýir kúnine oraı, qaljyńdasqany bar. Basqa balalardyń buǵan batyly bara qoımas edi. 1 sáýirdi balalar aldaý kúni dep ataıtyn. Muny úlkender de biledi.

Álgi bala da synypqa keshigińkirep keldi de, synypqa jańa ǵana kirip, matematıka sabaǵyn bastaǵaly jatqan apaıǵa: "Apaı, sizdi dırektor aǵaı shaqyryp jatyr", - dedi. Apaı synyptan shyǵyp ketti de, sonan soń synypqa qaıta kirgeninde óziniń oqýshysyna qarap kúlimsirep "Búgin 1 sáýir kúni eken ǵoı" dep kúldi. Apaı biraq bul úshin óziniń shákirtine renjigen joq.

Osy 4-synypta synyp jetekshi bolatyn apaılary men 5-synyptaǵy synyp jetekshi bolatyn aǵaılary - ekeýi de osy mekteptiń tańdaýly ustazdary edi. Apaılary 5-synypta bularǵa: "Men senderdiń synyp jetekshilikterińdi endi aǵaılaryńa berip jatyrmyn. Biraq bul men senderge synyp jetekshi emes degen sóz emes. Men senderge ekinshi synyp jetekshileriń de bola beremin" degen edi. Rasynda da, bul ustaz synypqa únemi jaqyn bolyp, óziniń ustazdyq aqyl-keńesin berip otyrdy.

Synyp jetekshi aǵaılary óziniń shákirti eki uldy alda bolǵaly turǵan dıspýtqa birshama kúnder boıy tıanaqty túrde daıyndaǵan edi. Al bir kúni bular mádenıet Úıiniń aýlasynda otyryp, bastalǵaly jatqan dıspýtqa ustazdarymen birge daıyndyqtaryn taǵy da bir pysyqtap otyrdy.

Aǵaılarynyń oıy áý bastan solaı boldy ma, álde jeme-jemge kelgende sheshimin ózgertip jiberdi me, áıteýir, mádenıet Úıiniń aýlasynda otyrǵanda bularǵa: "Ekeýińniń bireýiń sóıleısińder", - dedi. Sonan soń buǵan qarap: "Sen sóıleısiń", - dedi. Osy kezde 5-synyptyń oqýshysy 5-synyptyń oqýshysyn arqadan qaǵyp dem bergeni qyzyq boldy: "Jaqsylap sóılep shyq!"

Minber sahna ústine qoıylǵan edi. Al sahnanyń aldynda aǵa pıoner vojatyı osy dıspýtty júrgizip turdy. Aǵaıy buǵan aıtqan: "Qandaı nársege bolmasyn, aldyn ala ázirlik jumystary júrgizilmeı bolmaıdy. Biraq sen eshbir ázirliksiz, tosynnan shyǵyp sóılep jatyrǵan adamdaı sóıle. Ár sóziń tabıǵı shyǵatyn bolsyn".

Minberde turǵan adamǵa zaldaǵy kópshiliktiń tıgizer áseri kóp bolady. Biraq 5-synyptyqtardyń da arqa tusynda turǵan kúsh bar edi. Ol - synyptyń jetekshisi.

Ornyna otyrǵannan keıin 5-synyptyń oqýshysy 5-synyptyń oqýshysynyń qolyn qysty: "Jaqsy sóılediń!"

Osy bir joǵary synyptar arasyndaǵy dıspýtqa aǵaılary 5-synypta oqıtyn bulardy ákep qatystyryp júrýi oqýshylarym sóılep úırene bersin degen ustazdyq maqsatynan týǵan oıy edi.

Keıin muǵalimdik jumysty bastaǵanda ózi de joǵary synyptyqtarǵa "Jastar jáne mádenıet" degen taqyrypta dıspýt uıymdastyrdy. Sebebi mekteptegi mundaı jıyndardyń oqýshynyń kópshilik aldynda oıyn jetkizip, pikir aıta bilýi úshin de mańyzdylyǵy asa zor edi.

---