InfoHub Logo

"Qymbatty meniń mektep bitirýshi qurby-qurdastarym!
Minekı, biz úshin qońyraýdyń sıqyrly da sazdy áýeni sońǵy ret án salmaq. Jáne ol án barlyǵymyzdy sonymen birge ómir dep atalatyn alyp kúrejoldyń tóskeıine shyǵaryp salar. Bizdi qanshama jyl oqytyp, bilim bergen, tárbıe bergen aıaýly ana mektebimiz ben qurmetti ustazdarymyz ishteı tilektestik bildirip, sát sapar tilep qalar..."

Bul - Qojabaqy aýylyndaǵy №25 mekteptiń bir kezdegi 48-túlekteriniń aýyl sahnasyndaǵy ózderiniń sońǵy qońyraý saltanatynda ustazdary men mektep bitirýshi qurby-qurdastaryna arnap sóılegen sózi edi. Sonan soń olar sońǵy qońyraý jaıly óleń oqydy:

Uǵyndy ma arlylyǵyn, tátti ómirdiń nar júgin,
Aq bantıkpen qoshtasady qyz bala da dál búgin.
Búr jardy ma keýdesinde asaý sezim elim dep,
Adýyndaý erke uldyń da murty qapty tebindep...

Qojabaqy mektebiniń 48-túlekteri mektepti 1997 jyly tamamdaǵan. Olardyń sońǵy qońyraý saltanaty "Bala shaqtan - bolashaqqa" degen atpen ótkizildi.

Qazirgi Qazaly aýdany Qojabaqy aýylyndaǵy №25 orta mektep óziniń orta mektep retindegi tarıhyn 1947-48 oqý jylynan bastaıdy. Mektep bul kezde Maksım Gorkıı mektebi bolyp atalǵan edi. Sebebi qazirgi Qojabaqy aýyly burynǵy tarıhynda Maksım Gorkıı atyndaǵy kolhoz, sonan soń Engels atyndaǵy sovhoz bolyp ataldy. Al qazirgi Qojabaqy aýylyna irgeles jatqan Arandy aýyly burynǵy tarıhynda Jdanov atyndaǵy kolhoz bolyp atalsa, keıinnen Engels atyndaǵy keńshardyń bólimshesi boldy. Bul eki aýyl da qazirgi ýaqytta Arandy aýyldyq okrýgine qaraıdy. Ortalyǵy - Qojabaqy aýyly.

"Qurmetti mektep bitirýshi túlek! Siz úshin osynaý kún aıshyqty da aıdyndy, merekeli de mereıli, tabysty da tolǵamdy kúnge aınalyp otyr. Óıtkeni Siz dál osynaý kúni ózińizdiń qımas bir mekenińizge aınalǵan, baldáýren shaqtyń balaýsa qyzyǵyn ótkizgen, sóıtip boıyńyzǵa bilikti bilim men tálimdi tárbıe jınaǵan mektep anańyzdan túlep ushqaly tursyz. Sizge endigi sátte óz ómir aıdynyńyzdy qalap alýǵa týra keledi..."

Bul - mektep dırektory orynbasarynyń №25 mekteptiń 49-túlekterine mektep ákimshiliginiń atynan arnalǵan quttyqtaý sózi. 49-túlekter mektepti 1998 jyly tamamdaǵan.

1958 jyly kolhozdardy irilendirý saıasatyna baılanysty Maksım Gorkıı atyndaǵy kolhoz ben Jdanov atyndaǵy kolhoz birigip, ortalyq Jdanov kolhozyna kóshiriledi. Osy kezde mektep te Jdanov aýylyna kóshiriledi. Oblystyq atqarý komıtetiniń 1958 j. 21 qańtardaǵy qarary boıynsha osy kezde mektepke Jdanov ataýy beriledi. Mektep osy kezden bastap №25 Jdanov atyndaǵy mektep bolyp ataldy.

"Elimniń keńeıgende keregesi,
Jalǵansyn jaqsylyqqa óner keshi.
Barshaǵa, aǵaıyn-jurt, bolsyn qutty
Mekteptiń elý jyldyq merekesi!

Jalǵasyn jaqsylyqqa tilekterin,
Toltyryp qýanyshqa júrekterin.
Elýge kelgen shaqta ana mektep
Ushyrdy elýinshi túlekterin.

Bilimniń boıǵa shýaq tókken jeri,
Jyr bolyp jazylady ótkenderi.
Tarıhqa tańbalandy mektebimniń
Elý qys, elýinshi kóktemderi".

Bul - mekteptiń 1999 jylǵy 50-túlekteriniń sózi. Osy jylǵy sáýirde "Qojabaqy mektebiniń válsi" áni ómirge kelgen edi. 50-túlekter mektepten 1999 jyly qanat qaqty.

1965 j. qarashanyń 1-inde mektep Jdanovtan Engels atyndaǵy keńsharǵa kóshiriledi. 1989 jyly mektepten Jdanov ataýy alyndy. Sodan beri mektep №25 orta mektebi dep atalady.

"Daryndy ǵalymdy
San jyldar mektebi saǵyndy.
Eliniń tiregi,
Mekteptiń túlegi
Bul kúnde el-jurtqa tanyldy..."

Bul - "Alystan ańsaı búgin jetken dara, túlegin qarsy aldy mektep ana" degen atpen mektepte maýsym aıynda ótkizilgen Almatydan kelgen qonaq, mekteptiń 1957 jylǵy túlegi, medısına ǵylymdarynyń doktory, profesor Begaly Áıtpembetovpen 60 jasqa tolǵan kezdesý sátindegi oryndalǵan arnaý ánniń sózi. Bul kezdesý 1999 jyly ótkizilgen.

Orta mektep qurylǵannan keıin óz tarıhyndaǵy óziniń alǵashqy túlekterin ushyra bastady. 1954 jyly mektepten alǵashqy medal ıegeri ushyp shyqty. Dál osy jyly mektepti 16 túlek bitirse, sol túlekterdiń ishinen Ábı Dáýletkerimov mektepti kúmis medalǵa bitirip shyqqan edi. 1955 jyly mekteptiń tuńǵysh altyn medal ıegeri ushyp shyqty. Osy jyly mektep bitirgen 26 túlektiń ishinen Alpysbaı Qaramoldaev mektepti altyn medalǵa bitirip shyqsa, al mekteptiń taǵy bir túlegi Almas Jamanbaev mektepti osy jyly kúmis medalǵa bitirdi. Bul kezeńde mektepti mektep dırektory Bakeshov Qojabaı basqarǵan.

"Bolashaqtyń juldyzy
Qolyn bulǵap únemi,
Ushty uıadan ul-qyzy -
Mektebiniń túlegi.

Sezim, sezim júrekten
Kóz jasy bop tamady.
Balalyq shaq túlekpen
Qosh aıtysyp qalady..."

Bul - mekteptiń 51-túlekteriniń sońǵy qońyraý saltanatynda oryndaǵan mektep bitirýshiler válsi ániniń sózi. 51-túlekter mektepti 2000 jyly bitirdi.

"Eldiń bir salty qashannan -
Ónermen baǵy janǵan jer.
Tósinen ushqan túlektiń
Armany bıik bolǵan jer.
Ulaǵattyń úlgisin
Mektebi jıyp alǵan jer.
Sarqylmas bilim baılyǵy -
Tálim men tanym qonǵan jer..."

Bul - Syrdyń maqamyna salynyp aıtylatyn mekteptiń jyr-termesiniń sózi. Mektep 1997-98 oqý jylynda 50 jasqa tolyp turǵan edi. Osyǵan oraı, 1998 jyly qyrkúıekte jazyldy.

---