InfoHub Logo

Kez kelgen el, kez kelgen ult óz bolashaǵyn óskeleń urpaǵymen baılanystyryp otyrady. Halqym bylaı deıdi: «Gúl óz jerinde ǵana – gúl, adam óz otanynda ǵana – adam». Al meniń Otanym – Qazaqstan! Bul – ulan baıtaq dala, beıbit el. Týǵan jeri, Otanynyń qadirin ár adam árqalaı túsinetin shyǵar. Men óz kezegimde, Otanymdy qadir tutamyn, men úshin týǵan jer qadiri dúnıedegi eń uly degen nársemen par-par. Óıtkeni, ol – aıalap, álpeshtep ósirgen anam, ákem, bilim jolyna jetelep kelgen ustazdarym, qorshaǵan týystarym men qurdastarym dúnıege kelgen jer. Ata-babalarymyz osy jerdi bolashaq urpaq úshin jyldar, ǵasyrlar boıy qan-terin tógip, sońǵy demi qalǵansha kúresip, móldir kóziniń qarashyǵyndaı saqtap keldi. Endigi kezek, jastardyń, ıaǵnı, bizdiń qolymyzda.

“Otan úshin otqa tús – kúımeısiń” degen Baýyrjan Momyshuly. Al bizdiń halqymyzda atamekendi ardaqtaý sezimi tereń dep oılaımyn. Joǵaryda aıtyp ketkendeı, ata-babalarymyz eli úshin janyn da, baryn da aıamaǵan. Halqymyzdyń osy qasıeti janymyzǵa ana sútimen tarap, ana tilimen daryp, aq nanymen bekýi tıis. Týǵan elge, týǵan jerge, týǵan tilge degen ystyq sezimniń úlgisi men úshin osyndaı. Shynymen de, bizdiń halyq úshin Otan ottan da ystyq.

Barlyǵymyzdy kishi kezimizden patrıot bolýǵa tárbıelep keldi. Biz Otanymyz – Qazaqstan Respýblıkasy týraly jıi aıtamyz, onyń jetistikterimen, baı tarıhy men mádenıetimen, qonaqjaı adamdarymen jáne ádemi tabıǵatymen maqtanamyz. Biraq, patrıot bolý degenimiz ne?

Patrıot bolý – tek Otandy súıý ǵana emes, onymen birge ómir súrý: ony qorǵaý, óz elińniń tarıhy men tilin bilý, óz halqyńnyń ádet-ǵuryptary men dástúrlerin saqtaý, óz Otanyńnyń ıgiligi úshin eńbek etý jáne oqý.

Endi «Men óz memleketim úshin ne isteı alar edim?» degen suraq týyndaıdy. Meniń oıymsha, eger synaq saǵaty kelse, onda men myńdaǵan jastar sıaqty onyń shekarasyn jáne onyń táýelsizdigin qorǵaýǵa turamyn, arǵy tekterimiz sekildi sońǵy demim shyqqansha bizdiń bostandyqqa, ómir súrýge, til men ádet-ǵurypqa, memleketimizdiń táýelsizdigine degen quqyǵymyzdy qorǵaımyn.

Al elimniń gúldenýi úshin ne isteı alar edim?  Men ózimniń Otanymnyń gúldenýi úshin adal eńbek etetinimdi bilemin. Otan – barlyǵymyz úshin bir, eger ár adam az bolsa da óz úlesin qosatyn bolsa, biz alǵashqylardyń arasynda birinshi bolamyz, búkil álem meniń elim - Qazaqstan Respýblıkasy týraly biletin bolady!

Bıyl men 11-shi synypty bitirip, Ál-Farabı atyndaǵy Qazaq Ulttyq Ýnıversıtetine, jýrnalısıka mamandyǵyna oqýǵa tústim. Maqsattarym men armandarymnyń teń jartysy osy mamandyqpen tyǵyz baılanysty. Bolashaqta elimizdiń ataqty jýrnalısi bolyp, elimizdiń gúldenip, alǵa jyljýyna úles qossam degen úmitim men ózimniń jeke avtorlyq baǵdarlamamdy ashyp, elimizdi eleń etkizetindeı dúnıe oılap shyǵaratyn josparlarym bar. Bir orynda tura bergen bolmaıdy,  N.Á. Nazarbaev: “Jarqyn bolashaq – jastardyń qolynda” degendeı, bizdiń bolashaq pen elimizdiń bolashaǵy óz qolymyzda. Men jastardy ıgi ister jasaýǵa, ýaqytty zaıa ketirmeı, alǵa jyljýǵa umtyldyrýdy kózdeımin. Iaǵnı, meniń maqsatym – tek qana jýrnalıs bolý emes, elge óz eńbegin sińire biletin, qoǵamǵa kerekti naǵyz kásibı maman ataný. Alda ózim úshin ǵana emes, elim úshin, halqym úshin de qyzmet atqaratyn qalaýly, eleýli jýrnalıs atanamyn degen oı meni búgingi kúni de alǵa qaraı jetelep, yntalandyryp keledi.

Mine, qazirden bastap meniń osyndaı mindetterim bar. Olardy mindetti túrde oryndaýym kerek, óıtkeni paryz sezimi bala kezden qalyptasady.  Men jaqsy oqýǵa, sportpen shuǵyldanýǵa, jarystarǵa qatysýǵa, múmkindiginshe bar yntamdy salyp, qolymnan kelgenniń barlyǵyn isteýge tyrysamyn, óıtkeni, bul meniń mektebime, meniń qalama, meniń aýdanyma, demek, ózim úshin de qajet. Men álemniń kez kelgen buryshynda bizdiń Qazaqstannyń qanshalyqty ádemi, baı jáne qýatty ekenin bilse eken dep armandaımyn.  Bizdiń Otanymyzdyń aty estilmeıtin jerde adamdar bizge tańdanyspen qaraıtyn bolady, óıtkeni biz úlken memlekettiń azamatymyz, biz qazaqstandyqpyz jáne bolashaqqa senimdi qaraımyz!

---