InfoHub Logo

Toqal tamnyń aldynda turǵan keıýana ájim kómkerip, tilim-tilimi shyqqan alaqanymen kúnnen kózin qalqalady. Saýsaqtary jýan, ıkemge kónbeıtin taramys. Ómir boıy qara jumys istegeni, aıanbaı istegeni kórinip tur. Sýalǵan janarymen qara jolǵa demin ishine tartyp telmiredi. Bir nárse qaraıatyn tárizdi. Mal ma, adam ba? Ajyrata alar emes. Ernin jalady. Kezerip tur jarymaǵyr. Tań atqaly shaıdan ózge nár syzbaǵany tústi esine. Aıaǵy qaqsap, ornynan tura almaı qaldy emes pe? Avtobýs keletin ýaqyt bolǵanda dáti shydamady. Turdy. Kún batyp bara jatyr. Ol oramalyn túzep jol jaqqa aıańdady. Qytaıdyń arzanqol oramaly qurǵyrda jylý da joq, sýsyldap túse de beredi. Ol joldyń shetine shyǵyp kózin qaıta kólegeıledi.

— Jut jalmaǵyr, aram qatqyr, qara saıtan, balalardyń bireýi ma desem, sen ekensiń ǵoı, qasqyrǵa jem bolǵyr.

Jolǵa túsip alyp, beıqam kele jatqan Oljabektiń qara tanasy eken. Yzaly kúbirmen keri buryldy. Sol jaq jambasynan tómen aıaǵy syrqyrap áketip bara jatyr. Úı syz ba, álde jas kezinde sán qýyp, jalańash júrip qurtty ma bilmeıdi. Bıyl sýyq úıde qystap shyqty. Úsh myń zeınetaqy nege jetsin? Balalardiki ózderinen artylmaıdy. Áıteýir buǵan jarmaspaı óz kúnderin ózderi kórip júrgenderine shúkirshilik etedi. Úıge kirdi. Syrttan kelgende, úıdegi jaman ıis ásirese qatty seziledi eken.

Dáý de bolsa, Qarataban, senen kelgen pále bul, — dedi ol, tósektiń ústinde úrpıip jatqan mysyqty qaǵyp tastap. Ol jerge “dik” etip túsip, “Ne boldy sonshama?” degen keıippen jaqtyrmaı qarady.

— Kóziń shyqsyn. Kóziń shyqqyr, sorly. Balalar joq. Óstip jalǵyz qalaıyn dep taptym ba bes balany. Ólsem kelip kómýge jarar ma deseńshi, shirikter. Endi qaıteıin. Oı, Alla-aı. Aman bolsyn áıteýir. Qaıteıin.

Tósegine qısaıdy. Qarańǵylyq koıýlana bastaǵan. Úıdiń ishi sýyq. Kóktem shyqqanmen, jer jylyna qoımaǵan kez. Kempir ash bolatyn. Súıekteri de ýdaı ashyp barady. Biraq kári ana tózimdi edi. Kúte biletin.

---