InfoHub Logo

Kishkentaı ǵana qap-qara kúshik bolatyn. İnim ekeýimiz kórshimizdiń korasyna túsip, urlap ákelgenbiz. Ár aıaǵyna bireý aıalap appaq etik kıgizgendeı eken. Atyn Aqtaban qoıdyq. Ol bizdiń úıde qaldy. Erke. Aıaǵyńa oratylyp, sońyńnan qalmaıdy. Kishkentaı ıt júregine qýanysh tolyp, qashan kórseń de arsalańdap júrgeni. Sodan keıin men mektep bitirip, aýyldan kettim. Ol týraly múlde umytqanmyn. Jazǵy demalysqa kelgenimde mamam “Aqtaban qaýyp almasyn. Tómen etektini kórse jyny bar. Aýlaq júr” degen. Aýlada baılanyp jatyr eken. Dáý qap-qara tóbet bolypty. Susty-aq. Aqyryn jaqyndap “Aqtaban” dedim. Quıryǵy qozǵalyp baryp basyldy. Men erkinsip jaqyndaı tústim. Art jaǵymnan jetken sheshem “Oıbaı, jolama. Bir jerińdi julyp alady. Jyndy ǵoı bul” dep shyr-pyry shyqty. Aýyl arasynda áıelderdi qaýyp ábden zárezap qylǵany kórinip tur. Aqtaban tarapynan eshbir jaqtyrmaýshylyq baıqamaǵannan keıin mamamdy zar qaqtyryp qoıyp, qasyna jaqyndap basynan sıpadym. Ol qapqan joq! Tipti shalqasynan túsip, kózin jumyp sıpaı tús degendeı bolady. Apam da ań-tań, men de ań-tań. Kózi endi ashylǵan kúshik kezinde esinde qaldym ba eken álde? “Bizdiń úıdiń adamy ekenińdi ıisińnen tanyǵan ǵoı” deıdi inim masattanyp. “Jaqsy ıt — qut”. Ol bizdiń úıdiń bir múshesine aınaldy. Tek mysyq turaqtatpaıdy. Bas salyp, myljalap óltirip tastaıdy. Ne jyny bar ekenin kim bilsin. Biz mysyqty jaqsy kóremiz. On eki jyl ishinde talaıy ótti ǵoı. Keıbir aqyldysy, amalyn taýyp, aman qalady. Túısigi bos, aqymaqtaýlarynyń ajaly — Aqtaban. Birde aýylǵa barǵanymda, úıdegi Aq mysyqtyń Aqtabandy ábden mazaq qylǵanyna kýá boldym. Qaqpanyń kishkentaı tesiginen kóshege ótip ketip, kerilip tur. Mańǵaz. Uıqyly-oıaý keıipte. Ber jaǵynda yzadan jarylyp keterdeı bolyp Aqtaban júr alasuryp. Tesikten óte almaı qor bolyp júr. Jónimen keter mysyq joq. Uzaq turdy. Múmkin barlyq aǵaıyndarynyń kegin osylaı alǵan shyǵar... Mamam “Osy ıt emes, adam” dep jıi aıtatyn. Aqtaban bárin túsinetin. Úıde qaıǵy bolsa, onyń da unjyrǵasy túsip, tamaqqa tábeti shappaı qalady. Qaladan kelerde árqaısymyzdyń Aqtabanǵa arnaıy bazarlyǵymyz bar. Kózderi. Kózderi baz bir adamnyń kózinen maǵynalyraq, tereńirek edi. Sóılep turatyn. Sol Aqtaban ólip qaldy. On eki jyl júrip, úıdi qoryp, barlyǵymyzdy jaqsy kórip. Baıqus Aqtaban...

---