InfoHub Logo

Árbir jasóspirim erteńi úshin tańdaý jasaıtyn shaqta óz bolashaǵyn belgili bir mamandyqpen baılanystyrady. Jarqyn keleshegin sol tańdaýyna senip tapsyrady, zor úmit kútedi. Biraq mundaǵy basty shart — tańdaýdy durys jasaı bilý. Sebebi jasalǵan árbir durys tańdaý seniń ómirden óz ornyńdy tabýyńa tikeleı septigin tıgizedi. 

Meniń durys dep tapqan, shyn júregim qalaǵan mamandyǵym ol — jýrnalısıka. Jýrnalısıka — qyzyǵy men qıyndyǵy qatar júretin, halyq pen bılik arasyn teńestirýshi jan-jaqty qamtylǵan aýqymdy sala, álem ataýlysynyń tórtinshi bıligi. Iaǵnı halyq pen pýblıka arasyn biriktirýshi altyn kópir. Dál osy aqparat aıdynynyń kásibı jýrnalısi bolý mendegi eń bıik arman. Jalpy meniń túsinigimdegi jýrnalıs qandaı? 

Jýrnalıs — buqaralyq aqparat quraldarynyń basy-qasynda júretin tikeleı ókili. Jurt sanasyna jańa lep berip, pármendi oı túıgizip, túıtkildi máseleniń túıinin sheshý olardyń birden-bir mindeti. Ózekti máseleniń sheshimin taýyp, utymdy usynystar usyný tek jýrnalıske tán qyraǵylyq. Mende osyndaı keremet salanyń kásipqoıy, ótkir qyraǵysy bolǵym keledi. 

Negizine úńiler bolsaq, jýrnalıs bolý meniń bala kúnimnen bastaý alǵan, biregeıligimen baýraǵan asqaq armanym. Sol asqaq armanym búginde ózime qanat bitirýde. 

Mamandyq tańdaýdan durys sheshim qabyldaǵanymdy ishteı sezemin. Al tolyqqandy túrde senimdi bolý úshin, aldyǵa qoıǵan maqsattaryma jetýim qajet. Mendegi ómirlik maqsat - naǵyz shyndyqtyń jarshysy bolý, halyqqa qajetti ári resmı habar taratý. Jýrnalısıka salasynyń ereksheligi de osy - shynaıylyqta. Shyndyq joly qashan da ońaıǵa soqpaǵan. Tipti aqparat maıdanynda shyndyqpen qorǵanýdyń ózi qyraǵy jýrnalıske tán kózsiz erlik.

Jýrnalısıka — búkpesiz shyndyq pen boıamasyz bolmystyń beınesi. Demek shynaıy aqparat taratý bizdegi eń bastapqy mindet. Resmı aqparat pen udaıy damýdyń ortasynda júretin bul mamandyqty tek ózine senimdi, ádildikti tý etken men sıaqty biregeı myqtylar ǵana tańdaıdy.

Qorytyndylaı kele, meniń mamandyǵym — meniń sanaly tańdaýym. Eń bastysy tańdaýdan qatelespeseń bolǵany. Sebebi jasalǵan durys tańdaý seniń jarqyn bolashaǵyńnyń senimdi kepili!

---