InfoHub Logo

Ál-Farabı atyndaǵy Qazaq ulttyq ýnıversıteti – Qazaqstan Respýblıkasynyń jetekshi joǵary oqý orny. 1934 jyly negizi qalanǵan QazUÝ qazirgi tańda joǵary kásibı, tek respýblıkalyq ǵana emes, halyqaralyq bilim berý ortalyǵyna aınalyp otyr. Álemniń úzdik 150 ýnıversıtetiniń qatarynda turǵan, ataqty shyǵys ǵulamasy ál-Farabıdiń atymen atalǵan qasıetti qara shańyraǵymyz – elimizdiń maqtanyshy. Dál osy oqý ornynda bilim alyp, jastyq shaǵymdy QazUÝǵa arnaǵanyma esh ókinbeımin. Osydan bir jyl buryn meniń ómirimde úlken tańdaýlar turdy. Altyn uıa mektebimnen qanat qaǵyp ushqan soń, joǵary oqý ornyn tańdaý múmkindigi týdy. Meniń tańdaýym – QazUÝ. Bul sheshimdi qabyldaýymnyń sebebi kóp. Eń aldymen men oqyp jatqan “mehanıka-matematıka” fakúltetiniń bilim berý salasy Qazaqstandaǵy barlyq ýnıverlerden joǵary deńgeıde  dep esepteımin. Múmkin sondyqtan da shyǵar QazUÝdyń áıgili túlekteri jetkilikti. 16 fakúltette 180 sala boıynsha mamandar daıyndap, tek qana bilim emes stýdenttik ómirge de ulanǵaıyr estelikter syılap jatqan QazUÝ – meniń oń tańdaýym dep esepteımin. Stýdenttik ómirdi qyzyqty ótkizýge úles qosatyn túrli jastar uıymdary, merekelik is-sharalar tolassyz jyly estelikter qaldyrýda.. “Kazgýgrad” atalatyn QazUÝ qalashyǵynda stýdentter úshin barlyq jaǵdaı jasalǵan. Ál-Farabı kitaphanasy - Orta Azıadaǵy joǵary oqý oryndary arasyndaǵy eń úlken kitap qoryna ıe. 1600 adamǵa laıyqtalǵan “Ó.Joldasbekov atyndaǵy stýdentter saraıy” – Almatynyń ekinshi eń úlken saraıy. Medınısalyq kómek kórsetý, kınoteatr, qarjy salasyndaǵy qyzmet kórsetý jáne “Magnum daily” azyq-túlik saýda dúkeni sekildi dúnıelerdi qamtıtyn – “Keremet” stýdentterge qyzmet kórsetý ortalyǵy da stýdentter alysqa arbalamaýǵa úlken múmkindik jasaıdy. Jataqhananyń da qalashyqta ornalasýy bir jaǵynan bilim salasynyń jaqsarýyna, ekinshi jaǵynan ýaqytty tıimdi ári qyzyqty ótkizýine septigin tıgizýde. Bul ýnıversıtet qabyrǵasynda júrip jan-jaqty damıtynyma, kóshbasshylyq qasıetimdi odan ári shyńdaıtynyma, joǵary bilim alatynyma kúmánim joq.

Týlebaı Aıgerim

QazUÝ Mehanıka-matematıka fakúltetiniń 1 kýrs stýdenti

Ýrazgalıeva S. A jetekshiligimen

---