InfoHub Logo

Shirkin, ár adam úshin týǵan jer - dúnıe esigin ashyp, ananyń aq sútiniń baldaı dámin sezip, alǵash ret táı-táı qadam basqan, kindik qanyń tamǵan tuǵyrly ólke. Ol jer – seniń altyn uıań, ýaqyty kelgende sen de qanaty qataıǵan balapandaı ushyp, ony qaldyrasyń da, jańa ómirge bet burasyń. Biraq, sol jerde ótkizgen bala kúnderin jyly estelik bolyp júregińe máńgilikke qalady. Sol sebepti, seniń óz týǵan ólkeńmen baılanysyń eshqashan úzilmes, kerisinshe alystaǵan saıyn jan-júregin eljirep, saǵynyshpen kúıingendeı bolasyń. 

Meniń týǵan jerim – Qostanaı oblysynyń Altynsarın aýdany. Negizinde bul jerge alǵash ret qonys aýdarǵan naǵashy ájem bolatyn. Shamamen  1995 jyl bolsa kerek: ájem buryn-sońdy estimegen shaǵyn ǵana aýylǵa kóship, ómiriniń jańa kezeńin bastady. Bir qyzyǵy ájem Ybyraıdy pir tutqan eken, qatty qurmettep, balalaryna óleńderin, áńgimelerin túnde uıyqtarda oqyp beretin bolǵan. Oǵan qosa, búgingi kúnde men Ybyraı Altynsarın atyndaǵy mekteptiń oqýshysymyn, bul sáıkestik pe, álde taǵdyrdyń jazǵany ma, bilmeımin, biraq, óz basym onyń barlyǵy beker emes dep bilemin.

Sol jyldary  anam oqýda basqa aýylda boldy, Altynsarın aýdanyna tek turmys qurǵan soń oraldy. Al 2005 jyldyń kókteminde Qostanaı oblysynyń, Altynsarın aýdanynda dúnıege men keldim. Balalyq shaǵym sol jerde ótti, sondyqtan estelikter esimde úzik-úzik saqtalǵan. Esh nársege ýaıymdamaı, erkin ómir súrdim, bastysy – baqytty boldym. Aýlada oınap, kórshilerdiń tátti almalaryn julyp, kúlip júrgenimniń kórinisi esimnen shyqpaı, árdaıym jylýlyq sezimine bóleıdi. Qazirgi kúnde men qalada turamyn, sol sebepti týǵan ólkeme sırek baryp turamyn. Soǵan qaramastan, barǵan kúnimde, týǵan jerimniń tap-taza aýasyn jutyp, bıiktigi aspanmenen talasqandaı bolyp kórinetin aǵashtardyń arasynda serýendep, tynyǵyp, lázzat alamyn. Shynymen de, atamekenimde meniń janym tynyshtalady – mazalap júrgen oılarmen qosa kerek emes ýaıymnan oıymdy bosatamyn, erkindiktiń dámin sezingendeı kúı keshemin. Nelikten? Óıtkeni, bul jer – mendik, meniń jaqutym.

Otanym kishkentaı bolǵanymen, oǵan degen mahabbatym ólshemsiz. Uzyn kóshelerdiń boıymen tizbektelgen shaǵyn úıler, úıimizdiń janynda ornalasqan ózen, ondaǵy qazdar men aqqýlar, kógoraı shalǵyn arasynda oıyn qýyp júrgen sátterim – bári de meniń mahabbattymnyń sheksizdigine aparady.  Eske alǵan saıyn, bul jer – men úshin asa qymbat ári kıeli ekenin qaıta-qaıta ańǵaramyn. Men úshin týǵan jer tiri adamdaı, jaı adam emes, júzi jyly, maǵan kúlimdep kún nuryn shashatyn, óz kózqarasymen janymdy ystyq shaıǵa salǵan qanttaı eritetin, meni seze biletin erekshe jan. Keıde oǵan baryp, sálemdeme jibermegenime eriksiz ókinemin – qalaısha janyma jaqyn Otanymmen júzdesýge ýaqyt tappaı qalamyn?! Sonda da, onyń ónin qansha sırek kórsem de, oǵan degen mahabbatymnyń jalyny eshqashan óshpek emes.

«Týǵan jerim-aı, sende ótken ǵumyr qandaı ǵajap!» dep anda-sanda saǵynysh sezimine batyp, onyń meniń ómirimdegi róli qandaı mańyzdy ekenin qaıta túsinemin. Osy jerdegi ómirim meni kópke úıretti, boıyma asyl qasıetterdi darytty. Sol úshin, Otan-anamnyń aldynda basymdy ıip, týǵan jerge taǵzym etemin!

Dılnaz Maldybaeva

---