Qor bolǵan jyldarym-aı, kúnderim-aı!
Asaýǵa aýyzdyqsyz mingenim-aı!
Myna qasqa bárin de bile turyp,
Myna qasqa birin de bilmeýin-aı!
Shynymen túsinbeı me myna qasqa,
Myna - kóz, myna - júrek, myna - basqa
Myna qasqa shynymen túsinbeı me,
Bulbuldyń qonbaıtynyn qý aǵashqa?!
Myna - júrek, myna - kóz, myna basta,
Neniń baryn biledi myna qasqań...
Sezgishtigin bildirip alam ba dep,
Tas júregin jasyrar qyna basqan.
Alamyn dep qasqanyń tas qamalyn,
Tas júrekpen qashanǵy tas bolamyn.
Tas júrekke tabyntyp, tastamaǵyn,
Júregin ber, táńirim, jas balanyń!
Saǵyndym seni, sábı kezderim-aı,
Sandaltyp, meni tastap bezgeniń-aı.
..Myna qasqa bárin de sezip turyp,
Myna qasqa birin de sezbeýin-aı!

---