InfoHub Logo

Bir áńgimede muǵalimniń qýlyǵy jaıynda aıtylady. Onda synypqa kirip sabaqqa qatysqan dırektor synyptan tańdanyp shyǵady. Sebebi synyp tym belsendi bolyp ketken edi. Anyǵynda bul synyp mekteptegi eń enjar synyp bolatyn. Al búgingi sabaq ústinde olar júz paıyz qol kóterýden bir tanǵan joq. "Aǵaı, men aıtaıyn! Men aıtaıyn!" Jáne muǵalim "al, qane, aıtyp jibere ǵoı" degen oqýshy ornynan turyp suraqtyń jaýabyn aıtyp jiberip jatyr. Dırektordy tańdandyrǵan osy jaǵdaı. Bárin qoıshy, eń aldymen, synyp neǵyp belsendi bolyp ketken? Olar neǵyp qandaı suraq qoıylsa da, bári túgel qol kótergish bolyp aldy? Olarǵa mundaı bilimdarlyq qaıdan kele qaldy? Dırektor osy suraqtardyń jaýabyn taba almaı basy qatady. Sóıtse, gáp muǵalimde eken. Mektep dırektorynyń óziniń sabaǵyna kirgeli turǵanyn 5 mınýt buryn ǵana bilgen muǵalim dereý synypqa júgirip keledi de, bylaı deıdi:

"Balalar, qazir sabaqqa dırektor kiredi. Sender men qandaı suraq qoısam da, bilseńder de, bilmeseńder de, qol kótere berińder. Tek men kimniń bilip, kimniń bilmeı otyrǵanyn ańǵarýym úshin, biletinderiń oń qoldaryńdy, bilmeıtinderiń sol qoldaryńdy kóterińder".

Anyǵynda qýlyqtyń bári únemi osylaı ótip kete bermeıdi ǵoı. Mysaly, myna sabaqta...

Muǵalim sabaq ótip jatyr. Synypta muǵalim men oqýshylardan basqa da sabaqqa qatysyp otyrǵan adamdar bar. Ustaz úı tapsyrmasyn taqyrypshalarǵa bólip suraı bastaıdy. Aldyńǵy eki taqyrypsha boıynsha, tıanaqty jaýap alynady. Osyǵan kóńildengen muǵalim: "Balalar, kelesi taqyrypsha qandaı edi?" - deı bergeni sol edi, aldyńǵy partada otyrǵan ul bala ushyp túregeledi de taqtaǵa shyǵady.

Synyptaǵylar ań-tań. Sóıtse, muǵalim qýlyq jasap, osy balany úshinshi taqyrypshany aıtýǵa daıyndap qoıǵan eken. Muǵalim "Balalar, kelesi taqyrypsha qandaı edi?" degennen keıin, balalar taqyrypshanyń atyn aıtý kerek edi de, muǵalim sonan soń baryp qana: "Qane, osy taqyrypsha jóninde kim sóıleıdi?" - degen sıaqty birdeńe aıtý kerek bolatyn. Oqýshy sodan keıin baryp qana "men aıtaıyn" dep qolyn kóterýi kerek edi. Biraq ózine júktelgen tapsyrmadan qatty qobaljyp otyrǵan shákirt muǵalimniń: "Balalar, kelesi taqyrypsha qandaı edi?" - degen sózinen keıin-aq, tapsyrmamdy erterek aıtyp qutyla bereıin dep, taqtaǵa qaraı umtyla berse kerek.

---