Muǵalimniń talaby
Synypqa orta boıly, dembelshe deneli, sándi kıingen qara tory jigit kirip kelgende, oqýshylar "bul kim edi?" degendeı, bir-birine tańdanysyp qarap qaldy. Jigitti sonan soń baryp shyramytty. Bul kelip turǵan mynaý sabaǵyn bastaǵaly turǵan jas muǵalıma ustazdyń jubaıy edi. Jigit joldasynyń janyna baryp turdy da: "Qaısysy, qane, tynysh otyrmaı júrgen?!" - dedi. Balalar bir-birine qarap jymyń-jymyń etisti. Másele túsinikti edi. Bular - erli-zaıypty jas, tatý otbasylar. Ekeýi de - joǵary bilimdi maman. Demek, synypqa sabaq beretin jas apaı joldasyna synyptyń ózine qıyndyq keltirip júrgendigi týraly az-maz birdeńe aıtqan bolý kerek. Al jubaıyn syılaıtyn jigit olardy erteń baryp tártipke shaqyryp bergisi kelse kerek. Biraq balalar bul jigitten yǵysqan joq. Sebebi olar synypqa eshýaqytta da úshinshi bir adamnyń kirip, aralasýǵa bolmaıtyndyǵyn jaqsy biledi. Synypta tek muǵalim jáne oqýshylar bolady. Muǵalimniń jumysyna eshkim kelip syrttan aralaspaıdy. Mysaly, myna jubaıdyń joldasy osy jerde muǵalim bolǵan jaǵdaıda da.
Ras, keıde óz muǵaliminiń múddesin qorǵap, synypqa zavých nemese dırektordyń kiretini bar. Balalar munyń óziniń de artyq ekendigin ishteı sezip otyrady.
Sebebi synypta basty tulǵa - tek muǵalimniń ózi.
- Qoısańdarshy! - deıdi mundaıda qyzdar. - Jetti ǵoı qyljaqtaryń! Qazir taǵy da dırektor keledi endi.
Synypqa dırektor kele jatady.
- Qaısysy, qane, otyrmaı otyrǵan?! Edilbaev pa?! Bul klasta birdeńeni bastaıtyn Edilbaev qoı?!
- Bári, - deıdi muǵalıma oramalyn kózine aparyp. - Er balalardyń bári.
- Mynaý da ma?! - Dırektor saýsaǵymen birinshi synyptyń balasyndaı bolyp, partadan boıy asar-aspas bop otyrǵan balany kórsetedi.
- Áı, saǵan deıin de basynaıyn dediń be bizdi?! Bul synyptyń er baldaryn túgeldeı kolonıaǵa jiberý kerek qoı. Sonda biledi bular muǵalimniń talabyna baǵynbaý degenniń ne ekenin! Mektebin saǵynyp jylaıtyn bolady áli! Ómir seni baǵyndyrady! Ómir degen saǵan
mektep pen muǵalim emes, basyńnan sıpap otyratyn. Sabaǵyńyzdy ótkize berińiz, - deıdi dırektor sonan soń muǵalımaǵa. - Bularmen jeke-jeke sóılesý kerek.
Synyp sol kúni tynysh otyrady. Kelesi sabaqta da solaı. Al odan keıingi sabaqta baıaǵy áýenin bastaıdy.
Muǵalimniń talabyna baǵynbaǵan bir bala keıin ózi jigit bolyp, áke atanǵanda: "Sol kezdeginiń bári aqymaqshylyq eken. Muǵalimniń talabyna baǵyný kerek eken. Mektepte on jyl oqısyń ba, on bir jyl oqısyń ba, sol óziń oqyǵan mektep óziń jaıly bir aýyz jyly sóz aıtpasa, sol ýaqytyń bosqa ketkenmen birdeı", - depti. Ózi oqyǵan mektebiniń ózi jaıly bir aýyz syrtynan aıtqan jyly sózine qýanypty.
Álgi jas muǵalıma keıin basqa mektepke aýysyp ketse kerek. Onyń ornyna kelgen dál ózindeı jas muǵalıma synypty shyrq úıirip alyp ketipti.
You Might Also Like
