InfoHub Logo

Shyǵys halyqtarynyń ejelgi meıramy Naýryz — ulystyń uly kúni keldi. Qazaq respýblıkasynyń erikti el retinde azattyq týyn tikken kezinde búl kúnniń qadir-qasıeti arta túskendeı. Kúni keshege deıin naýryz — qazaqtyń ulttyq meıramy dep aıtýǵa qorqyp keldik. Búgingi kúnniń kúnkóris qıynshylyqtaryn aıtyp, shetimizden jylap júrmiz. Biraq shúkirshilikti umytpaýymyz kerek.

Adam balasy jaqsylyqqa toımaıdy, bolǵan saıyn bola tússe eken deıdi. Dúnıe jaqsylyqqa tolýy úshin ár adam ózi jaqsylyq jasaýy, meıirimdi, keshirimdi bolýy shart.

Búgingi ulystyń uly kúni — bir jaǵynan tazarý kúni. Adamnyń denesi ǵana emes, jan dúnıesi de taza bolsa, dúnıe jańarady, jańǵyrady.

Biz ylǵı aınalamyzdaǵylardan, qoǵamnan, ákimderden jaqsylyq, meıirim kútemiz. «Anany úıtpedi, mynany búıtpedi» dep kinálaǵyshpyz. «Úı salyp bermedi», «jaqsy jumysqa otyrǵyzbady» degen sekildi ókpe aıtqyshpyz. Al, dúrysynda ár adam mynaý álemdegi Kún sekildi. Kún, eshkimnen jaqsylyq kútpeı, óziniń nuryn satpaı, jaqsy men jamanǵa, zulym men aramǵa, ana men balaǵa, baqa men jylanǵa nuryn sebedi. Adam balasynyń meıirimi de sol Kún sekildi bolǵanda, árkim «erteń osynyń maǵan bir paıdasy tıer» degen ishki esepsiz is qylǵanda, ómir jaqsarady.

Bul — birinshi aıtarym.

Ekinshiden — biz, árqaısymyz, ulttyq múddeni oılaǵanda, bólinip-jarylmaı, eti tiri, qolynan is keletin, tárbıeli ul-qyzdarymyzdy qoldap, jumylǵan judyryqtaı birigip eńbek ete bilgende ǵana halyqtyq muratqa jetemiz. Máselen, maǵan Adambek degen kisi unamaıdy delik: minez-qulqy, dúnıe-tanymy degendeı. Ekeýmizdiń basymyz birige bermeıdi. Biraq ulttyq másele tóńiregine kelgende ekeýmizdiń birligimizdi eshkim buza almaıtyndaı bolsa ǵana, halyqtyq múdde, eldik namys aıaqqa basylmaıdy.

Úshinshiden — araq-sharap ishý — az halyqtardy birtindep ý berip óltirý.

Bizdiń az halqymyzdyń taǵdyry jel ótinde tur: sany az halyq ári bilimdi, ári tekti, ári mádenıetti bolýy shart. Shart deıtinim — biz qazir ǵylym men tehnıka damyǵan, sıvılızasıa daýyly sharpyp turǵan zamanda ómir súrip otyrmyz.

Sany kóp ulttardyń arasynda az halyq óz mánimen qalý ekitalaı dúnıedeı. Sondyqtan, ár balanyń, ár perzenttiń ulttyq múddeni óziniń qara basynyń mansabynan bıik qoıýy qajet.

Qazir, negizinen alǵanda, halyq oıandy. Buryn qazaq tilin bilgenin, qazaq tilinde sóılegenin ar sanaıtyndar endi óz tilin bilmegenine uıalatyn boldy. Munyń bári táýbaǵa kelýge, shúkirshilik etýge meńzeıdi.

Men qazaq eliniń túkpir-túkpirinde eńbek etip júrgen ini-sińli, baýyrlarymdy, zamandastarymdy, zeınetker aǵa-jeńgelerimdi ulystyń uly kúni qutty bolǵaı, jerimizge, elimizge bereke bergeı dep tilek tileımin.

1992

---