Ne paıda kúrsingennen, ókingennen,
Ne paıda dátke qýat bekingennen,
Alaıda, emhanada kóz jumǵannan,
Jaqsy edi ǵoı maıdannyń ótinde ólgen.
Qurban ǵyp jastyǵymdy, jas ǵumyrdy,
Jaýymnan jasyra almaı qastyǵymdy.
Janymdy aıamaǵan jaýlarymnan,
Ala jatar edim ǵoı jastyǵymdy.
Ókinben, muńaıman da, óksimeımin,
Ómirim, osylaı-aq ótshi meıliń.
Alaıda, alasapyran tirshiliktiń,
Aldynda kúrese almaı tek sileıdim!
Kúnin kerip júrgem joq jetim quldyń,
Biraqta ne bitirdim, ne tyndyrdym.
Shóp jınaǵan inine sýyrdaıyn,
Áıteýir tirshilikke betim burdym.
Qarasaz, qara shalǵyn óleńde óstim,
Jyr jazsam, oǵan jurtym ólimdestiń.
Ólse óler Muqaǵalı Maqataev,
Óltire almas, alaıda óleńdi eshkim!
Týǵan jer saǵyndyrdy, keldi esime,
Ózim kepil endi ony kórmesime.
Taǵydaı taýda ósken tarlan edim,
Tańyldym emhananyń bólmesine.
Kim kepildik beredi ólmesime!
O, dáýren, netken ǵajap súıikti edi!
Jaıylǵan jasyl mańda kıikteri.
Otyrǵan ońashada, bıiktegi,
Tańǵy samal jatatyn súıip meni.
Oınatyp omyraýda tań samalyn,
Men alǵash shyqqan kúndi qarsy alamyn.
Máńgilik sol bıikte qalyp qoımaı,
Nesine bul tirlikti ańsaǵamyn?!
Qasqa bulaq, qasyńnan nege kettim?!
He degen jel aıdaǵan kóbelekpin.
Erkindik, erkelikti mise tutpaı,
Tasqa ákep ózimdi-ózim shegeleppin...

---