InfoHub Logo

Arqaqaptaǵy romb jáne tumshapesh astyndaǵy jáshik sekildi kúnde kórip júrgen zattardyń da siz oılap kórmegen fýnksıalary bar.  

Kún saıyn paıdalanyp júrgen úırenshikti zattar súrprızderge tunyp tur. Biz olar jaıynda bárin bilemiz dep oılaımyz, alaıda ol oıymyz qate. Búgin biz kúndelikti turmysta paıdalanyp júrgen zattarǵa qatysty eń tosyn aıǵaqtardy toptastyrdyq.   

1. Azıalyq fast-fýd salynatyn qoraptar

Árıne, qoldy ıkemge keltirip, taıaqtarmen kespeni nemese kúrishti qoraptyń burysh-buryshynan alyp jeýge bolady, biraq ol qorapty jaıyp jiberse, odan tamaqty alyp jeýge áldeqaıda yńǵaıly bolatyn taqsy (tarelka) paıda bolady.  

2. Symǵa ornatylǵan sılındr

Bul elektr tizbekterindegi joǵary jıilikti bógeýilderdi basyp azaıtatyn ferrıt fıltr. Osynyń arqasynda sıfrlyq sıgnaldyń sapasy jaqsarady. Aıtpaqshy, bul fıltrler alynbaly da bolyp jasalady.  

3. Kóılek jaǵasynyń artqy jaǵyna qadalatyn túıme

Bul túıme taǵylǵan galstýk jaǵadan shyǵyp turmaýy úshin qajet. Sońǵy kezderi bundaı jeıdeler kóp shyǵarylmaı júr, óıtkeni osy túımeniń astyna syıyp turatyn ensiz galstýktar baıaǵyda sánnen qalǵan. Qazirgi kezde bundaı túımeler taza dekoratıvtik fýnksıany atqarady.  

4. Sharap shólmekteriniń túp jaǵyndaǵy oıdym

Shólmektiń aýzyn tyǵynmen jaýyp bekitken kezde onyń búıiri men túbinde kúshti qysym paıda bolady. Túptegi oıdym qysymdy shólmektiń ishine birkelki túsiredi de, sonyń arqasynda shólmek jarylyp ketpeıdi. Aıtpaqshy, kóbikti sharaptar quıylatyn shólmekterdiń túbindegi oıdym basqa sharap shólmekterindegiden úlkenirek bolyp keledi.  

5. Jeıdeniń joǵarǵy túımesi salynatyn kóldeneń tilingen túımekóz (ilgek)  

Nege jeıdeniń túımelik jolaǵyndaǵy túımekózderdiń barlyǵy tiginen tilingen de, al joǵarǵysy kóldeneń tilingen? Jaýaby op-ońaı: osy tusta jeıdeniń túımesi jıi-jıi aǵytylyp kete beredi. Túımeniń tik túımekózben salystyrǵanda kóldeneń túımekózden aǵytylyp ketýi qıynyraq.    

6. Krosovkanyń baý ótkiziletin qosymsha sańylaýlary

Olardy paıdalanatyndar az, biraq olardyń bunysy beker: osy sańylaýlardyń arqasynda krosovka aıaqqa oıdaǵydaı kıilip, sportpen shuǵyldaný kezinde óksheńizdi qajap tastamaıdy.  

7. Kedanyń búıir tusyndaǵy tesikter

«Jeldetip turý úshin» deıtin aıdan anyq jaýaptan bólek basqa da nusqasy bar. Bar gáp Converse All Stars aıaq kıimderi eń basynda basketbolshylarǵa arnap shyǵarylǵandyǵynda. Kedanyń osy qosymsha tesikterinen de baý ótip baılanatyn. Sonyń arqasynda aıaq kıim aıaqta nyq turatyn.   

8. Spagettıge arnalǵan qasyqtaǵy sańylaý

Qansha spagettıdi pisirý kerektigin oılap bas qatyrmaýyńyz úshin osy sańylaý jasalǵan. Sańylaýǵa syıǵany — bir adamǵa arnalǵan standartty porsıa.  

9. Shómish (ojaý) tutqasyndaǵy oıyq

Ol oıyq sizge shómishti ilip qoıý úshin ǵana qajet emes. Bul oıyqty siz pisirip jatqan tamaqty aralastyratyn qasyqty ustap turǵysh retinde de paıdalanýǵa bolady.  

10. Sharly qalamnyń qalpaǵyndaǵy sańylaý

Balalar ne bolsa sony aýzyna sala beredi, al sharly qalamdardy kemirip-qajaǵandy mektep jasyndaǵylar da jaqsy kóredi. Eger bala baıqaýsyzda qalpaqty jutyp qoıyp, ol tynystaý joldarynda turyp qalsa, bul kishkentaı ǵana sańylaýdan aýa ótip, sábı dem ala beredi.

11. Kóliktiń aspap-quraldar panelindegi janarmaı belgisi janyndaǵy nusqama

Bul bir kemeńger adamnyń oılap tapqan amaly, ol, ókinishke oraı, kólikterdiń birazynda joq. Nusqama janarmaı bagynyń aýzy kóliktiń qaı jaǵynda ekenin kórsetip turady. Jalǵa alǵan kólikke janarmaı quıatyn kezde óte qajet.

12. Muzkámpıt taıaqshasynyń ushyndaǵy sańylaý

Bul jerde ol taza tehnologıalyq turǵyda qajet bolyp tur: kishkentaı tesik muzkámpıttiń plasık taıaqshadan túsip qalmaýy úshin jasalady. Kishkentaı tútikti áli suıyq shárbatqa batyrǵan kezde, shárbat sol sańylaýǵa aǵyp kiredi de, qatqan soń kámpıtti túspeıtindeı etip ustap qalady.

13. Arqaqaptaǵy tilikteri bar kvadrat japsyrma

Bas kezinde bundaı japsyrmalar tek týrısik arqaqaptarda boldy: tilikterden arqan, myltyq ótkizilip qoıatyn. Qalalyq arqaqaptarǵa olar tek ádemilik úshin ǵana tigiledi.    

14. Shalbardyń qyry

Qazir ol klasıkalyq shalbarlardyń mindetti atrıbýtyna aınaldy, biraq ony eshkim ádeıilep oılap tapqan joq. XIX ǵasyrda kıim tigýmen aınalysatyn kóptegen kásiporyndar ónimderin eksportqa shyǵaratyn edi. Tasymaldaǵan kezde júk meılinshe az oryn alýy úshin shalbarlardy jóneltý aldynda nyǵyzdap tastaıtyn. Osynyń nátıjesinde balaqqa qyr túsip qalyp, odan arylý qıynnyń qıyny boldy. Buǵan kónýden basqa amal qalmady.  

15. Bas kıimderdegi shashaq

Kúlkili úlpildek sharlar XVIII ǵasyrda kemelerdegi orynjaılardyń alasa tóbelerine jáne dóńes, shyǵyńqy zattarǵa basyn ura berip, zárezap bolǵan fransýz teńizshileriniń taqıalarynda paıda boldy. Keıinirek ár túrli pishim men tústegi shashaqtar kóptegen áskerı bas kıimderge de tigile bastady. Sol sharlar arqyly olardyń ıeleri qandaı ásker túrine jatatynyn ajyratýǵa bolatyn boldy.    

16. Keńse pyshaǵynyń artqy jaǵyndaǵy biteýish

Keńse pyshaǵynyń júzi muqalǵan seksıalaryn syndyryp alyp tastaýdyń birneshe tásili bar. Buny, qoldy kesip ala jazdap, qolyńyzben syndyryp kórýge bolady, kempiraýyzdy paıdalanýǵa bolady, ne bolmasa, pyshaqtyń ózin muqıat sholyp shyǵýǵa bolady. Onyń sabynyń artqy jaǵynda shyǵaryp, pyshaq júziniń qajetsiz bolyp qalǵan seksıasyna salyp, ony syndyryp tastaýǵa bolatyn biteýish bar.   

17. Rýletkanyń taqalaǵyndaǵy sańylaý

Ol adamnyń jalǵyz ózi uzyn kesindilerdi ólsheı alýy úshin qajet. Kesindiniń bas jaǵyna burashege buralyp kirgiziledi de, oǵan taqalaqtaǵy sańylaý arqyly rýletkanyń ushy ilinedi. Al ismer kisi qajetti uzyndyqty ólshep alady.

18. Heinz kechýbiniń oramasyndaǵy 57 sany

Bul san Heinz kompanıasynyń jarnamalyq uranynyń bir bóligi (57 túri bar) bolýynan bólek, qutyǵa jazylǵan bul sannan praktıkalyq paıda da bar. Eger kechýp aqpaı jatsa, alaqanyńyzben 57 sanyn bir-eki ret uryp qalyńyz.  

19. Tumshapesh astyndaǵy jáshik

Kúndelikti jaǵdaıda ol jerde tabalar turady. Alaıda, shyndyǵynda, bul jáshik «jylytýshy» dep atalady. Basynda ol, tumshapeshte taǵy bir taǵam pisip jatqanda, daıar turǵan taǵamdar sýyp qalmaýy nemese ysytylýy úshin oılastyrylǵan.

---