InfoHub Logo

N.Nazarbaev jáne B.Obamanyń sılıkon músinderin jasaǵan Aıdos Esmaǵambetov Astanada murajaı ashýdy armandaıdy. Bul týraly sýretshi jáne músinshi  Aıdos Esmaǵambetov «QazAqparat» tilshisine bergen suhbatynda aıtty.

Aıdos sılıkonnan músin jasaýdy ózdiginshe úırengen eken. Ónerdiń bul túrimen 5 jyl buryn aınalysa bastaǵan.

«Músin jasaý ónerimen shamamen 2010 jyldan aınalysa bastadym, - dedi Aıdos. - Sol kezde Barak Obama AQSH prezıdenti atanyp, madam Tússo mýzeıinde onyń balaýyzdan jasalǵan músini paıda boldy. Sol kezde bizdiń Prezıdentimiz Nursultan Nazarbaevtyń músinin jasaý oıǵa keldi. Sonymen qatar, onyń 70 jyldyq mereıtoıyna arnap tosyn syı jasaǵym keldi.  Bizdiń Qazaqstanda da mundaı óner bar ekenin kórsetkim keldi. Keıin birneshe ret kórmelerge qatystym. Adamdar Pýtın, Obamanyń músinin jasaýdy usyndy».

Osylaısha Barak Obamanyń músinin jasady. Bul jumysqa 1 jylǵa jýyq ýaqyt ketti. Endi músinshi orta salmaqtaǵy álem chempıony, boksshy Gennadıı Golovkınniń músinin jasaýǵa nıetti. Bul úshin tıisti materıaldardy da satyp alǵan.

Arqalyqtan 30 shaqyrym jerdegi Ashýtasty aýylynda turatyn Aıdos  tapsyrys boıynsha portretter men sýretter salady.

«Negizgi tehnologıalardy madam Tússo mýzeıiniń vıdeorolıkterinen, sonymen qatar músinderdiń qandaı materıaldardan jasalǵany týraly maqalalardan úırendim», - dedi A.Esmaǵambetov.

Aıdos jumystary úshin materıaldardy Amerıkadan ınternet-magazınder arqyly tapsyrys berip alady. Músinderine shash jasaý úshin sıntetıkalyq parıkterdi paıdalanady, alaıda aldaǵy ýaqytta tabıǵı shashty qoldanýdy kózdep otyr.

Aıdostyń sózine qaraǵanda, bir músin úshin shamamen 200 myń teńge jumsalady. Eki komponentti sılıkon quny (kólemine baılanysty) 80-90 myń teńgeni quraıdy. Eýropada bundaı músinderdi 150-500 myń dollarǵa satylady.

 «Ónerdiń bul túri meni shabyttandyrady. Aldaǵy ýaqytta ol Qazaqstanda da damysa eken deımin. Astanada óz stýdıamdy ashqym keledi, ózgelerdi de ónerdiń bul túrine úıretýdi qalaımyn, - dedi ol. - Ázirge jumystarymdy úıde saqtaımyn. Sheberhanam, mýzeı bolǵanyn qalaımyn, árıne».

Sonymen qatar, daryndy jigit grım jasaýmen, vıdeo túsirýmen aınalysady.

Osylaısha, ony zombıler týraly «Selfı s mertvesamı» atty qazaqstandyq kórkem fılmge grım jasaýshy retinde qatysýǵa shaqyrdy.  

Derekkóz: inform.kz

---