Pernetaqtadan bas tartyp, qalammen jazýdyń paıdasy

Qolmen jazýdyń artyqshylyqtary

Bul mıyńyz úshin paıdaly jattyǵý. Qalammen jazý balalarǵa jazý mashyǵyn úırenýge jáne áripterdi eske saqtaýǵa, ıdeıalardy qurýǵa jáne baılanys qabiletterin jaqsartýǵa kómektesedi. Bul týraly Norvegıadaǵy University of Stavanger ýnıversıtetiniń ǵalymdary Anne Mangen men Jean-Luc Velay aıtady. Olar qolmen jazý prosesi - pernetaqtany qoldanýǵa qaraǵanda, mıdyń kóp oryndarda jumysqa belsendi áser etetinin dáleldegen.

Qalammen jazý balalarǵa ǵana emes, sonymen qatar eresekterge de paıdaly. Mangen zertteýleriniń birinde tájirıbege qatysýshy eki top adamdardan 20 áripten turatyn álippeni jattaýdy usynady. Birinshi top qalammen jazýdy, al ekinshi top pernetaqtamen jazýdy tańdaıdy. Eki topty synaqtan ótkizýden keıin, alty apta ótkende, birinshi toptyń jańa áripterdi jattaýda úzdik nátıje kórsetkeni anyqtalǵan. Al ekinshi top aıtarlyqtaı nátıjege qol jetkize almapty. Osy tájirıbeniń qorytyndysy boıynsha, tujyrym jasalǵan: pernetaqtany qoldanýǵa qaraǵanda qalammen jazý tıimdirek ári paıdalyraq.

Qalammen jazý kezinde qandaı prosester júredi?

Qalammen jaza bastaǵanymyzda, mıdyń kúrdeli prosesi júredi. Osy sátte aktıvasıanyń retteý júıesi (ARJ) dep atalatyn mı bóligi jumys isteı bastaıdy, ol berilgen tapsyrmany oryndaýǵa kómektesetin súzginiń fýnksıasyn oryndaıdy.

Biz qalamdy qalaı ustaýymyz kerek ekenin bilýimiz kerek; qandaı áripterdi qoldanýymyz kerektigin jáne olardy qandaı formada jazýymyz kerek ekeni jaıly oılaýymyz kerek; olardyń bir-birimen qalaısha sóz quraıtynyn elestetýimiz kerek. Jalpy, qalammen jazý prosesi - qozǵalý jáne kórý fýnksıalaryn qamtıdy. Biz mıdy bilimdi maǵynaly obrazdarǵa aınaldyrý kezinde, joǵary deńgeıde qoldanamyz. Al, pernetaqtadaǵy eki batyrmany basý men ony ekrannan kórý jáne qabyldaý mundaı nátıje bermeıdi, sebebi, múldem basqa proses jumys isteıdi.

Qolmen estelik jazbalar jazyp turý oqýǵa kómektesedi

Qalammen jazý – oqý úshin tıimdi ádis (dáristerde jazǵan konspektiler barlyǵyńyzdyń esterińizde shyǵar). Biz dáristi tyńdaý kezinde, málimettiń 10 paıyzyn ǵana eske saqtaımyz. Al jazý bul sandy aıtarlyqtaı ósiredi, sebebi , osy proses kezinde mı málimetti súzgiden ótkizip, qurylymdaıdy. Búginde stýdentterdiń aıtarlyqtaı bóligi konspekt jazý úshin kompúterlerin qoldanady (shamamen 21 paıyzy), alaıda «Kolejde qalaı oqý kerek» kitabynyń avtory Walter Pauk sabaq barysynda, kompúterge jazylǵan málimetti qalammen qaǵazǵa túsirý kerek,- dep esepteıdi. Sabaq ótý kezinde, málimetti qalammen jazýdyń paıdasy jóninde, myna jerdegi ınfografıkadan bilýge bolady.

Qalammen jazý arqyly este saqtaý qabiletimizdi qalaı jaqsartamyz?

Málimetti qalammen jazýdyń paıdasyn bilgennen keıin, este saqtaý qabiletin bloknot pen qalam arqyly jattyqtyrýdyń josparyn árqaısymyz da jazyp alsaq bolady. Máselen:

Birneshe ret qaıtalaý. Prosesti qaıtalaý málimetti tezirek saqtaýǵa kómektesedi.

Jıi jazý. Bir táýlik ishinde qaıta-qaıta jazý arqyly alýyńyz tıis málimetti 70 paıyzǵa kóp kólemde eske saqtaı alasyz, al jáı ǵana oqyp qoıý málimettiń 20 paıyzyn jattaýǵa sep bolady.

Ónimdiligi tıimdi ýaqytta jattyǵý. Mysaly erte turatyn adamdar bul jattyǵýdy tańsáride jasaýy kerek, olardyń bul kezde qýaty mol bolady.

Este saqtaý kartalaryn qoldaný, sebebi, olar derekterdi jattaýǵa óte tıimdi. Bolmasa, málimetti qaǵazǵa túsirip saqtaýǵa bolatyn ózge de quraldardyń kómegine júginińiz.

Ózime keler bolsam, men árdaıym jazyp otyrý arqyly jańa sózderdi, shet tilderindegi sóılemderdi (olardy kóp ýaqytqa jattaýdyń osy joly ǵana qolymnan keledi) úırenemin, sonymen qatar, osy ádisti qajetti jańa málimetpen jumys kezinde qoldanamyn.

Derekkóz: www.lifehack.org

Al siz qandaı ádisti qoldanasyz – qalam men dápter me, álde gadjetter me? Qajetti málimetterdi qandaı ádister arqyly eske saqtaısyz?