InfoHub Logo

QR Bilim jáne ǵylym mınıstrliginiń qorytyndysyna sáıkes, búginde úshtildi bilim berý baǵdarlamasy aıasynda aǵylshyn tili kýrstaryna qatysyp júrgen oqytýshylardyń basym bóligi ózge tilde sabaq berýge áli de daıyn emes.

«Búginde úsh tildi oqytý boıynsha tájirıbe jınaqtaýdy jalǵastyra berý kerek. Sebebi osy saladaǵy bastamalardyń biri - tórt joǵary oqý ornynda daıyndyqtan ótken 1 500 oqytýshynyń 70 paıyzynda aǵylshyn tilin bilý deńgeıi «Elementary» (alǵashqy qadamdar) jáne «Veginner» (bastapqy kezeń) bolyp shyqty. Demek, barlyǵynda bazalyq daıyndyq tómen. Atalǵan oqytýshylardyń tek 30 paıyzy ǵana «Intermediate» (ortasha deńgeı), bireýlerde «Pre-Intermediate», endi bireýler aǵylshyn tilin «Advanced» (erkin sóıleý) deńgeıinde biledi eken. Dál osy oqytýshylar kelesi semestrden bastap sabaqty aǵylshyn tilinde berýge ázir», - dedi joǵary bilim jáne joǵary oqýdan keıingi bilim berý departmentiniń basshysy D.Axmed-Zakı búgin Astanada bastalǵan kóp tildi bilim berý máselesine arnalǵan xalyqaralyq semınarda.

Onyń aıtýynsha, aldaǵy ýaqytta joǵary oqý oryndary osy bastamany jergilikti jerlerde jalǵastyryp, oqytýshylardy óz aqshalaryna daıyndaýy qajet. Memleket bolsa, kelesi jyly taǵy 1 500 grantty bólip bermekshi. Osy granttardyń esebinen qazirgi kýrstarǵa qatysyp júrgen oqytýshylar óz bilimderin shyńdaıdy. Sondaı-aq daıyndyqqa jańa oqytýshylardy tartý josparlanǵan.

«Bıyldan bastap Qazaqstannyń barlyq joǵary oqý oryndarynda «Aqparattyq-kommýnıkasıalyq texnologıalar» degen pán aǵylshyn tilinde oqytylady. Endi, birqatar ýnıversıtetter osy bastamany kelesi semestrge aýystyrdy. Biz ony jaqsy túsinemiz. Sebebi qyrkúıekte bári birdeı daıyn bolǵan joq. Bizdińshe, olar ekinshi semestrde de daıyn bolmasa da, úshinshi semestrde tıisti jumysty qoǵa alady. Sóıtip, «Aqparattyq-kommýnıkasıalyq texnologıalar» páni taza aǵylshyn tilinde beriledi. Bul - óte oryndy nárse. Óıtkeni atalǵan pánniń termınologıasy aǵylshyn tiline negizdelgen», - dep atap kórsetti D.Axmed-Zakı.

Departament basshysynyń sózine qaraǵanda, bolashaqta joǵary oqý oryndarynda pánderdiń 30 paıyzyn aǵylshyn tilinde oqytý josparlanyp otyr.

---