InfoHub Logo

Ońtústik Qazaqstan oblysyndaǵy kitaphanalarda kompúterler jetispeıdi. Óńirde 427 kitaphana bar bolsa, búginde onyń 180-i ǵana jańa tehnologıamen jabdyqtalǵan. Bul másele kitaphanashylarǵa arnalǵan semınar-keńeste aıtyldy, dep QazAqparat habarlaıdy.

«Bolashaqqa baǵdar, rýhanı jańǵyrý» maqalasy aıasynda uıymdastyrylǵan keńeste kitaphanashylar jańa tehnologıa damyǵan zamanda mundaı máseleler sheshilse degen usynystaryn aıtty. Oblystyq mádenıet jáne tilderdi damytý basqarmasy basshysynyń mindetin atqarýshy Asylhan Temirhannyń aıtýynsha, bul baǵytta oblystyq búdjetten qarjy qaralady. Alaıda, bólingen soma azdyq etip otyrǵan kórinedi.

«Oblystaǵy kitaphanalardyń 127-i ǵana ınternetke qosylǵan. Bizde aýdandardaǵy búdjetten qarjy bólý máselesin kóterýdemiz. Alaıda óte az bólinedi. Jylda kompúter ár aýdannan jalpy eseptegen kezde 1-2 kitaphana ǵana qamtylady. Qarjy bólý máselesi tómen»,- dedi Asylhan Temirhan.

Basqosýda sondaı-aq kitaphanalardyń jemisti jetistikteri de aıtyldy. Máselen, oblystaǵy 427 kitaphananyń búginde 639 myń oqyrmany bar. Bul - qoǵam sıfrlyq damýǵa kóshken shaqta kitap oqıtyn qaýymnyń áli de bolsa, azaımaǵanyn kórsetedi,- deıdi sala mamandary.

Semınar sońynda qatysýshylar oblystyq «Otyrar» ǵylymı-ámbebap kitaphanasyna aralap kórip, ózara tájirıbe almasty. Alda atqarar jumystaryn pysyqtady.

---