InfoHub Logo

1 maýsymda elimizdiń oqýshylary Halyqaralyq balalardy qorǵaý kúnimen qatar sońǵy qońyraý merekesin atap ótedi. Bul týraly QR Oqý-aǵartý mınıstrligi Orta bilim komıtetiniń tóraǵasy Gúlmıra Kárimova aıtty.

«Qazaqstanda oqý jylynyń uzaqtyǵy 36 apta. Dástúr boıynsha oqý jyly 1 qyrkúıekte bastalyp, bıyldan bastap 31 mamyrda aıaqtalady», - dedi G. Kárimova mınıstrliktiń telegram kanalynda jarıalanǵan túsiniktemesinde.

Onyń aıtýynsha, 31 mamyr – oqý jylynyń sońǵy kúni. Bul kúni elimizdiń mektepterinde oqýshylardyń jas erekshelikterin eskere otyryp, Saıası qýǵyn-súrgin qurbandaryn eske alý kúnine arnalǵan synyptan tys saǵattar ótkiziledi. 1 maýsymda elimizdiń oqýshylary Halyqaralyq balalardy qorǵaý kúnimen qatar sońǵy qońyraý merekesin atap ótedi.

Budan buryn habarlanǵandaı, keshegi Májilistiń jalpy otyrysynda depýtat Amanjol Áltaı mektepterdegi sońǵy qońyraý kúnin 30 mamyrǵa nemese 1 maýsymǵa aýystyrýdy surady.

«Elimizde 31 mamyr asharshylyq jáne saıası qýǵyn-súrgin qurbandaryn eske alý kúni bolyp belgilendi. Bul kúni alash arystarynyń rýhyna jasap júrgen qurmetimiz olardyń eskertkishteri men memorıaldyq oryndarǵa gúl shoǵyn qoıýdan aspaı tur. QR Oqý-aǵartý mınıstriniń 2022 jylǵy 12 tamyzdaǵy № 363 buıryǵyna sáıkes, orta bilim beretin mektepterdegi sońǵy qońyraý 31 mamyr bolyp bekitilip otyr. Alash arystarynyń amanatyn urpaq sanasyna sińirýge tıis mınıstrliktiń 31 mamyr kúniniń mańyzyna mán bermegeni qandaı ókinishti?! Arystarymyzdyń rýhyna bir kúndi de tolyq qımaı, apyl-ǵupyl aza tutqansyp, ile-shala toı toılap, dýmandatyp kete beretin bolsaq, eldigimiz qaısy?! Sondyqtan mektepterdegi sońǵy qońyraý kúnin 30 mamyrǵa, ne bolmasa 1 maýsymǵa aýystyrý kerek. Bul – eshqandaı talqylaýdy qajet etpeıtin ádiletti talap», - dedi A. Áltaı Úkimet basshysynyń orynbasary Altaı Kólginovtyń atyna joldaǵan saýalynda.

---