InfoHub Logo

Sh.Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵynyń keńesshisi Orazkúl Asanǵazynyń aıtýynsha, úsh tildi oqytý júıesinde jańalyq jasaýdyń qajeti joq. Atalǵan ádistemeni kezinde Alash arystary jazyp ketken.

«Biz urpaǵymyz úsh tildi jetik meńgersin desek, eń birinshi kezekte qazaq tilin oqytýymyz kerek. Qazaqstannyń búkil mektepteri men balabaqshalary tek qazaq tilinde bolýy kerek. Bizde jaratylystaný pánderin aǵylshyn tilinde oqytamyz dep jatyr, bul túbirimen durys emes. Qazaqstanda ósetin ósimdikti, janýarlar álemin, tek Qazaqstanda ǵana bolatyn tirshilikti qazaqtyń balasyna aǵylshyn tilinde oqytý degen ne sumdyq? Biz ony óziniń tamyrynan aıyryp otyrmyz ǵoı. Mine, kezinde Alashtyń arystary, Axmet Baıtursynovtar jaratylystanýdy qalaı oqytty? Bárin jazyp qoıǵan. Jańadan eshteńe oılap tabýdyń keregi joq», - dedi O.Asanǵazy Astanada ótken «Alash arystarynyń bilim berý júıesindegi maqsat-murattary - «Satylaı keshendi oqytý» texnologıasynyń ózegi» atty sharada.

Onyń aıtýynsha, dál osy texnologıanyń negizinde úsh tilge úıretýge ábden bolady. Sebebi atalǵan ádis tek qana bilimdi belgili bir kólemde berip, qajetti sheberlik pen daǵdyny meńgertýmen ǵana shektelmeıdi. Sonymen qatar balanyń jalpy jan-jaqty damýyna, oılaý, este saqtaý, qıaldaý, elestetý sıaqty basqa tanymdyq-psıhologıalyq qasıetteriniń jaqsy úılesimdi damýyna baǵyttalǵan, qazaq tilinde oılaıtyn, qazaq mádenıetin meńgergen tildik-mádenı tulǵa qalyptastyratyn oqytýdyń bir túri. Onyń nátıjesi de joq emes.

«Biz árbir pánniń algorıtmin jasadyq. Sol algorıtm arqyly árbir balaǵa pánniń mazmunyn berdik. Osy mazmun boıynsha balalar ary qaraı ózderin damytyp, oqyp ketti. Al endi bunyń nátıjesin qaıdan kórdik degende, ol myna ulttyq testileý kezinde kórindi. Balalarymyz ár pánnen 25 baldan kem alǵan joq. Júsipbek Aımaýytov óz eńbeginde aıtady, balaǵa bilim bergende, kózimen kórgendeı, qulaǵymen tyńdaǵandaı, qolymen ustaǵandaı etip berý kerek. Mine, satylaı oqytý kesheni osyny kózdeıdi», - deıdi pedagogıka ǵylymdarynyń doktory Nursha Orazaqynova.

Aıta keteıik, búgingi tańda «Satylaı keshendi oqytý» tehnologıasy birneshe aımaqtarda tájirıbe retinde qolǵa alyndy. Atap aıtqanda, Batys Qazaqstan men Almaty oblystarynda, sondaı-aq  Astana qalasynyń birqatar mektepterinde osy ádisti qoldanyp keledi.

---