InfoHub Logo

Asan degen bir kedeı ótegennen bir attyń maıyn surap minip, alty-jeti jyldaı bermeı qashqaqtap júripti. Birde ótegen Asandy kezdestirip kalady da, ony alyp kelýge jigitterin jumsaıdy. Jigitter Asandy atymen basyp ustap, Ótegen men Abylaıdyn aldyna alyp keledi:

Ótegen Abylaıǵa:

— Men bul atty jıyrma jorǵamen birge joǵaltyp edim, taqsyr, ádildigin aıtsańyz, — deıdi. Asan bolsa:

— Aldıar, men jylqy urlaǵan joqpyn. Ótegenniń atynyń maıyn minip edim. Bermeı júrgenime jeti jyldaı bolǵany ras. Meni naqaqtan kúıdirmeńiz. Ádil bıligin aıtyńyz, — dep shyryldaıdy.

Abylaı Asannyń sózine qulaq aspastan:

— Ótegenniń jıyrma jylqysyn alpys jylqy etip qaıtarasyń!, — deıdi.

Han jarlyǵy — bireý. Asan baıǵus jylap-eńirep eline baryp, aǵaıyn-týǵandarynan jylqy jınaıdy. Sóıtip, alpys jylqyny aıdap Abylaı men ótegenniń aldyna keledi.

Abylaı Ótegennen:

— Batyrym, ádildigime razysyń ba? — dep suraıdy. Sonda Ótegen:

— Joq, rıza emespin. Aq-qarasyn aıyrmaǵan bılikte ádildik joq. Men seni tek synaıyn dep edim. Al sen bolsań, kedeı baıqustyń zaryn tyndamadyń. Úkimdi kisiniń árine qarap shyǵardyń. «Maıyn mingen jylqym edi, naqaqtan kúıdirmeńiz» degen sózin qulaǵyńa ilmedin, — deıdi de Asanǵa:

— Sen maıyn mingen atty kedeıligińnen bere almaı júrgen shyǵarsyń. Bul atty basy bútin berdim, eki dúnıede suraýy joq. Alyp kelgen alpys jylqyndy da aıdap aýylyńa qaıta ber, — dep, Asandy eline qaıtarypty.

---