InfoHub Logo

Ótegen batyrdyń jalǵyz qyzy Maqpal turmysqa shyǵar aldynda quda túsken jigiti qaıtys bolyp, qaınysy ósip-jetilgenshe birer jyl úıde otyryp qalypty. Sonan qaıyn jurty kelindi alyp ketýge kelgende, uzatylyp bara jatqan qyzyn Ótegen batyr shaqyryp alyp:

— Balam, Qudaı qalap, qutty ornyńa qonbaqsyń, jasaýyńnan bólek osy úıden ne qalaısyń, kóńilińe jaqqanyńdy ala ǵoı! — depti.

Sonymen Maqpal uzatylyp ketken soń, birneshe kúnnen keıin Ótegen báıbishesinen qyzynyń ne tańdaǵanyn surapty. Báıbishisi:

— Maqpaljan altyn-kúmis, asyl tastardy, qymbat ta baǵaly zattardy emes, seniń eski taqıańdy unatty ǵoı, — deıdi.

Sóıtse, Ótegen batyrdyń talaı joryqtarǵa kıgen eski taqıasy tórde ilýli turady eken. Maqpaldyń kózi soǵan túsip, yrym etip alǵan eken.

Muny estigen Ótegen batyr:

— Basymdaǵy baǵym qyzǵa aýdy. Qyzdarym alǵyr, ójet, uldarym jýas bolady-aý, — dep ókinipti.

Osy sózdiń jany bar sıaqty. «Ótegenniń qyzdary ójet, eti tiri, uldary momyn bolyp keledi» dep otyrady aýyl qarıalary.

 

---