InfoHub Logo

Kóp jaǵdaıda ózimiz uǵyna bermeıtin qatelikterge bireýlerdi kinálap jatamyz. Osy ádetten aryltýǵa kómektesetin ońaı jol bar.

Uıyqtap qalǵannan nemese uzaq jınalǵannan emes, keıingi shegerýge kelmeıtin jaǵdaılardan, sizdiń bógele turýyńyzdy qajet etetin oqıǵalardan kezdesýge keshikken sátterińiz bolǵan shyǵar? Árıne, ómirde túrli jaǵdaılar bolady. Alaıda buǵan siz emes, syrtqy faktorlar áser etkenin aıtyp, kóndire aldyńyz ba?

Jaýap qandaı bolmasyn, sizben kezdesýge bireý keshigip jatsa, onyń bógelýine sebep bolǵan jaǵdaılarǵa qaramastan, ony uqypsyzdyǵy úshin kinálaýǵa daıyn turatyn bolarsyz?

Ózgelerdiń qateligi nege keshirilmesteı kórinetinin, al óz qatelikterimizdi syrtqy jaǵdaılarmen nege aqtap alýǵa daıyn turatynymyz jaıly osy maqalada áńgimelemekpiz.

Atrıbýsıa qateligi degenimiz ne?

Ózgelerdiń qateligin ásireleý – qalypty qubylys. Bul turǵydan ýaıymdaýdyń qajeti joq, sebebi bul psıhologıalyq mehanızm bárinde bar. Ol atrıbýsıa qateligi dep atalady jáne bylaı túsindiriledi:

Biz ózge adamdardyń áreketin tulǵalyq ereksheligi turǵysynan, al ózimizdikin – syrtqy jaǵdaılardyń áseri turǵysynan túsindirýge beıimbiz.

Bul qubylysty biz kúndelikti baıqaımyz.

Alaıda atrıbýsıa qateliginiń eń qorqynyshtysy óz áreketterińdi árdaıym aqtap alý emes. Eń qıyny – munyń adamdarmen qarym-qatynasymyzǵa kóshýi. Bir adam basqa bireýdiń jaman minezin aıtyp, kinálap, al ózine kelgende buǵan syrtqy áserlerdi kinalaıtyn kóptegen mysaldardy bilemiz.

Dóreki adamdy kezdestirgende, ol adam nege ondaı boldy dep árkim oılana bermeıdi. Birinshi kezekte biz onyń tulǵasyna kózqarasymyzdy kórsetemiz. Biraq biz bulaı saldardy sebeppen shatastyryp, adamdardyń jáne ózimizdiń áreketterimizdi saýatty baǵalaı almaı jatamyz.

Atrıbýsıa qatelikterin túısinýdiń ózi qarym-qatynastaǵy kóptegen máselelerge jańasha qaraýǵa múmkindik beredi. Alaıda ol týraly bilý «Ne isteý kerek?» degen suraqqa jaýap bermeıdi. Sondyqtan men osy psıhologıalyq qaqpanǵa túsip qalmaýdyń birneshe qarapaıym erejesin usynamyn.

Ózgelerdi kinálaýdy qalaı doǵarýǵa bolady?

1. Syrtqy sebepti izdeńiz

Bógde adamnyń kesirinen qolaısyz jaǵdaıǵa túsip qalǵan bolsańyz, ózińizge myna suraqty qoıyńyz: «Onyń bul áreketine oǵan táýeldi emes qandaı da bir sebep bolýy múmkin be?» Jaǵdaılarǵa ǵana súıenip, adamnyń jeke qasıetterin ekinshi planǵa ysyryp tastańyz. Sebebi jalpy bizdiń minezimiz kóptegen jaǵdaılardyń áserinen qalyptasty ǵoı.

Jaýap tabylǵan sátte emosıalaryńyz birtindep báseńdeıdi. Onyń ornyna adamnyń olaı emes, nege bulaı istegenin túsine bastaısyz jáne jaqyn dosyńyzdy, súıiktińizdi nemese bıznes-seriktesińizdi kinárattamaısyz.

2. Nıettes bolyńyz

Sebebin tapqan ýaqytta, ashý men kóńil qalýdyń ornyna janashyrlyq keledi. Sebebi siz qıyn jaǵdaıǵa túsip qala jazdaǵan adam úshin ýaıymdaı bastaısyz.

Eger bul sezim birden kelmese, onda ózińizdi sol adamnyń ornyna qoıyp kórińiz. Iá, ol keshigip jatyr, biraq oǵan dereý týystaryna kómektesý kerek bolǵan shyǵar nemese jumystan kútpegen tapsyrma júktelgen shyǵar? Siz onyń ornynda ne ister edińiz?

Adamnyń boıynan kemshilik izdegenshe sol adamǵa nıettes bolyńyz. Sonda siz ózińizdi teris oıdan aryltyp qana qoımaı, adamdy bekerge aıyptamaıtyn bolasyz.

3. Ótkenmen ómir súrmeńiz

Bul psıhologıalyq qaqpan jaıly bilgende, burynyraqta oǵan túsken jaǵdaılardy eske túsire bastadym. Eń aldymen sezingenim — bul óz-ózimdi aıyptaý boldy. Sebebi osyndaı sátterde bireýlerdi kinálap, ózimdi aqtap alǵan kezderim esime tústi. Sonymen qatar ózgelerdiń syrtqy jaǵdaılardyń saldarynan ózderin aqtap alǵan kezderine ashýym keldi.

Biraq bul sezimder meni artqa tartpas úshin men búginde ár oıym men áreketimdi baqylap, ótkenmen ómir súrýdi doǵardym.

Óz qatelikterińizdi túsingen ýaqytta, ózgelerdiń áreketiniń sebebin izdep jáne olarǵa nıettes bolýdy úırengen kezińizde, ózgeler men ózińizdi kinálaýdan arylasyz.

Sóz sońynda

Atrıbýsıa qateliginen arylý qıyn. Sebebi barlyq jetistikterge ózimiz jetkenimizge, al sátsizdikter syrttan bolatynyna senimdi bolyp júrgimiz keledi.

Alaıda ómir alýan túrli. Jáne keıde bizdiń sózderimiz ben sheshimderimizdiń saldary oń nátıje bermeıtin jaǵdaılar týyndap jatady. Muny tym quryǵanda ózimiz moıyndaýymyz kerek. Ne úshin? Sebebi basqasha áreket ete alatynymyzdy bilý úshin.

Ózgelerdiń tabysy aspannan jaýǵan, al óziniń sátsizdikteri — taǵdyrdyń tálkegi dep uǵatyndar tabysqa jete almaıdy nemese baqytty qarym-qatynas qura almaıdy.

Sáttilik!

---