Qaraǵandy oblysyndaǵy mektep medpýnkteriniń teń jartysy normaǵa saı emes
Qaraǵandy oblysy ákimdiginde mektep medpýnktterin densaýlyq saqtaý júıesiniń qaraýyna ótkizý úderisi talqylandy.
«Oblysta oqýshylar men mektep ujymyna medısınalyq qyzmet kórsetý jumysyn, qurylǵylar men medısınalyq kabınet ǵımarattaryn densaýlyq saqtaý júıesine ótkizý boıynsha Jol kartasy jasaldy. Menshik nysanyna qaramastan, barlyq mektepter sol aýmaqtaǵy emhanalarǵa bekitilgen», - dep habarlady oblystyq densaýlyq saqtaý basqarmasynyń basshysy Erjan Nurlybaev.
«Inventarızasıa kórsetkendeı, bilim berý uıymdarynyń 40% medısınalyq pýnktteri ǵımarat, tehnıkalyq sharttar, ornalasqan orny sekildi normatıvterge sáıkes kelmeıdi. Sondaı-aq, kabınetterdiń jabdyqtalýy da ruqsat etilgen normanyń 35,8% ǵana quraıdy», - dep atap ótti baıandamashy.
Onyń aıtýynsha, óńirdegi bilim berý júıesinde 8 dáriger men 529 ortasha medısınalyq qyzmetker jumys isteıdi. Mekeme basshysy olardyń eshqaısysy jumyssyz qalmaıtynyn basa aıtty.
«Barlyǵyna emhana shtatyna aýysý týraly habar jiberildi. Salystyrý arqyly 10 medısınalyq qyzmetkerdiń sertıfıkaty joq ekendigi anyqtaldy. Olar ýaqytsha ózge laýazymdar boıynsha qabyldanady jáne emhana esebinen biliktilikterin kóterip, sertıfıkattalady», - dedi E.Nurlybaev.
Ol bıylǵy oqý jylynda 180 myńnan astam oqýshynyń qaralǵanyn, onyń 8,5 myńynyń túrli aýrýlar boıynsha dıspanserlik esepke qoıylǵanyn habarlady.
Qaraǵandy oblysynda jalpy bilim beretin 513 mektep bar, onyń 507 memlekettik jáne 6 - jeke. Onda 475 medısınalyq pýnkt jumys isteıdi. Al 15 balaǵa deıin oqıtyn aýyldyń shaǵyn mektepterinde medısınalyq kabınetter múldem joq.
You Might Also Like
-
Kóp jaǵdaıda ózimiz uǵyna bermeıtin qatelikterge bireýlerdi kinálap jatamyz. Osy ádetten aryltýǵa kómektesetin ońaı jol bar.
-
Aqmolalyq oqýshylar usynǵan jobalar halyqaralyq ǵylymı-praktıkalyq konferensıada eń úzdik tanyldy.
