InfoHub Logo

Bilim berý tarıhyndaǵy erekshe oqý jyly máresine jetýge jaqyn. Búkil álemde bir jarym mıllıard, Qazaqstanda úsh mıllıonnan astam oqýshy bul oqý jyly negizinen qashyqtan bilim aldy.

Qazaqstandyq muǵalimder men oqýshylar paıdalanǵan negizgi onlaın oqytý júıesi – OnlineMektep platformasy. Platforma men onyń mazmunyn ázirlegen BilimLand kompanıasy men «Nazarbaev zıatkerlik mektepteri» ulttyq sıfrly mektepke aınalǵan OnlineMektep jumysy týraly málimetterdi jarıalady.

Jobaǵa qatysqan 500-den asa «Nazarbaev zıatkerlik mektepteriniń» ustazdary men 400-den asa BilimLand mamany qazaq jáne orys tilderinde barlyq 11 synyp pen 37 pándi qamtıtyn 24 240 sıfrlyq sabaq jáne 550 000 ınteraktıvti jattyǵý jasap shyqqan. Ár sabaq oqýshynyń fýnksıonaldyq saýattylyǵyn arttyrý maqsatynda júıeniń ár oqýshynyń jeke erekshelikterine beıimdelýine yqpal etetin taqyrypty túsindirý bólimi men 9 deńgeıli jattyǵýlar jıyntyǵynan turady. Osylaısha, pandemıalyq shekteýge jaýap retinde qurastyrylǵan júıeniń arqasynda Qazaqstandyq jańartylǵan mektep mazmuny sandyq formatqa tolyqtaı kóshirilip, ár oqýshyǵa jetkizildi. Mamandardyń pikirinshe, OnlineMektep – eń shalǵaı aýyl oqýshylaryn eldegi eń úzdik pedagogıkalyq tájirıbemen baılanystyrǵan erekshe jobaǵa aınaldy.

Zero.kz qazaqstandyq ınternet-statıstıka reıtıńine sáıkes OnlineMektep toǵyz aı boıy elimizdegi eń kóp qaralatyn veb-resýrs boldy. Oqý jylynyń basynan beri platformada kún saıyn 2 mıllıonǵa jýyq oqýshy bilim aldy. Trafıktiń 80 paıyzy OnlineMektep mobıldi qosymshasyna tıesili.

Platformaǵa 2 875 697 belsendi oqýshy men 284 033 muǵalim tirkelgen. Oqý jylynda OnlineMektep-te 315 mıllıon onlaın sabaq ótken, 101 627 825 úı jumysy berilip, tekserildi, 2 504 166 189 tapsyrma men jattyǵý oryndaldy.

Pandemıa ásirese ustazdar qaýymyna salmaq saldy. Tehnologıalarmen baılanysty jańa daǵdylardy tez ıgerýge týra keldi. Oqýshylar men ata-analar da tosyn jaǵdaıǵa shuǵyl beıimdelýge májbúr boldy. Qysyltaıań jaǵdaıda ustazdardy qoldap, olarǵa ádistemelik kómek kórsetý úshin platforma negizinde muǵalimderdiń aýqymdy kásibı qaýymdastyǵy quryldy, ustazdardy qoldaý qyzmetiniń YouTube arnasyna 370 myńnan asa muǵalim jazylǵan.

OnlineMektep fýnksıonaly keste qurý, muǵalimder men oqýshylar arasyndaǵy komýnıkasıa, sınhrondy (beınekonferensıalyq baılanys arqyly) jáne asınhrondy (yńǵaıly ýaqytta) oqytý múmkindigi, úı jumysy, úlgerim monıtorıńi, sabaq, bólim jáne toqsan úshin baǵalaýdy úılestirý sekildi negizgi qyzmetterdi tolyq qamtydy.

Platforma fýnksıonaly Elbasy Akademıasynyń Qazaqstandaǵy alǵashqy «Birge oqý»  onlaın-mektebiniń negizin qalady. Qazaqstan Respýblıkasynyń Tuńǵysh Prezıdenti – Elbasy N. Nazarbaevtyń bastamasymen qolǵa alynǵan aýqymdy pılottyq joba shalǵaıdaǵy aýyl mektepteriniń myńnan astam daryndy oqýshylaryn qamtydy. Olar elimizdiń jetekshi muǵalimderinen tegin bilim alýda. Onlaın-mektepke oqýshylardy irikteý aýyl oqýshylaryna arnalǵan «Myń bala» Ulttyq olımpıadasy arqyly ótti.

Oqýshylar oqý jylynyń basynan bastap elimizdiń ozyq muǵalimderinen tegin bilim alýda. Matematıka, qazaq, orys jáne aǵylshyn tilderi boıynsha bilim beriledi. Jaqyn arada 10-11 synyp oqýshylaryn oqytý maqsatynda kontentti keńeıtý josparlanyp otyr. Sondaı-aq aýyl ǵana emes, sonymen qatar qala mektepteriniń de oqýda qıyndyqtarǵa tap bolǵan oqýshylarynyń kóp bóligin tartý josparda bar. Jalpy, jańa oqý jylynan bastap 10 myńnan astam oqýshyny qamtý josparlanýda.

Osy jáne ózge de málimetter pandemıa jaǵdaıynda ótken oqý jylynyń qorytyndylaryna arnalǵan «Pandemıa sabaqtary: bilim berýdegi sıfrlyq transformasıanyń búgini men bolashaǵy» konferensıasynda jarıalandy.

Konferensıaǵa qatysýshylar daǵdarys kezindegi bilim sapasyna kelgen nuqsan onlaın oqytýdyń emes, pandemıanyń áseri degenge kelisti. Bul jaǵdaıda qashyqtan oqytý men onlaın platformalar oqý prosesin qamtamasyz etýdiń negizgi quralyna aınaldy. Pandemıa bilim berýdegi sıfrlyq transformasıany jedeldetip, sonyń negizinde muǵalimder baǵa jetpes tájirıbe jınady, jańa daǵdylar qalyptastyryp, sıfrlyq biliktiligin arttyrdy. Al oqýshylar  platforma men kontentke qol jetkize otyryp, ilgeri bilim alýǵa sheksiz múmkindik aldy. OnlineMektep kontenti men platformasy pandemıadan keıingi kezeńde de muǵalimder men oqýshylardyń senimdi sıfrlyq kómekshisine, qazaqstandyq elektrondy oqytý júıesiniń tiregine aınalyp otyr.

---