InfoHub Logo

Pyqan bir toıdyń ústinde áldebir zań qyzmetkerimen qatar otyryp qalyp, oǵan ata-analardan aqsha alǵany týraly birdeńelerdi byljyratyp aıtyp qoıdy. Sol-aq eken, zań qyzmetkeri Pyqannyń bilegine shap ete tústi. "Bylyqtyrǵan ekensiń ǵoı ábden!" - dedi túsin sýytyp.

Pyqan shoshyp ketti.

- Taǵy qaı jerde aldyń?!

- Bastaýysh synypqa sabaq berip júrgende, - dedi Pyqan.

- Sen ózi neniń muǵalimisiń?! Birese joǵary synypqa, birese bastaýyshqa sabaq bere beresiń be?!

Pyqan shynyn aıtty:

- Men muǵalim emespin.

- Endi kimsiń?!

- Men elektrıkpin. Bastaýysh synyptyń muǵalimi bolmaı qalyp, sabaq bergenim bar edi.

- Sodan?!

- Sodan bastaýyshtan eshteńe bilmeımin. Aınalyp kelip balalarǵa "elektr jelisine jolamańdar" dep aıta berdim.

- Jolamady ma sosyn?!

- Qaıdaǵy jolamaǵan? Bala degen keri qaraı júretin halyq emes pe.

Bir bala úıindegi elektr jelisiniń ashyq turǵan jerin ustap turady. Qaıta sol kezde jelide elektr togy bolmaǵan.

Ony kórip, sheshesi balany julyp alǵan sátte, qosýly turǵan elektr shamy jarq ete qalypty.

Endi sheshesi kelip maǵan urysyp júr.

- Ne dep urysady sonda?!

- "Balaǵa ne tárbıe berip otyrsyń?! Ne oqytyp jatyrsyń?! Elektr jelisine jolama dep nege aıtyp qoımaısyń?!" deıdi. "Aý, qudaıdyń qutty kúni sony aıtpaı, ne aıtyp jatyrmyn?"

Sodan izdene bastadym. Pedagogıkalyq kitaptardy alyp keldim. Sóıtsem, pedagogter bárin jazyp ketken eken ǵoı. Balany zertteı-zertteı kelip, "Ne ata-ananyń aıtqanyn qylmaıtyn, ne muǵalimniń aıtqanyn tyńdamaıtyn kip-kishkentaı júgirmekterdi bala dep aıtamyz" dep anyqtamasyn beripti. "Qalaı dál berilgen anyqtama!" deımin.

Ádis-tásilderin de qosa bergen eken. Solardyń ishinen bir ádisti tańdap aldym. Bul ádis pedagogıkada qaýipti tásil dep atalady eken. Bul ádisti tájirıbede qoldanýǵa pedagogtardyń ózderiniń júrekteri daýlaı bermeıdi deıdi. Eger bul ádis óziniń nátıjesin bermese, onda pedagogtyń ózine qarsy jumys isteıdi eken.

- Ol qandaı ádis?

- Keri qaraı aıtý ádisi. Iaǵnı, ustama deýdiń ornyna usta deısiń.

- Sodan?!

- Bireýi jolasaıshy. Sol-aq eken, mektepke "Raqmet sizge, muǵalim! Balamyz úıde táp-tártipti bolyp qaldy. Siz durys baǵytta jumys istep jatyrsyz" degen sheshelerdiń alǵysy jaýdy da ketti.

- Sol joly ǵoı alyp júrgeniń?!

- Kishkentaı. Ózderi berdi.

- Bylyqtyrǵan ekensiń ǵoı ábden! - dep zań qyzmetkeri Pyqannyń bilegin odan ári qysa tústi.

Pyqan aıtty:

- Osy siz toıǵa qaı jaǵynan qatysyp otyrsyz?

- Qaı jaǵynan qatysyp otyrsyń degen ne?! Meni tanymaı otyrsyń ba?! Men degen qalyńdyqtyń týǵan aǵasy emespin be?!

- E, báse!.. - dedi Pyqan.

- Ne báse?!

- Toı ústinde minez kórsetýińiz jaman degenim de. Qyz jaǵynan bolǵannan keıin eken ǵoı.

- Sen ul jaǵynansyń ba?! Ana inińe aıtyp qoı! Osy toıdan keıin qaryndasyma saýsaǵynyń ushy tımeıtin bolsyn! Óziń mektepte isteımin dep otyrsyń ǵoı, inińdi tárbıelep júrsiń be endi?!

- Aıtýdaı-aq, aıtyp jatyrmyz, - dedi Pyqan. - Bir-birlerińdi syılap júrińder, otbasy degen syılastyqtan bastalady dep jatyrmyz.

Pyqan oıansa, osynyń bári túsi eken. Biraz eseńgirep jatty.

Ótkende Pyqannyń inisiniń úılengeni ras edi. Kelinniń aǵasynyń zań qyzmetkeri bolyp shyqqany da, ekeýiniń toıda birge bolǵandary da, qatar turyp áńgimeleskenderi de ras edi.

Osy kezde Pyqannyń ústine kelinshegi Bıbigúl kirdi.

- Tur, jýyn, - dedi Bıbigúl Pyqanǵa. - Keshkisin Tólegenderdiń qonaqqa shaqyryp otyrǵanyn bilesiń be?

- Tólegen degen kim? - dedi Pyqan bir kózin ashyp, bir kózin jumǵan qalpy syǵyraıa qarap.

- Jyndy ma, Tólegen degen kim degeni nesi?! Sálıanyń aǵasy she, prokýratýrada isteıtin.

Pyqan shoshyp ketti.

- Barmaımyn! - dedi Pyqan qabyrǵaǵa qaraı tyǵyla túsip.

- Esiń durys pa?! Barmaǵany nesi?! Tólegen degen syılasyp otyrǵan adamyń emes pe? Tólegen degen - ózi bir jaqsy jigit. Prokýrormyn dep shánıip turǵan ol joq.

- Men mektepten shyǵamyn, - depti Pyqan jylamsyrap.

Bıbigúl Pyqannyń janyna kelip, qolynyń syrtyn onyń mańdaıyna tıgizip kórdi.

- Sen osy aýyraıyn dep otyrsyń-aý deımin. Tólegen seniń mektebińdi qaıtsin? Tólegenniń senen basqa jumysy joq deısiń be? Tur, jýyn!

Sol kúni keshkisin Pyqan galstýgin taǵynyp, kelinshegi Bıbigúldi qoltyqtap Tólegen qudasynyń úıine kele jatty.

Óziniń mektebiniń janynan óte bergende, svettiń jaryǵymen jarqyrap jatqan mekteptiń aýlasyna kózi tústi. Túsinde Tólegenniń "Mektepterińniń aýlasyna qarasań, jarqyrap jatady, ishine kirseń, edenderiń jaltyrap jatady, ishteriń nege sondaı bolyp turmaıdy osy?" degen sózin esine aldy. "Mektepterińniń aýlasy qalaı jarqyrap jatsa, edenderiń qalaı jaltyrap jatsa, pedagog adamnyń ishi de solaı jarqyrap turatyn bolsyn" degeni ǵoı Tókemniń" dep oı túıdi Pyqan.

Tólegen tek Pyqandardy ǵana emes, taǵy da biraz jora-joldastaryn jubaılarymen qosyp shaqyrǵan eken. Pyqan da Bıbigúlimen solardyń arasyna kelip jaıǵasty.

Ústel basynda otyryp, qonaqtaryna elpildep, qonaqjaılylyq tanytyp otyrǵan Tólegen qudasyna kózi túsken saıyn, Pyqannyń da túsi esine túsip ketip, álsin-álsin jymıa berdi.

---