InfoHub Logo

Qadyrǵalı Jalaıyr (XVI-XVII ǵasyrdyń basy) — asa kórnekti orta ǵasyr tarıhshysy.Ol bı jáne asa bilimdi kisi bolǵan. Shyǵys tarıhyn jáne musylman mádenıetiniń tarıhyn jetik meńgergen. Arab, parsy tilderin óte jaqsy bilgen. Qazaqstan, Orta Azıa jáne Ońtústik Sibirdiń kóptegen qalalary men oblystarynda bolǵan. Qoǵam ómirin jan-jaqty bilýiniń arqasynda ol sultan Ondannyń uly Oraz Muhammedtiń tárbıeshisi (atalyq) retinde joǵary laýazymdy qyzmet atqarǵan.

Qadyrǵalı Jalaıyr — XVII ǵasyrdyń basynda Qazaq handyǵy týraly tarıhı eńbek jazǵan tuńǵysh qazaq ǵalymy. Ol óz kitabynda Shyńǵys han áýletiniń jáne Altyn Orda bıleýshileriniń tarıhyn jazady. Onyń jazǵan kóptegen derekteri qazaq halqynyń tarıhı aýyz ádebıetinen alynǵandyqtan, basqa tarıhı shyǵarmalarda kezdespeıdi. Qadyrǵalı Jalaıyrdyń kitabynyń arqasynda XV-XVI ǵasyrlardaǵy Qazaq handyǵynyń tarıhyn bilemiz. Bizdiń zamanymyzǵa qazaq halqynyń tarıhı mádenıeti — asa baı murasy osy tarıhshynyń eńbegi arqyly jetti.

---