InfoHub Logo

Sáýlet óneriniń tamasha týyndylarynyń biri — Qarahan kesenesi. Ol Taraz qalasyndaǵy «Ejelgi Taraz eskertkishteri» qoryq-murajaıynda ornalasqan. Kesene Qarahan áýletinen shyqqan han Sha-Mahmud Buǵra Qarahan qabiriniń basyna ornatylǵan.

Ańyz boıynsha, Qarahan Aısha degen qyzǵa ǵashyq bolypty. Biraq jaýgershilik zaman ekeýiniń qosylýyna kedergi bolǵan kórinedi. Aqyry, ekeýi qosylýǵa serttesip, qyz Qarahannyń aýylyna qaraı jol tartady. Jolda Aısha bıbi sýǵa shomylyp shyǵyp, kıimin kıip jatqanda sáýkele ishine kirip ketken jylan qyzdy shaǵady. Qarahan esinen tanyp, álsireı bastaǵan Aıshany moldaǵa aparyp, nekesin qıdyrady. Aısha bıbi osy jerde batyrdyń qolynda kóz jumady. Sóıtip, Aısha bıbiniń qaıtys bolǵan jerine mazar turǵyzady. Qasynan Qarahan ózine de mazar salǵyzady.
Qarahan esimi el arasynda bedeldi, áýlıe kisi retinde tanylǵan. Sodan onyń mazary el ishinde «Áýlıe ata kúmbezi» atalǵan jáne shamamen XIX ǵasyrdyń ortasynan XX ǵasyrdyń basyna deıin qazirgi Taraz qalasy Áýlıeata atanǵan.

XI ǵasyrda salynǵan «Áýlıe ata kúmbezi» XX ǵasyrdyń basyna deıin saqtalǵan. 1906 jyly kóne kúmbezdiń ornyna jańa kesene turǵyzyldy. Kúmbezdiń ushar basyna oıýly aǵash dińgek qoıylyp, bólmeniń ishine besik tárizdi saǵana ornatylǵan. Ǵımarattyń soltústik-shyǵys buryshynan tóbesine shyǵatyn baspaldaǵy bar. Kireberis tepkishektiń ústinde tórt alasa shyraqasty baǵandary bolǵan. 1979 jyly Qarahan kesenesine jóndeý jumystary júrgizildi.

Oqýǵa keńes beremiz:

Aısha bıbi kesenesi

Qorqyt ata kesenesi

Joshy han kesenesi

Alasha han kesenesi

Arystan bab kesenesi

Asan ata kesenesi

---