InfoHub Logo

Krıs Gardner kishkentaı ulymen birge qoǵamdyq dárethananyń edeninde uıyqtap júrgen kezde, bir kezderi óz ómiriniń jelisimen Gollıvýdta áıgili fılm túsiriletini týraly úsh uıyqtasa túsine kirgen emes.

Onyń adamǵa shabyt syılaıtyn keremet oqıǵasy týraly BBC agenttigi bylaı dep aıtyp berdi.

1980-jyldardyń basynda 27-jasar Gardner úshke de tolmaǵan ulymen birge bir jyl boıy Kalıfornıa shtatynyń San-Fransısko qalasynyń kóshesinde baspanasyz qańǵýmen júrdi. Gardner brokerlik fırmanyń tálimgeri bolyp júrgen, onyń jalaqasy páter jaldaýǵa da jetpeıtindeı óte az boldy.

Súıiktisimen renjisip qalǵannan keıin ol balasy ekeýi kóshede qalyp, tabylǵan jerge túnep júrdi.

Temir jol beketiniń dárethanasynan basqa, olar saıabaqta, shirkeý úıinde nemese jumysshylardyń bári úılerine tarap ketken kezde kabınetindegi ústeldiń astynda qonyp shyǵatyn. Olar baspanasyz qalǵandarǵa arnalǵan qaıyrymdylyq ashanasynda tamaqtandy. Al ákesiniń bar tapqan-taıanǵany kishkentaı Krıstiń balabaqshasynyń aqysyn tóleýge ketetin. Óıtpegen jaǵdaıda Krıs Gardner jumys isteı almaıtyn edi.

Osyndaı qıyndyqtarǵa qaramastan, Krıs jumysyn óte keremet istedi. Onyń aksıalar men oblıgasıalardy tabysty sata alatyn tabıǵı daryny boldy. Sondyqtan, Dean Witter Reynolds (DWR) fırmasyndaǵy synaq ýaqyty aıaqtalǵan soń, oǵan turaqty jumys usyndy. Tek sodan keıin ǵana ol uly ekeýine páter jaldap tura bastap, tasy órge domalady. 1987-jyly óziniń jeke Gardner Rich degen ınvestısıalyq fırmasyn ashty. 

Gollıvýd

Búginde 62-jasar Gardnerdiń tabysy 60 mıllıon dollar dep baǵalanǵan. Ol adamdarǵa shabyt beretin sózderimen álemdi aralap, baspanasyzdarǵa kómektesip, áıelderdiń zorlyq-zombylyǵyna qarsy kúresetin birneshe qaıyrymdylyq uıymdaryna qoldaý kórsetedi.

Gardner óziniń qıyn balalyq shaǵy týraly, DWR fırmasyna kelmes buryn túrmege jatyp shyqqany týraly jazylǵan ómirbaıan kitabyn shyǵarǵan kezde, Gollıvýd agentteri oǵan fılm túsirý týraly birden usynys aıtty. Al «Baqyt izdeý jolynda» atty kitaby birden bestsellerge aınaldy. 

^{Fılmnen úzindi.}

2006-jyly dál osy ataýmen jańa fılm shyqty. Krıs Gardnerdiń rólin somdaǵan Ýıll Smıt eń úzdik er adam róli úshin «Oskardy» ıelendi. 

Óz ómiri týraly syr sherte otyryp Gardner «eshnárseni ózgertpes» edim deıdi. «Bala kezimde men óz balalarym qıyndyq kórmes úshin qınaldym. Bes jasymda meniń balalarym ákeleriniń kim ekenin biletin bolady dep óz-ózime ýáde bergenmin. Al ómirimniń qalǵan bóligi ózim qalaǵandaı boldy. Óıtkeni men bárin durys jasadym», - deıdi Gardner.

Shabyt bergen anasy

Bolashaq mıllıoner Vıskonsındegi Mıloýkı qalasynda dúnıege keldi. Ol óziniń týǵan ákesi týraly eshnárse bilmedi. Anasy Bettı Djınmen jáne únemi araq iship, ony mazaq etetin ógeı ákesimen birge joqshylyqta ómir súrdi. Kúıeýinen azap kórgen anasy ony abaısyzda óltirip alyp, jazasyn ótegenshe ol biraz ýaqyt asyrandy bala boldy. Osyndaı qıyn balalyq shaǵyna qaramastan Gardner anasynyń ózin únemi shabyttandyratynyn aıtýdan jalyqqan emes.

«Meniń anam kún saıyn «Ulym, sen qalaǵan maqsatyńa qol jetkizip, óziń qalaǵandaı adam bola alasyń» dep qaıtalaı beretin, qarapaıym analardyń biri bolatyn. Al men oǵan sendim. Oǵan 100% kózim jetti» - deıdi Gardner.

Baqytty sát

Árıne, Gardner tabysqa birden qol jetkizgen joq. Orta mektepti aıaqtaǵannan keıin ol AQSH áskerı-teńiz kúshteriniń qatarynda áskerde boldy.1974-jyly áskerı mindetin úzdik aıaqtaǵan Gardner San-Fransıskoǵa kelip, onda medısınalyq jabdyqtardy sata bastady. Bir kúni bir kisi qyzyl Ferrarıin onyń kóliginiń janyna qoıady. Jas jigit odan qalaı aqsha tabatynyn suramaq boldy. Mine, osy sátten bastap onyń ómiri kúrt ózgerip sala berdi. Ol Bob Brıjes esimdi bırjalyq broker bolyp shyqty. Biraz áńgimeleskennen keıin, Gardner oǵan ózin osy kásipte synap kórgisi keletinin aıtty.

Olar taǵy da kezdesetin bolyp kelisti. Dál osy Brıjes Gardnerdiń DWR kompanıasyna jumysqa kelýine muryndyq boldy.

Áńgimelesýden birneshe kún buryn Krısti kóligin durys qoımaǵandyqtan salynǵan aıyppuldy tólemegeni úshin tutqyndap ketken bolatyn. Biraq ol báribir áńgimelesýge keldi. Tek, ústinde tutqyndalǵan kezdegi kóne krassovkıi men jeletkesi bolǵan edi.

Syrtqy túrine qaramastan ol jumysqa qabyldaýshylardy óziniń alǵyrlyǵymen, yntasymen baýrap aldy da, ony tálimgerlikke birden qabyldady.

Ómirdi qaıta baǵalaý

^{Krıs Gardner ulymen.}

2012 jyly – fılm shyqqannan keıin alty jyldan soń Gardnerdiń ómiri taǵy da túbegeıli ózgerdi. Onyń 55-jasar jary qaterli isikten kóz jumdy. Bul oqıǵa oǵan ýaqytyn qalaı paıdalanyp júrgeni týraly oı saldy. Qarjy salasyndaǵy tabysty otyz jyldan keıin ol óziniń mansap jolyn túbegeıli ózgertýge sheshim qabyldady.

«Sońǵy ret áıelimmen sóılesip otyrǵanymda, ol menen: «Ómirdiń qandaı qysqa ekenin bilgennen keıin, qalǵan kúnderińdi qalaı ótkizbekshisiń?» dep suraǵan. Mundaı áńgimeden keıin bári ózgeredi. Men qazir bárine qaıtalap aıtamyn, eger adam júreginiń túkpirinde jatqan oılaryn júzege asyrmasa, onda kún saıyn óz-ózimen ymyraǵa kele almaı júredi.

Ol endi óziniń ınvestısıalyq bankır bolyp jumys istegisi kelmeıtinin túsinip, motıvasıalyq dilmarlyq pen jazýshylyqty qolǵa aldy. 

Qazir ol jyldyń 200 kúni álemdi aralap, elýden asa eldegi tyńdarmandarynyń aldynda sóz sóıleıdi.

Gardner óz tájirıbesi adamdardyń barlyǵy – ósken ortasynyń jemisi degen teorıany joqqa shyǵaratynyna senimdi.

«Mundaı teorıa boıynsha men maskúnem, saýatsyz, áıelin, bala-shaǵasyn uratyn joly bolmaıtyn erkek bolýym kerek edi», - dep esepteıdi ol.

Biraq Gardner óziniń durys sheshim qabyldaǵanyna senimdi. Bul úshin ol anasynyń mahabbaty men basqa adamdardyń qoldaýyna qaryzdarmyn dep únemi aıtyp júredi.

«Men anamnyń jáne eshqandaı týystyq baılanysy joq adamdardyń boıynan nurdy kórdim. Ol nurdy kórip qana qoımaı, janyma jaqyn tartyp qabyldadym», - deıdi mıllıoner.

---