InfoHub Logo

Juqa aýdan ákimine baryp ózin qazylyqqa taǵaıyndaýyn ótinipti. Qazylyq oryn bolmaǵandyqtan ákim oǵan óziniń dilgirligin bildiripti. Sońynda úmitin úzgen Juqa:

— Onda «qalys qazylyqqa» taǵaıyndasańyz bolmas pa, keıbir qıyn máselelerdi sheshýge kómekteseıin, — depti.

Ákim buǵan tolyq qosylyp, Juqany qalys qazylyqqa taǵaıyndap, oǵan qyzmet keńsesin daıyndap beripti.

Juqa jumys ústeli retinde bir aǵash sandyqty ákelip ornalastyrypty da, ústine qaǵaz-qalamdaryn qoıypty. Pálendeı bir jumys shyǵyp jatpasa da, ol ár kúni óz ýaǵynda keńsesine kelip turypty.

Bir kúni bir adam basqa bir adamnyń ústinen aryz kóterip, ákimniń aldyna kelipti. Daýger:

— Ol otyz eki kentar otyn jarady. Ol otyn jarǵanda men qarsy aldyna otyryp alyp «silte! silteı tús!» dep daýystap, oǵan dem berip otyrdym, sondyqtan ol otyndy tez ári oıdaǵydaı jaryp otyrdy. Biraq aqy alatyn kezde maǵan eshnárse bermedi. İs júzinde men de sharshap-shaldyqtym, — deıdi.

— Onyń «silte, silteı tús!» dep dem bergeni ras pa? — dep suraıdy ákim otyn jarýshydan.

— Ras, — dep jaýap beredi otyn jarýshy.

Ákim buǵan pálendeı dep kesim jasaı almaı otyrǵanda kenet esine «qalys qazy» Juqa túsedi de, olarǵa:

— Senderdiń bul daýlaryńdy qalys qazy sheshim etsin, — deıdi. Jambyl qyzmetshileri ana ekeýin Juqanyń keńsesine ertip keledi.

Juqa daýgerdiń aryz-shaǵymyn estip bolǵannan keıin:

— Árıne, sen de aqy alýǵa tıistisiń, eńbegiń tekke ketse, qalaı bolǵany? — deıdi.

Otyn jarýshy dereý Juqaǵa qarap:

— Qazy myrza, men otyn jarǵanda ol bir shette qyzyq kórip qana otyrǵan, onyń aqy alatyn qaqysy ne? — deıdi.

Juqa otyn jarýshyǵa barlyq aqshańdy ákel dep buıyrady. Ol aqshany qolyna alǵannan keıin birden-birden jerge tastaıdy, kúmis teńge jerge túsken saıyn «dyńǵyr, dyńǵyr» etken daýys shyǵarady. Ol osylaısha aqshany jerge tastap bolǵannan keıin, otyn jarýshyǵa:

— Sen aqshańdy áket! — deıdi. Al daýgerge:

— Sen sol aqshańnyń daýysyn áket! — deıdi.

---