InfoHub Logo

Shyǵys Qazaqstan oblysynda qandaı aýa raıynda oqýshylar mektepke barmaıtyndyǵy belgili boldy.

SHQO Aqparat ortalyǵynda ótken baspasóz konferensıasy barysynda qutqarýshylar men jol qyzmetteriniń ókilderi qys mezgiline daıyndyq jumystarynyń qandaı deńgeıde ekendigin aıtyp berdi.

«Búgingi tańda oblys joldarynda jıi qar basatyn 386 ýchaske anyqtaldy. Jalpy uzyndyǵy 816 shaqyrym bolatyn sol ýchaskelerge 20 972 metr qar ustaıtyn qalqandar ornatyldy. Jolda qalǵandarǵa jedel kómek kórsetý úshin jeke quramnan 3 123 adam, 406 qar tazalaǵysh, 214 ınjenerlik, 96 evakýasıalyq jáne 153 ótimdiligi joǵary tehnıka saqadaı saı, - dedi oblystyq TJD tótenshe jaǵdaılardy joıý basqarmasynyń bastyǵy Rınat Qondybaev.

Óńir joldarynda 19 jylytý pýnkti ornalasqan. 4 trassalyq medısınalyq-qutqarý pýnkti de jumys isteıdi.

Budan bólek, brıfıń barysynda qandaı aýa raıynda oqýshylar mektepke barmaıdyǵy túsindirildi.

«Qolaısyz meteojaǵdaılar týyndaǵanda balalar qashyqtan oqytýǵa aýystyrylady. Sabaqtardy toqtatý QR Bilim jáne ǵylym mınıstriniń 2016 jylǵy 18 qańtardaǵy buıryǵyna sáıkes júzege asyrylady. Aýa temperatýrasy -28°C jáne odan tómen bolǵanda 1-4 synyptarda, -32°C jáne odan tómen bolǵanda 5-9 synyptarda, -34°C jáne odan tómen bolǵanda 0-11 synyptar men kolejderdiń I, II kýrstarynda sabaq onlaın ótkiziledi. Sondaı-aq mektep oqýshylary men kolej stýdentteri kóshede kóktaıǵaq jáne qatty jel bolǵan kezde mektepke barmaıdy», - dedi SHQO Bilim basqarmasynyń ókili Bulbul Qozybaeva.

---