InfoHub Logo

Aq qaz sý jaǵasynda mamyrlaı̆ jaı̆ylyp júr edi, qulaǵyna shań-shuń kerisken daýys estildi. Daýys shyqqan jaqqa moı̆yn sozyp qarasa, o, ǵalamat, kádimgi aǵash qalamsap pen bolat qalamush! Ekeýi terezeniń aldyna shyǵyp alyp, birine-biri kijinip, salǵylasyp tur.

— Meniń paı̆dam adamǵa senen góri on ese artyq tıedi. Men onyń kóńildegisin qaǵazǵa aı̆nytpaı̆ jazyp beretin qolǵanatymyn. Mensiz sen túkke de aspaı̆syń, — deı̆di Qalamush shińkildek jińishke únmen.

— Men bolmasam, sıasaýyttyń ishine kúmp etip, batyp keter ediń, bolmasa ıeńniń qolyn bylǵap, sógis estip jatar ediń, — deı̆di Qalamsap oǵan daý aı̆typ.

Aq qaz bul sózderdi estip, óz-ózinen myrs etip kúlip jiberdi. Sodan soń moı̆nyn odan beter sozyńqyrap:

— Áı̆, dostarym, sál sabyr etińder. Ekeýińniń talastaryń meniń kúlkimdi kelgirip tur, — dedi.

— Nege? — dep úrpıisti Qalamsap pen Qalamush.

Aq qazdyń buǵan ashýy kelip ketti de:

— Men bolmasam, sender dúnıege kelmes edińder. Búı̆tip talasyp turmas edińder. Men senderdiń atalaryń bolam! Sender, ekeýiń de meniń qaýyrsynymnan jaralǵansyńdar! — dedi.

— Qaı̆tip?

— Bilmeseńder, tyńdańdar áýlekilenbeı̆, — dep, Aq qaz áńgimesin shubyrta jóneldi. — Adam bir kezde meniń qaýyrsynymdy ushtap, ushyn eki aı̆yryq qyp úshkirlep, jazýdy sonymen jazatyn edi. Ony qaýyrsyn qalam dep ataı̆tyn. Arada talaı̆ zaman ótti. Jer betinde jazý biletin adamnyń sany kóbeı̆di de, qazdyń qaýyrsyny olarǵa jetpeı̆tin boldy. Sodan soń adam aǵashtan qalamsap jasap, oǵan qaz qaýyrsynynan qalamush tilip ornatatyn amal tapty. Bulaı̆ etkende bir qaýyrsyn talaı̆ adamnyń paı̆dalanýyna ja- raı̆tyn edi.

Arada taǵy da kóp-kóp jyldar ótti. Jazý biletinder burynǵydan da molaı̆dy. Qazdyń qaýyrsynyna muqtajdyq arta tústi. Sonan soń adam ári tolǵanyp, beri tolǵanyp myna seni, bolat Qalamushty oı̆lap tapty. Ekeýińniń dúnıege kelý tarıhtaryń, qysqartyp aı̆tqanda, mine, osyndaı̆, — dep Aq qaz sózin túı̆di.

Aǵash Qalamsap pen bolat Qalamush bul jaı̆dy buryn-sońdy estimegendikten, ekeýi bir-birine tańyrqasa qarasyp turyp qaldy.

---